Jailer: ಆಂಧ್ರ, ತೆಲಂಗಾಣದಲ್ಲೂʼಜೈಲರ್‌ʼ ಹವಾ; ʼಬೋಲಾ ಶಂಕರ್‌ʼ ಎದುರು ಗಳಿಸಿದ್ದೆಷ್ಟು?

Team Udayavani, Aug 14, 2023, 5:06 PM IST

ಹೈದರಾಬಾದ್: ದಕ್ಷಿಣ ಸಿನಿಮಾರಂಗದಲ್ಲಿ ಎರಡು ದೊಡ್ಡ ಸಿನಿಮಾಗಳು ರಿಲೀಸ್‌ ಆಗಿದ್ದು, ಎರಡು ಸಿನಿಮಾಗಳ ನಡುವೆ ಪೈಪೋಟಿ ಶುರುವಾಗಿದೆ. ಒಂದು ಕಡೆ ಕಾಲಿವುಡ್‌ ನಲ್ಲಿ ಸೂಪರ್‌ ಸ್ಟಾರ್‌ ರಜಿನಿಕಾಂತ್‌ ಅವರ ʼಜೈಲರ್‌ʼ ರಿಲೀಸ್‌ ಆಗಿದ್ದರೆ, ಇತ್ತ ಟಾಲಿವುಡ್‌ ನಲ್ಲಿ ಮೆಗಾ ಸ್ಟಾರ್‌ ಚಿರಂಜೀವಿ ಅವರ ʼಭೋಲಾ ಶಂಕರ್‌ʼ ತೆರೆ ಕಂಡಿದೆ. ಎರಡು ಸಿನಿಮಾ ಒಂದು ದಿನದ ಅಂತರದಲ್ಲಿ ರಿಲೀಸ್‌ ಆಗಿದೆ.

ನಿರೀಕ್ಷೆಯಂತೆ ನೆಲ್ಸನ್‌ ದಿಲೀಪ್‌ ಕುಮಾರ್‌ ನಿರ್ದೇಶನದ ʼಜೈಲರ್‌ʼ ಆರಂಭಿಕ ದಿನದಿಂದಲೇ ಬಾಕ್ಸ್‌ ಆಫೀಸ್‌ ನಲ್ಲಿ ಕಲೆಕ್ಷನ್‌ ವಿಚಾರದಲ್ಲಿ ಬಿಗ್‌ ಓಪನಿಂಗ್‌ ಪಡೆದುಕೊಂಡಿದೆ. ಮೊದಲ ವಾರದಲ್ಲಿ ಒಟ್ಟು ಇದುವರೆಗೆ ಸಿನಿಮಾ ವರ್ಲ್ಡ್‌ ವೈಡ್‌ 300 ಕೋಟಿ ರೂಪಾಯಿಯ ಗಳಿಕೆಯನ್ನು ಮಾಡಿದೆ. ಕಳೆದ ನಾಲ್ಕು ದಿನದಲ್ಲಿ ʼಜೈಲರ್‌ʼ ಸಿನಿಮಾದ 93 ಲಕ್ಷ ಟಿಕೆಟ್‌ ಗಳು ಸೇಲ್‌ ಆಗಿದೆ.

ತೆಲುಗು ನಾಡಿನಲ್ಲಿ ʼಜೈಲರ್‌ʼ ಅಬ್ಬರ..

ಸೂಪರ್‌ ಸ್ಟಾರ್‌ ರಜಿನಿಕಾಂತ್‌ ಅವರಿಗೆ ದೊಡ್ಡ ಅಭಿಮಾನಿಗಳ ವರ್ಗವೇ ಇದೆ. ಅವರ ಸಿನಿಮಾ ಎಲ್ಲ ರಾಜ್ಯಗಳಲ್ಲೂ ಮೋಡಿ ಮಾಡುತ್ತದೆ. ಮೆಗಾ‌ ಸ್ಟಾರ್ ಚಿರಂಜೀವಿ ಅವರ ʼಭೋಲಾ ಶಂಕರ್‌ʼ ಆಂಧ್ರ ಸೇರಿದಂತೆ ತೆಲುಗು ಬೆಲ್ಟ್‌ ನಲ್ಲಿ ಆಶದಾಯಕ ಆರಂಭವನ್ನು ಪಡೆದುಕೊಳ್ಳುವ ನಿರೀಕ್ಷೆಯಿತ್ತು. ಆದರೆ ಅದು ವಿಫಲವಾಗಿದೆ. ಆಂಧ್ರಪ್ರದೇಶ ಮತ್ತು ತೆಲಂಗಾಣದಲ್ಲಿ ಕೇವಲ ನಾಲ್ಕು ದಿನಗಳಲ್ಲಿ 32 ಕೋಟಿ ರೂಪಾಯಿಯ ಗಳಿಕೆಯನ್ನು ʼಜೈಲರ್ʼ ಮಾಡಿದೆ.

