ರೆಡ್ ಸೀ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವ: ಶಾರುಖ್ ಖಾನ್ ರಿಗೆ ಗೌರವ ಪ್ರಶಸ್ತಿ

Team Udayavani, Nov 21, 2022, 5:36 PM IST

ನವದೆಹಲಿ: ಸೌದಿ ಅರೇಬಿಯಾದಲ್ಲಿ ನಡೆಯುತ್ತಿರುವ ರೆಡ್ ಸೀ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವದ ಎರಡನೇ ಆವೃತ್ತಿಯಲ್ಲಿ ಬಾಲಿವುಡ್ ಸೂಪರ್ ಸ್ಟಾರ್ ಶಾರುಖ್ ಖಾನ್ ಗೌರವ ಪ್ರಶಸ್ತಿ ಸ್ವೀಕರಿಸಲಿದ್ದಾರೆ.

ಚಲನಚಿತ್ರೋದ್ಯಮಕ್ಕೆ ಶಾರುಖ್ ಖಾನ್ ಅವರ ಅಸಾಧಾರಣ ಕೊಡುಗೆಗಾಗಿ ಗುರುತಿಸಲಾಗುತ್ತಿದೆ ಎಂದು ಉತ್ಸವದ ಸಂಘಟಕರು ಹೇಳಿಕೆಯಲ್ಲಿ ತಿಳಿಸಿದ್ದಾರೆ. ಕೆಂಪು ಸಮುದ್ರದ ಪೂರ್ವ ತೀರದಲ್ಲಿರುವ ಜೆಡ್ಡಾದಲ್ಲಿ ಡಿಸೆಂಬರ್ 1 ರಂದು ಉತ್ಸವದ ಉದ್ಘಾಟನಾ ಸಮಾರಂಭದಲ್ಲಿ ಅವರನ್ನು ಸನ್ಮಾನಿಸಲಾಗುವುದು.

“ರೆಡ್ ಸೀ ಅಂತರಾಷ್ಟ್ರೀಯ ಚಲನಚಿತ್ರೋತ್ಸವದಿಂದ ಈ ಪ್ರಶಸ್ತಿಯನ್ನು ಸ್ವೀಕರಿಸಲು ನನಗೆ ನಿಜವಾಗಿಯೂ ಗೌರವವಿದೆ. ನನ್ನ ಚಲನಚಿತ್ರಗಳಿಗೆ ಯಾವಾಗಲೂ ದೊಡ್ಡ ಬೆಂಬಲಿಗರಾಗಿರುವ ಸೌದಿ ಮತ್ತು ಪ್ರದೇಶದ ನನ್ನ ಅಭಿಮಾನಿಗಳ ನಡುವೆ ಇಲ್ಲಿರುವುದು ಅದ್ಭುತವಾಗಿದೆ. ಈ ಪ್ರದೇಶದ ಪ್ರತಿಭೆಯನ್ನು ಕೊಂಡಾಡಲು ಮತ್ತು ಅತ್ಯಾಕರ್ಷಕ ಚಲನಚಿತ್ರ ಸಮುದಾಯದ ಭಾಗವಾಗಲು ತಾನು ಎದುರು ನೋಡುತ್ತಿದ್ದೇನೆ ಎಂದು 57 ವರ್ಷದ ನಟ ಹೇಳಿದರು.

ಶಾರುಖ್ ಅವರು ಸೌದಿ ಅರೇಬಿಯಾದಲ್ಲಿ ತಮ್ಮ ಮುಂಬರುವ ಚಿತ್ರ “ಡಂಕಿ” ಚಿತ್ರೀಕರಣದಲ್ಲಿದ್ದಾರೆ ಎಂದು ವರದಿಯಾಗಿದೆ.

ರೆಡ್‌ಸೀಐಎಫ್‌ಎಫ್‌ನ ಸಿಇಒ ಮೊಹಮ್ಮದ್ ಅಲ್ ತುರ್ಕಿ ಅವರು ಖಾನ್ ಅವರನ್ನು “ಗಮನಾರ್ಹ ಪ್ರತಿಭೆ ಮತ್ತು ಜಾಗತಿಕ ಸೂಪರ್‌ಸ್ಟಾರ್” ಎಂದು ಶ್ಲಾಘಿಸಿದರು.

“ಅವರು ತಮ್ಮ ಆರಂಭಿಕ ಅಭಿನಯದಿಂದ ಪ್ರೇಕ್ಷಕರನ್ನು ಆಕರ್ಷಿಸಿದ್ದಾರೆ ಮತ್ತು ಇಂದು ಕೆಲಸ ಮಾಡುತ್ತಿರುವ ವಿಶ್ವದ ಅತ್ಯಂತ ಪ್ರಸಿದ್ಧ ನಟರಲ್ಲಿ ಒಬ್ಬರು. ಉದ್ಯಮದಲ್ಲಿ 30 ವರ್ಷಗಳ ನಂತರ, ಶಾರುಖ್ ಖಾನ್ ಭಾರತೀಯ ಚಿತ್ರರಂಗದ ಅತ್ಯಂತ ಯಶಸ್ವಿ ಸೂಪರ್‌ಸ್ಟಾರ್‌ಗಳಲ್ಲಿ ಒಬ್ಬರಾಗಿ ಉಳಿದಿದ್ದಾರೆ ಮತ್ತು ಪ್ರಪಂಚದಾದ್ಯಂತದ ಪ್ರೇಕ್ಷಕರಿಂದ ಪ್ರೀತಿಪಾತ್ರರಾಗಿದ್ದಾರೆ. ಈ ಡಿಸೆಂಬರ್‌ನಲ್ಲಿ ಅವರನ್ನು ಜಿದ್ದಾಗೆ ಸ್ವಾಗತಿಸಲು ನಾವು ಎದುರು ನೋಡುತ್ತಿದ್ದೇವೆ” ಎಂದು ತುರ್ಕಿ ಹೇಳಿದ್ದಾರೆ.

ಡಿಸೆಂಬರ್ 10 ರಂದು ಮುಕ್ತಾಯಗೊಳ್ಳಲಿರುವ ರೆಡ್ ಸೀ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವವು 41 ಭಾಷೆಗಳಲ್ಲಿ 61 ದೇಶಗಳ 131 ಚಲನಚಿತ್ರಗಳು ಮತ್ತು ಕಿರುಚಿತ್ರಗಳನ್ನು ಪ್ರಸ್ತುತಪಡಿಸಲಿದೆ.