Tamannaah: “ಈ ಸಿನಿಮಾ ಸೋಲುತ್ತದೆ ಎಂದು ಶೂಟಿಂಗ್‌ ಸಮಯದಲ್ಲೇ ನನಗೆ ಗೊತ್ತಿತ್ತು”: ತಮನ್ನಾ

Team Udayavani, Jul 31, 2023, 12:22 PM IST

ಚೆನ್ನೈ: ಮಿಲ್ಕಿ ಬ್ಯೂಟಿ ತಮನ್ನಾ ʼ ಕಾವಾಲಾʼ ಹಾಡು ರಿಲೀಸ್‌ ಆದ ದಿನದಿಂದ ಟ್ರೆಂಡಿಂಗ್‌ ನಲ್ಲಿದ್ದಾರೆ. ʼಜೈಲರ್‌ʼ ಸಿನಿಮಾದ ಪ್ರಚಾರದ ಅಂಗವಾಗಿ ಅವರು ನಾನಾ ಸಂದರ್ಶನದಲ್ಲಿ ಭಾಗಿಯಾಗುತ್ತಿದ್ದು, ಇತ್ತೀಚೆಗೆ ನಡೆದ ಸಂದರ್ಶನದಲ್ಲಿ ಸಿನಿಮಾಗಳ ಸೋಲಿನ ಬಗ್ಗೆ ಮಾತನಾಡಿದ್ದಾರೆ.

ಇತ್ತೀಚೆಗಷ್ಟೇ ರಜಿನಿಕಾಂತ್‌ ಅವರ ʼಜೈಲರ್ʼ ಸಿನಿಮಾದ ಆಡಿಯೋ ಲಾಂಚ್‌ ಸಮಾರಂಭ ಅದ್ಧೂರಿಯಾಗಿ ನೆರವೇರಿದೆ. ಸಿನಿಮಾದ ಬಗ್ಗೆ ಹೈಪ್‌ ದಿನಕಳೆದಂತೆ ಹೆಚ್ಚಾಗುತ್ತಿದೆ. ʼಜೈಲರ್‌ʼ ಪ್ರಚಾರವೂ ಅಬ್ಬರದಿಂದ ಸಾಗುತ್ತಿದೆ.

ಸಿನಿಮಾ ಅಂದ ಮೇಲೆ ಪ್ರತಿಯೊಬ್ಬ ಸ್ಟಾರ್‌ ಜೀವನದಲ್ಲಿ ಸೋಲು – ಗೆಲುವಿನ ಲೆಕ್ಕಚಾರ ಕೌಂಟ್‌ ಆಗೇ ಆಗುತ್ತದೆ. ಒಂದು ಸಿನಿಮಾ ಸೋತರೆ ಅಭಿಮಾನಿಗಳಿಗೆ ನಿರಾಸೆ ಆಗುತ್ತದೆ. ಒಬ್ಬ ಸೂಪರ್‌ ಸ್ಟಾರ್‌ ನಟನ ಸಿನಿಮಾ ಸೋತರೆ ಫ್ಯಾನ್ಸ್‌ ಗಳೊಂದಿಗೆ ನಟಿಸಿದ ನಟನಿಗೂ ಹತಾಶೆ ಆಗುತ್ತದೆ.

ದಳಪತಿ ವಿಜಯ್‌ ಅವರ ವೃತ್ತಿ ಜೀವನದಲ್ಲಿ ದೊಡ್ಡ ಸೋಲು ಕೊಟ್ಟ ಸಿನಿಮಾಗಳನ್ನು ನೋಡಿದರೆ ಮೊದಲು ಬರುವ ಸಿನಿಮಾ ʼ ಸುರʼ. ಸಿನಿಮಾದ ಹಾಡುಗಳು ಸೂಪರ್‌ ಹಿಟ್‌ ಆದರೂ, ಸಿನಿಮಾ ಮಾತ್ರ ಜನರ ಮನದಲ್ಲಿ ಹೆಚ್ಚು ದಿನ ನಿಲಲ್ಲೇ ಇಲ್ಲ.