ಇನ್ನು ಚಿರಂಜೀವಿ ಅವರ ʼಬೋಲಾ ಶಂಕರ್‌ʼ ಸಿನಿಮಾ ಬಾಕ್ಸ್‌ ಆಫೀಸ್‌ ನಲ್ಲಿ ನಿರಾಶದಾಯಕ ಆರಂಭವನು ಪಡೆದುಕೊಂಡಿದೆ. ತೆಲುಗು ಬೆಲ್ಟ್‌ ನಲ್ಲಿ ಚಿರಂಜೀವಿ ಅವರ ಸಿನಿಮಾ 4 ದಿನದಲ್ಲಿ 25.22 ಕೋಟಿ ರೂಪಾಯಿ ಕಲೆಕ್ಷನ್‌ ಮಾಡಿದ್ದು, ಆ ಬಳಿಕ ಸಿನಿಮಾದ ಕಲೆಕ್ಷನ್‌ ಹೇಳಿಕೊಳ್ಳುವ ಮಟ್ಟಿಗಿಲ್ಲ.

ನೆಲ್ಸನ್ ದಿಲೀಪ್‌ಕುಮಾರ್ ಬರೆದು ನಿರ್ದೇಶಿಸಿರುವ ‘ಜೈಲರ್’ ನಲ್ಲಿ ರಜನಿಕಾಂತ್ ಟೈಗರ್ ಮುತ್ತುವೇಲ್ ಪಾಂಡಿಯನ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಇದೊಂದು ಕಮರ್ಷಿಯಲ್ ಆ್ಯಕ್ಷನ್ ಎಂಟರ್‌ಟೈನರ್ ಆಗಿದೆ. ಈ ಚಿತ್ರದಲ್ಲಿ ವಿನಾಯಕನ್, ರಮ್ಯಾ ಕೃಷ್ಣನ್ ಮತ್ತು ವಸಂತ ರವಿ ಪ್ರಮುಖ ಪಾತ್ರಗಳಲ್ಲಿದ್ದಾರೆ. ಚಿತ್ರದಲ್ಲಿ ಮೋಹನ್‌ಲಾಲ್, ಶಿವರಾಜ್‌ಕುಮಾರ್ ಮತ್ತು ಜಾಕಿ ಶ್ರಾಫ್ ಅತಿಥಿ  ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ.

ಮೆಹರ್ ರಮೇಶ್ ನಿರ್ದೇಶನದ’ಭೋಲಾ ಶಂಕರ್’ ತೆಲುಗು ಆ್ಯಕ್ಷನ್ ಥ್ರಿಲ್ಲರ್ ಸಿನಿಮಾವಾಗಿದ್ದು, ಇದು 2015 ರ ತಮಿಳು ಚಿತ್ರ ‘ವೇದಾಲಂ’ ನ ಅಧಿಕೃತ ತೆಲುಗು ರಿಮೇಕ್ ಆಗಿದೆ. ತೆಲುಗು ಆವೃತ್ತಿಯಲ್ಲಿ ಚಿರಂಜೀವಿ, ತಮನ್ನಾ ಭಾಟಿಯಾ, ಕೀರ್ತಿ ಸುರೇಶ್ ಮತ್ತು ಸುಶಾಂತ್ ಪ್ರಮುಖ ಪಾತ್ರಗಳಲ್ಲಿದ್ದಾರೆ.