‘ಜವಾನ್’ನಲ್ಲಿ ಪ್ರಿಯಾಮಣಿ: ಮತ್ತೊಮ್ಮೆ ಶಾರುಖ್ ಖಾನ್ ಜತೆ ನಟಿಸಲು ಕಾತರ

Team Udayavani, Jun 19, 2023, 1:24 PM IST

ಈ ಹಿಂದೆ ಶಾರುಖ್‌ ಖಾನ್‌ ಮತ್ತು ದೀಪಿಕಾ ಪಡುಕೋಣೆ ಮುಖ್ಯಭೂಮಿಕೆಯಲ್ಲಿ ಅಭಿನಯಿಸಿದ್ದ “ಚೆನ್ನೈ ಎಕ್ಸಪ್ರಸ್‌’ ಸಿನಿಮಾದಲ್ಲಿ ನಟಿ ಪ್ರಿಯಾಮಣಿ “ಒನ್‌.. ಟು… ತ್ರಿ… ಫೋರ್‌…’ ಎಂಬ ಹಾಡಿಗೆ ಸೊಂಟ ಬಳುಕಿಸಿ, ಮಸ್ತ್ ಆಗಿ ಹೆಜ್ಜೆ ಹಾಕಿದ್ದು ನಿಮಗೆ ನೆನಪಿರಬಹುದು. ಈಗ ಪ್ರಿಯಾಮಣಿ ಮತ್ತೂಮ್ಮೆ ಶಾರುಖ್‌ ಖಾನ್‌ ಜೊತೆ ನಟಿಸುವ ಬಿಗ್‌ ಚಾನ್ಸ್‌ ಗಿಟ್ಟಿಸಿಕೊಂಡಿದ್ದಾರೆ.

ಹೌದು, ಸದ್ಯ ಮುಂಬರಲಿರುವ ಶಾರುಖ್‌ ಖಾನ್‌ ನಾಯಕನಾಗಿ ಅಭಿನಯಿಸುತ್ತಿರುವ “ಜವಾನ್‌’ ಸಿನಿಮಾದಲ್ಲಿ ನಟಿ ಪ್ರಿಯಾಮಣಿ ಕೂಡ ಅಭಿನಯಿಸುತ್ತಿದ್ದಾರೆ. ಮತ್ತೂಮ್ಮೆ ಶಾರುಖ್‌ ಖಾನ್‌ ಸಿನಿಮಾದಲ್ಲಿ ತೆರೆಹಂಚಿಕೊಂಡಿರುವುದರ ಬಗ್ಗೆ ಮಾತನಾಡಿರುವ ಪ್ರಿಯಾಮಣಿ, “ಮತ್ತೂಮ್ಮೆ “ಜವಾನ್‌’ ಸಿನಿಮಾದಲ್ಲಿ ಶಾರುಖ್‌ ಖಾನ್‌ ಜೊತೆ ನಟಿಸುತ್ತಿದ್ದೇನೆ ಎಂಬುದಕ್ಕೆ ತುಂಬ ಖುಷಿಯಿದೆ. ಈ ಸಿನಿಮಾ ಯಾವಾಗ ಬಿಡುಗಡೆಯಾಗುತ್ತದೆ ಎಂದು ನಾನು ಕೂಡ ಅಭಿಮಾನಿಯಾಗಿ ಕಾತುರದಿಂದ ಕಾಯುತ್ತಿದ್ದೇನೆ. ಇನ್ನು ಶಾರುಖ್‌ ಖಾನ್‌ ಜೊತೆ ಕೆಲಸ ಮಾಡುವುದೇ ಮ್ಯಾಜಿಕಲ್‌ ಅನುಭವ. ಅವರು ನನ್ನನ್ನು ನೆನಪಿಟ್ಟು ಕೊಂಡಿದ್ದಾರೆ ಎಂಬುದೇ ಖುಷಿಯ ವಿಚಾರ’ ಎಂದಿದ್ದಾರೆ.

