ಸುಶಾಂತ್‌-ರಿಯಾ: ಜಾಲತಾಣದಲ್ಲಿ ಅತಿಹೆಚ್ಚು ಸರ್ಚ್‌ ಆದ ಹೆಸರು; ಯಾಹೂ ವರದಿಯಲ್ಲಿ ಉಲ್ಲೇಖ

Team Udayavani, Dec 2, 2020, 9:52 PM IST

ಮುಂಬೈ: ಬಾಲಿವುಡ್‌ ನಟ ದಿ.ಸುಶಾಂತ್‌ ಸಿಂಗ್‌ ರಜಪೂತ್‌, ಅವರ ಗೆಳತಿ ರಿಯಾ ಚಕ್ರವರ್ತಿ 2020ರಲ್ಲಿ ಜಾಲತಾಣಗಳಲ್ಲಿ ಹೆಚ್ಚು ಸರ್ಚ್‌ಗೆ ಒಳಗಾಗಿದ್ದವರು. ಅಂತರ್ಜಾಲ ತಾಣ ಯಾಹೂ ಈ ಅಂಶವನ್ನು ಬಿಡುಗಡೆ ಮಾಡಿದೆ. ಪ್ರತಿ ವರ್ಷ ಸಂಸ್ಥೆ ಯಾರನ್ನು ಹೆಚ್ಚಾಗಿ ಹುಡುಕಿದ್ದಾರೆ ಎಂಬ ಪಟ್ಟಿಯನ್ನು ಬಿಡುಗಡೆ ಮಾಡುತ್ತದೆ.

ಜೂನ್‌ನಲ್ಲಿ ನಿಧನರಾದ ಸುಶಾಂತ್‌ ಸಿಂಗ್‌ ರಜಪೂತ್‌ರ ಹೆಸರು ಈ ವರ್ಷ ಅತಿ ಹೆಚ್ಚು ಸರ್ಚ್‌ ಮಾಡಲಾದ ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿದೆ. ಸುಶಾಂತ್‌ ನಂತರದ ಸ್ಥಾನದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಇದ್ದಾರೆ. 2017ರ ನಂತರ ಇದೇ ಮೊದಲ ಬಾರಿ ಪ್ರಧಾನಿ ನರೇಂದ್ರ ಮೋದಿಯವರ ಹೆಸರು ಮೊದಲ ಸ್ಥಾನದಲ್ಲಿ ಇಲ್ಲ. ಆದರೆ “ಅತಿಹೆಚ್ಚು ಸುದ್ದಿ ಮಾಡಿದ’ ವ್ಯಕ್ತಿಗಳ ಪಟ್ಟಿಯಲ್ಲಿ ಮೋದಿ ಹೆಸರು ಮೊದಲ ಸ್ಥಾನದಲ್ಲಿದೆ.

ಇನ್ನು ಸುಶಾಂತ್‌ರ ಗರ್ಲ್ಫ್ರೆಂಡ್‌ ಆಗಿದ್ದ ರಿಯಾ ಚಕ್ರವರ್ತಿ ಯಾಹೂನಲ್ಲಿ ಅತಿಹೆಚ್ಚು ಹುಡುಕಲಾದ ಮಹಿಳಾ ಸೆಲೆಬ್ರಿಟಿಯಾಗಿದ್ದಾರೆ. ಎಂದಿನಂತೆ ಈ ಬಾರಿಯ ಪಟ್ಟಿಯಲ್ಲೂ ರಾಜಕಾರಣಿಗಳ ಜತೆಗೆ ಬಾಲಿವುಡ್‌ನ‌ ಖ್ಯಾತನಾಮರ ಹೆಸರುಗಳೂ ಇವೆ.

ಪಟ್ಟಿಯಲ್ಲಿ ಅಮಿತಾಭ್‌ ಬಚ್ಚನ್‌(9ನೇ ಸ್ಥಾನ), ಕಂಗನಾ(10), ದೀಪಿಕಾ(12), ಸನ್ನಿ ಲಿಯೋನ್‌(14), ಪ್ರಿಯಾಂಕಾ ಛೋಪ್ರಾ(15)ರಂಥ ಬಾಲಿವುಡ್‌ ಸೆಲೆಬ್ರಿಟಿಗಳ ಹೆಸರೂ ಇವೆ. ಇನ್ನು ಈ ಪಟ್ಟಿಯಲ್ಲಿ ಅಕ್ಷಯ್‌ ಕುಮಾರ್‌, ಸಲ್ಮಾನ್‌ ಖಾನ್‌, ಇರ್ಫಾನ್‌ ಖಾನ್‌, ರಿಷಿ ಕಪೂರ್‌, ಎಸ್‌ಪಿ ಬಾಲಸುಬ್ರಹ್ಮಣ್ಯಂ , ಸೋನು ಸೂದ್‌ ಹೆಸರುಗಳೂ ಇವೆ.