ನಟನ ಹೆಸರಿನಲ್ಲಿ ಹಣಕ್ಕೆ ಬೇಡಿಕೆ : ವಂಚಕರ ವಿರುದ್ಧ ಗುಡುಗಿದ ಸಾಯಿ ಧರ್ಮ ತೇಜ್

Team Udayavani, May 2, 2021, 2:26 PM IST

ಹೈದರಾಬಾದ್: ಇತ್ತೀಚಿಗೆ ಆನ್‍ಲೈನ್‍ ವಂಚಕರ ಜಾಲ ಹೆಚ್ಚಾಗುತ್ತಿದೆ. ಗಣ್ಯವ್ಯಕ್ತಿಗಳ ಹೆಸರಿನಲ್ಲಿ ಹಣ ಪೀಕುತ್ತಿರುವ ಪ್ರಕರಣಗಳು ನಡೆಯುತ್ತಲೇ ಇವೆ. ಇದೀಗ ಟಾಲಿವುಡ್ ನಟ ಸಾಯಿ ಧರ್ಮ ತೇಜ್ ಅವರ ಸೋಗಿನಲ್ಲಿ ವಂಚಕರು ಜನರ ಬಳಿ ಹಣಕ್ಕೆ ಬೇಡಿಕೆ ಇಟ್ಟಿರುವುದು ಬೆಳಕಿಗೆ ಬಂದಿದೆ.

ತೆಲುಗು ಚಿತ್ರರಂಗದ ಫೇಮಸ್ ನಟ ಸಾಯಿ ಧರ್ಮ ತೇಜ್ ಅವರ ಹೆಸರಿನಲ್ಲಿ ಜನರ ಬಳಿ ಹಣಕ್ಕೆ ಬೇಡಿಕೆಯಿಡಲಾಗುತ್ತಿದೆ. ನಟನ ಹೆಸರು ದುರ್ಬಳಕೆ ಮಾಡಿಕೊಂಡು ಹಣ ಸಂಪಾದಿಸುವ ದಂಧೆಗೆ ಇಳಿದಿದ್ದಾರೆ. ಇದು ನಟ ಧರ್ಮ ತೇಜ್ ಅವರ ಗಮನಕ್ಕೂ ಬಂದಿದೆ.

ತನ್ನ ಹೆಸರಿನಲ್ಲಿ ಜನರಿಂದ ಹಣ ಲಪಟಾಯಿಸುತ್ತಿರುವುದರ ವಿರುದ್ಧ ಗುಡುಗಿರುವ ತೇಜ್, ತನ್ನ ಅಭಿಮಾನಿಗಳಿಗೆ ಹಾಗೂ ಸಾರ್ವಜನಿಕರಿಗೆ ಎಚ್ಚರಿಕೆಯನ್ನೂ ನೀಡಿದ್ದಾರೆ. ದಯವಿಟ್ಟು ಯಾರೂ ಮೋಸ ಹೋಗಬೇಡಿ. ಇಂತಹ ವಂಚಕರ ಜಾಲಗಳ ವಿರುದ್ಧ ಎಚ್ಚರಿಕೆಯಿಂದಿರಿ ಎಂದಿದ್ದಾರೆ.

ಇದೆ ವೇಳೆ ವಂಚಕರಿಗೆ ವಾರ್ನ್ ಮಾಡಿರುವ ಅವರು, ಕಾನೂನು ರೀತಿಯಲ್ಲಿ ಕ್ರಮ ಕೈಗೊಳ್ಳಲಾಗುವುದು ಎಂದು ಎಚ್ಚರಿಸಿದ್ದಾರೆ.

ಇನ್ನು ಸದ್ಯ ದೇವಕತಾ ನಿರ್ದೇಶನ ಮಾಡುತ್ತಿರುವ ರಿಪಬ್ಲಿಕ್ ಸಿನಿಮಾದಲ್ಲಿ ತೇಜ್ ನಟಿಸುತ್ತಿದ್ದಾರೆ. ಈ ಚಿತ್ರದಲ್ಲಿ ಅವರದು ನಾಯಕನ ಪಾತ್ರ. ಕೋವಿಡ್ ಪಿಡುಗು ಕಳೆದ ಮೇಲೆ ಈ ಸಿನಿಮಾ ತೆರೆಗೆ ಬರುವ ನಿರೀಕ್ಷೆ ಇದೆ.