ʼLove & Warʼ ಮೂಲಕ ಹೊಸ ಪ್ರೇಮ ಕಥೆ ಹೇಳಲು ರೆಡಿಯಾದ ಸಂಜಯ್‌ ಲೀಲಾ ಬನ್ಸಾಲಿ

Team Udayavani, Jan 24, 2024, 6:59 PM IST

ಮುಂಬಯಿ: ಬಾಲಿವುಡ್‌ ನ ಜನಪ್ರಿಯ ನಿರ್ದೇಶಕ ಸಂಜಯ್ ಲೀಲಾ ಬನ್ಸಾಲಿ ಅವರು ತಮ್ಮ ಮುಂದಿನ ಸಿನಿಮಾವನ್ನು ಅನೌನ್ಸ್‌ ಮಾಡಿದ್ದು, ಪಾತ್ರ ವರ್ಗದ ಆಯ್ಕೆಯ ಮೂಲಕ ಬಿಟೌನ್‌ ಅಂಗಳದಲ್ಲಿ ಸದ್ದು ಮಾಡಿದೆ.

2022 ರಲ್ಲಿ ಸಂಜಯ್‌ ಲೀಲಾ ಬನ್ಸಾಲಿ ಆಲಿಯಾ ಭಟ್‌ ಅವರೊಂದಿಗೆ ʼ ಗಂಗೂಬಾಯಿ ಕಾಥಿಯಾವಾಡಿʼ ಸಿನಿಮಾವನ್ನು ಮಾಡಿದ್ದರು. ಈ ಸಿನಿಮಾಕ್ಕೆ ಮೆಚ್ಚುಗೆ ವ್ಯಕ್ತವಾಗುವುದರ ಜೊತೆಗೆ ಹಲವು ಪ್ರಶಸ್ತಿಗಳು ಕೂಡ ಬಂದಿದ್ದವು. ಇದೀಗ ಅವರು ತಮ್ಮ ಮುಂದಿನ ಸಿನಿಮಾವನ್ನು ಅನೌನ್ಸ್‌ ಮಾಡಿದ್ದಾರೆ.

ಸಂಜಯ್‌ ಲೀಲಾ ಬನ್ಸಾಲಿ ಅವರ ಸಿನಿಮಾದಲ್ಲಿ ಪ್ರೀತಿ – ಪ್ರೇಮ ಅಂಶವಿದ್ದೇ ಇರುತ್ತದೆ. ಪ್ರಣಯವನ್ನು ತಮ್ಮದೇ ಆಯಾಮದಲ್ಲಿ ಕಟ್ಟಿಕೊಡುವ ಅವರು, ಈ ಬಾರಿಯೂ ಹೊಸ ಪ್ರೇಮ ಕಥೆಯೊಂದಿಗೆ ಸಿನಿಮಾವನ್ನು ಅನೌನ್ಸ್‌ ಮಾಡಿದ್ದಾರೆ. ʼಲವ್‌ & ವಾರ್‌ʼ ಎಂದು ಸಿನಿಮಾಕ್ಕೆ ಟೈಟಲ್‌ ಇಡಲಾಗಿದ್ದು, ಪ್ರೀತಿಯಲ್ಲಿ ಯುದ್ಧದ ಕಥೆಯನ್ನು ಹೇಳಲಿದ್ದಾರೆ.

ಈ ಸಿನಿಮಾದಲ್ಲಿ ರಣ್ಬೀರ್‌ ಕಪೂರ್‌, ಅವರ ಪತ್ನಿ ಆಲಿಯಾ ಭಟ್‌ ಹಾಗೂ ವಿಕ್ಕಿ ಕೌಶಲ್‌ ಪ್ರಧಾನ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎನ್ನುವುದನ್ನು ಸಿನಿಮಾದ ಟೈಟಲ್‌ ಪೋಸ್ಟರ್‌ ನಲ್ಲಿ ತಿಳಿಸಲಾಗಿದೆ.

ಸಿನಿಮಾದ ಕಥೆಯ ಬಗ್ಗೆ ಇನ್ನಷ್ಟೇ ಹೆಚ್ಚಿನ ಮಾಹಿತಿ ಹೊರಬೀಳಬೇಕಿದ್ದು, ಮುಂದಿನ ವರ್ಷದ (2025 ರ) ಕ್ರಿಸ್ಮಸ್‌ ಹಬ್ಬಕ್ಕೆ ಸಿನಿಮಾ ರಿಲೀಸ್‌ ಆಗಲಿದೆ. ಇದೇ ವೇಳೆ ಸಿನಿಮಾ ಹಾಲಿವುಡ್‌ ನ ʼಅವತಾರ್‌ -3 ʼ ಸಿನಿಮಾ ಕೂಡ ತೆರೆ ಕಾಣಲಿದೆ.

2007 ರಲ್ಲಿ ಸಂಜಯ್‌ ಲೀಲಾ ಬನ್ಸಾಲಿ ಅವರು ರಣ್ಬೀರ್‌ ಕಪೂರ್‌ ಅವರೊಂದಿಗೆ ʼ ಸಾವರಿಯಾʼ ಸಿನಿಮಾ ಮಾಡಿದ್ದರು. ಇದು ರಣ್ಬೀರ್‌ ಮೊದಲ ಸಿನಿಮಾವಾಗಿತ್ತು. ಇದೀಗ 17 ವರ್ಷದ ಬಳಿಕ ರಣ್ಬೀರ್‌ ಅವರೊಂದಿಗೆ ಸಂಜಯ್‌ ಲೀಲಾ ಮತ್ತೆ ಸಿನಿಮಾ ಮಾಡುತ್ತಿದ್ದಾರೆ.