ಪಡ್ಡೆಹುಲಿಗೆ ಸೀನಿಯರ್ ಅಂತೆ ಕಿರಿಕ್ ಪಾರ್ಟಿ ಕರ್ಣ!

Team Udayavani, Apr 10, 2019, 9:49 AM IST

ಎಂ. ರಮೇಶ್ ರೆಡ್ಡಿ ತೇಜಸ್ವಿನಿ ಎಂಟರ್ ಪ್ರೈಸಸ್ ಬ್ಯಾನರಿನಡಿಯಲ್ಲಿ ನಿರ್ಮಾಣ ಮಾಡಿರುವ ಪಡ್ಡೆಹುಲಿ ಚಿತ್ರ ಇದೇ ಏಪ್ರಿಲ್ ಹತ್ತೊಂಬತ್ತರಂದು ತೆರೆ ಕಾಣುತ್ತಿದೆ. ಶ್ರೇಯಸ್ ನಾಯಕನಾಗಿ ಪಾದಾರ್ಪಣೆ ಮಾಡುತ್ತಿರುವ ಈ ಚಿತ್ರದ ವಿಶೇಷತೆಗಳು ಸಾಕಷ್ಟಿವೆ. ಅದರಲ್ಲಿ ಇದರ ತಾರಾಗಣವೂ ಒಂದೆಂಬುದನ್ನು ಆ ಬಗೆಗಿನ ವಿವರ ಕೇಳಿದರೆ ಖಂಡಿತಾ ನೀವೂ ಒಪ್ಪಿಕೊಳ್ಳುತ್ತೀರಿ!

ನಿರ್ದೇಶಕ ಗುರುದೇಶಪಾಂಡೆಯವರು ಪ್ರತಿಯೊಂದು ವಿಚಾರದಲ್ಲಿಯೂ ವಿಶೇಷವಾಗಿರುವಂತೆಯೇ ಈ ಚಿತ್ರವನ್ನು ರೂಪಿಸಿದ್ದಾರೆ. ಅದರಲ್ಲಿಯೂ ಇದರ ಪಾತ್ರಗಳಿಗೆ ಸ್ಪೆಷಲ್ ಕಲಾವಿದರೇ ಜೀವ ತುಂಬುವಂತೆ ಮಾಡಿದ್ದಾರೆ.

ಕ್ರೇಜಿಸ್ಟಾರ್ ರವಿಚಂದ್ರನ್ ಮತ್ತು ಸುಧಾರಾಣಿ ತುಂಬಾ ವರ್ಷಗಳ ನಂತರದಲ್ಲಿ ಪಡ್ಡೆಹುಲಿ ಮೂಲಕ ಜೋಡಿಯಾಗಿ ಕಾಣಿಸಿಕೊಂಡಿದ್ದಾರೆ. ಅವರನ್ನು ಈವರೆಗೂ ಪ್ರೇಕ್ಷಕರು ನೋಡಿರದ ರೀತಿಯಲ್ಲಿ ಅನಾವರಣಗೊಳಿಸೋ ಉದ್ದೇಶದಿಂದಲೇ ನಿರ್ದೇಶಕರು ಪಾತ್ರ ಕಟ್ಟಿದ್ದಾರಂತೆ.

ಇನ್ನುಳಿದಂತೆ ರಕ್ಷಿತ್ ಶೆಟ್ಟಿ ಕೂಡಾ ಈ ಚಿತ್ರದಲ್ಲಿ ಬಹು ಮುಖ್ಯವಾದ ಅತಿಥಿ ಪಾತ್ರವೊಂದರಲ್ಲಿ ನಟಿಸಿದ್ದಾರೆ. ಈ ಹಿಂದೆ ಅವರು ಕಿರಿಕ್ ಪಾರ್ಟಿಚಿತ್ರದ ಕರ್ಣ ಎಂಬ ಪಾತ್ರದಲ್ಲಿ ನಟಿಸಿದ್ದರಲ್ಲಾ? ಪಡ್ಡೆಹುಲಿಯಲ್ಲಿಯೂ ಅವರು ಅದೇ ಹೆಸರಿನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರಂತೆ. ಇದರಲ್ಲವರದ್ದು ಕಿರಿಕ್  ಪಾರ್ಟಿಯ ಮುಂದುವರೆದ ಕಥೆ ಹೊಂದಿರೋ ಪಾತ್ರವಂತೆ!