“ನಾನು “ಜವಾನ್‌’ ಸಿನಿಮಾದ ಶೂಟಿಂಗ್‌ ಸೆಟ್‌ಗೆ ಹೋಗುವಾಗ ಅವರಿಗೆ ನಾನು ನೆನಪಿರುತ್ತೇನಾ? ಎಂಬ ಗೊಂದಲವಿತ್ತು. ಅವರು ಸೆಟ್‌ನಲ್ಲಿ ನನ್ನನ್ನು ನೋಡಿದಾಗ ನೆನಪಿಟ್ಟುಕೊಂಡು ಮಾತನಾಡಿಸಿದ ರೀತಿ ಖುಷಿಯಾಯ್ತು. ಈ ಹಿಂದೆ “ಚೆನ್ನೈ ಎಕ್ಸ್‌ಪ್ರೆಸ್‌’ ಸಿನಿಮಾದಲ್ಲಿ ಕೇವಲ ಒಂದು ಸಾಂಗ್‌ನಲ್ಲಿ ಶಾರುಖ್‌ ಜೊತೆ ನಟಿಸಿದ್ದೆ. ಈಗ ಮತ್ತೆ ತೆರೆ ಹಂಚಿಕೊಳ್ಳುತ್ತಿರುವುದಕ್ಕೆ ಖುಷಿಯಾಗುತ್ತಿದೆ’ ಎಂಬುದು ಪ್ರಿಯಾಮಣಿ ಮಾತು.

ಅಂದಹಾಗೆ, “ಜವಾನ್‌’ ಸಿನಿಮಾದಲ್ಲಿ ಮತ್ತೆ ಪ್ರಿಯಾಮಣಿ ಕೇವಲ ಹಾಡಿನಲ್ಲಿ ಮಾತ್ರ ಹೆಜ್ಜೆ ಹಾಕಿದ್ದಾರಾ? ಅಥವಾ ಸಿನಿಮಾದ ಯಾವುದಾದರೂ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರಾ? ಎಂಬ ಗುಟ್ಟನ್ನು ಮಾತ್ರ ಪ್ರಿಯಾಮಣಿ ಬಿಟ್ಟುಕೊಟ್ಟಿಲ್ಲ. ಅದೇನೆಯಿರಲಿ ಶಾರುಖ್‌ ಖಾನ್‌ ಸಿನಿಮಾದಲ್ಲಿ ಪ್ರಿಯಾಮಣಿ ರೋಲ್‌ ಏನು ಎಂಬ ಕುತೂಹಲಕ್ಕೆ “ಜವಾನ್‌’ ಸಿನಿಮಾ ಬಿಡುಗಡೆಯಾದ ಮೇಲಷ್ಟೇ ಉತ್ತರ ಸಿಗಲಿದೆ.

ಇನ್ನು “ಜವಾನ್‌’ ಆ್ಯಕ್ಷನ್‌-ಥ್ರಿಲ್ಲರ್‌ ಸಿನಿಮಾವಾಗಿದ್ದು, ತಮಿಳು ನಿರ್ದೇಶಕ ಅಟ್ಲಿ ಈ ಸಿನಿಮಾಕ್ಕೆ ಆ್ಯಕ್ಷನ್‌-ಕಟ್‌ ಹೇಳಿದ್ದಾರೆ. “ಜವಾನ್‌’ ಸಿನಿಮಾದಲ್ಲಿ ಶಾರುಖ್‌ ಖಾನ್‌ ದ್ವಿಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದು, ಉಳಿದಂತೆ ವಿಜಯ್‌ ಸೇತುಪತಿ, ನಯನತಾರಾ, ಸನ್ಯಾ ಮಲ್ಹೋತ್ರಾ ಮೊದಲಾದವರು ಸಿನಿಮಾದ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸುತ್ತಿದ್ದಾರೆ. ಬಿಗ್‌ ಬಜೆಟ್‌ನಲ್ಲಿ ನಿರ್ಮಾಣವಾಗುತ್ತಿರುವ, ಬಿಗ್‌ ಸ್ಟಾರ್‌ ಕಾಸ್ಟ್‌ ಹೊಂದಿರುವ “ಜವಾನ್‌’ ಇದೇ ಸೆಪ್ಟೆಂಬರ್‌ ತಿಂಗಳಿನಲ್ಲಿ ತೆರೆಗೆ ಬರಲಿದೆ.