ಹಿಂದಿಯ ʼ12th Failʼ ಸಿನಿಮಾ ನೋಡಿ “ಸ್ಪೂರ್ತಿ ಪಡೆದಿದ್ದೇನೆ” ಎಂದ ರಿಷಬ್‌ ಶೆಟ್ಟಿ

Team Udayavani, Oct 30, 2023, 5:15 PM IST

ಬೆಂಗಳೂರು: ನಟ- ನಿರ್ದೇಶಕ ರಿಷಬ್‌ ಶೆಟ್ಟಿ ಅವರು ಇತ್ತೀಚೆಗೆ ತೆರೆಕಂಡ ಹಿಂದಿ ಸಿನಿಮಾವೊಂದು ಸ್ಪೂರ್ತಿ ನೀಡಿದೆ ಎಂದು ಟ್ವೀಟ್‌ ಮಾಡಿದಿದ್ದಾರೆ.

ವಿಧು ವಿನೋದ್ ಚೋಪ್ರಾ ನಿರ್ದೇಶನದ ʼ 12th Failʼ ಸಿನಿಮಾ ಇತ್ತೀಚೆಗೆ ರಿಲೀಸ್‌ ಆಗಿದೆ. ಸ್ಪೂರ್ತಿದಾಯಕ ಕಥಾಹಂದರವುಳ್ಳ ಈ ಸಿನಿಮಾಕ್ಕೆ ಎಲ್ಲೆಡೆ ಪಾಸಿಟಿವ್ ರೆಸ್ಪಾನ್ಸ್‌ ವ್ಯಕ್ತವಾಗುತ್ತಿದೆ. ಐಪಿಎಸ್ ಅಧಿಕಾರಿ ಮನೋಜ್ ಕುಮಾರ್ ಶರ್ಮಾ ಮತ್ತು ಐಆರ್‌ಎಸ್ ಅಧಿಕಾರಿ ಶ್ರದ್ಧಾ ಜೋಶಿ ಅವರ ನಿಜ ಜೀವನದ ಕಥೆಯಿಂದ ಪ್ರೇರಿತವಾದ ಈ ಸಿನಿಮಾದಲ್ಲಿ ವಿಕ್ರಾಂತ್ ಮಾಸ್ಸೆ ಅವರು ಪ್ರಧಾನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.

ಕೆರಿಯರ್‌ ನಲ್ಲಿ ಗುರಿ ಸಾಧಿಸುವಾಗ ಸೋಲು ಎದುರಾದರೆ ಮರಳಿ ಪ್ರಯತ್ನ ಮಾಡು ಎನ್ನುವ ನೀತಿಯನ್ನು ಸಿನಿಮಾ ಸ್ಪೂರ್ತಿದಾಯಕವಾಗಿ ಹೇಳುತ್ತದೆ. ಬಾಕ್ಸ್‌ ಆಫೀಸ್‌ ಗಳಿಕೆಯಲ್ಲೂ ಸಿನಿಮಾ ಹಿಂದೆ ಬೀಳಿಲ್ಲ. ವಾರಾಂತ್ಯದಲ್ಲಿ 6-7 ಕೋಟಿ ರೂ.ಗಳಿಸುವ ಸಾಧ್ಯತೆಯಿದೆ.

ಪ್ರೇಕ್ಷಕರಿಂದ ಹಾಗೂ ಸೆಲೆಬ್ರಿಟಿಗಳಿಂದ ʼ12th Failʼ ಸಿನಿಮಾಕ್ಕೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಈ ನಡುವೆ ʼಕಾಂತಾರʼ ನಟ, ನಿರ್ದೇಶಕ ರಿಷಬ್‌ ಶೆಟ್ಟಿ ಅವರು ಕೂಡ ವಿಧು ವಿನೋದ್‌ ಅವರ ಸಿನಿಮಾವನ್ನು ಮೆಚ್ಚಿಕೊಂಡಿದ್ದಾರೆ.

“ಈ ಚಿತ್ರವು ಒಂದು ಪ್ರಮುಖ ಪಾಠವನ್ನು ಎತ್ತಿ ಹಿಡಿಯುತ್ತದೆ. ನಾವು ಎಷ್ಟೇ ಆಳಕ್ಕೆ ಬಿದ್ದರೂ, ಜೀವನವನ್ನು ಪುನರಾರಂಭಿಸುವಾಗ ನಮಗೆ ವಿಭಿನ್ನ ಆಯಾಮವನ್ನು ನೀಡುತ್ತದೆ. ಸಿನಿಮಾದ ಕಥೆ ಹೇಳಿಕೆಯಿಂದ ನಾನು ನಿಜವಾಗಿಯೂ ಸ್ಫೂರ್ತಿ ಪಡೆದಿದ್ದೇನೆ” ಎಂದು ರಿಷಬ್‌ ಟ್ವೀಟ್‌ ಮಾಡಿದ್ದಾರೆ.

ಹಿಂದಿ, ತಮಿಳು, ತೆಲುಗು ಮತ್ತು ಕನ್ನಡ ಭಾಷೆಯಲ್ಲಿ ಸಿನಿಮಾ ತೆರೆಕಂಡಿದೆ. ವಿಕ್ರಾಂತ್ ಮಾಸ್ಸೆ, ಪಾಲಕ್ ಲಾಲ್ವಾನಿ, ಮೇಧಾ ಶಂಕರ್, ಸಂಜಯ್ ಬಿಷ್ಣೋಯ್, ಸುಕುಮಾರ್ ತುಡು ಮುಂತಾದವರು ಸಿನಿಮಾದಲ್ಲಿ ನಟಿಸಿದ್ದಾರೆ.

This film upholds an important lesson. No matter how deep we fall , restarting life gives us a different dimension. @VVCFilms I am truly inspired by this storytelling #12fail #restart #VikrantMassey @VikrantMassey @KRG_Studios @ZeeStudios_ pic.twitter.com/9PEtwPsSuO

— Rishab Shetty (@shetty_rishab) October 30, 2023