ಇದನ್ನೂ ಓದಿ: ಶ್ವಾನ ಸೇರಿದಂತೆ ಮಕ್ಕಳ ಆಶ್ಲೀಲ ವಿಡಿಯೋ ಚಿತ್ರೀಕರಣ: ಅಸಭ್ಯ ವರ್ತನೆಯ ಮಹಿಳೆ ಬಂಧನ

ಸಿನಿಮಾದಲ್ಲಿ ನಾಯಕಿಯಾಗಿ ನಟಿಸಿದ್ದ ತಮನ್ನಾ ʼಸುರʼ ಸೋಲಿನ ಬಗ್ಗೆ ʼ ಗಲಾಟ್ಟಾʼ ಸಂದರ್ಶನದಲ್ಲಿ ಮಾತನಾಡಿದ್ದಾರೆ.

“ನನಗೆ ʼಸುರʼ ಸಿನಿಮಾ ಇಷ್ಟವಾಯಿತು. ಆದರೆ ಅದರಲ್ಲಿನ ಕೆಲ ಸೀನ್‌ ಗಳಲ್ಲಿ ನನ್ನ ಅಭಿನಯ ಇಷ್ಟವಾಗಿಲ್ಲ. ತುಂಬಾ ಕೆಟ್ಟದಾಗಿ ನಾನು ಅಭಿನಯಿಸಿದೆ. ಸಿನಿಮಾದ ಹಾಡುಗಳು ಹಿಟ್‌ ಆಗಿವೆ. ಆದರೆ ʼಸುರʼ ಸಿನಿಮಾದಲ್ಲಿ ನಾನು ಚೆನ್ನಾಗಿ ನಟಿಸಿಲ್ಲ ಎಂದು ನನಗೆ ಅನ್ನಿಸಿತ್ತು.” ಎಂದರು.

ʼಸುರʼ ಬಾಕ್ಸ್‌ ಆಫೀಸ್‌ ನಲ್ಲಿ ಸೋತ ಬಗ್ಗೆ ಮಾತನಾಡಿದ ಅವರು “ಈ ಸಿನಿಮಾ ಓಡುವುದಿಲ್ಲ ಎಂದು ನನಗೆ ಶೂಟಿಂಗ್‌ ವೇಳೆಯೇ ಮನಸ್ಸಿನಲ್ಲಿ ಅನಿಸಲು ಶುರುವಾಗಿತ್ತು. ಕೆಲ ಸಿನಿಮಾಗಳು ಹಿಟ್‌ ಆಗುವುದಿಲ್ಲ ಎಂದು ನಿಮಗೆ ಮೊದಲೇ ಅನ್ನಿಸಿರುತ್ತದೆ. ಆದರೆ ನಿಮ್ಮ ಬದ್ಧತೆಗಾಗಿ ಅದನ್ನು ನೀವು ಮಾಡಬೇಕಾಗುತ್ತದೆ. ಎಲ್ಲವೂ ಸೋಲು – ಗೆಲುವೇ ಅಲ್ಲ. ಸಿನಿಮಾರಂಗ ಎನ್ನುವುದು ದುಬಾರಿ ಕಲಾ ಪ್ರಕಾರವಾಗಿದೆ. ಆದ್ದರಿಂದ ನಾವು ಜವಾಬ್ದಾರರಾಗಿರಬೇಕು. ಇದು ಕೆಲಸದ ಒಂದು ಭಾಗವಾಗಿದೆ.”  ಎಂದು ನಟಿ ಹೇಳಿದರು.

2010 ರಲ್ಲಿ ಬಂದ ʼಸುರʼ ಆ್ಯಕ್ಷನ್ ಕಾಮಿಡಿ ಚಿತ್ರವಾಗಿದ್ದು, ಎಸ್ಪಿ ರಾಜಕುಮಾರ್ ನಿರ್ದೇಶನ ಮಾಡಿದ್ದರು. ಸಿನಿಮಾಕ್ಕೆ ದೊಡ್ಡ ಮಟ್ಟದ ನೆಗೆಟಿವ್ ರೆಸ್ಪಾನ್ಸ್‌  ಕೇಳಿಬಂದಿತ್ತು. ಚಿತ್ರಕ್ಕೆ ಹಾಕಿದ ಬಜೆಟ್‌ ಮಾತ್ರ ವಾಪಾಸ್‌ ಬಂತು ಎಂದು ನಿರ್ಮಾಪಕ ಸಂಗಿಲಿ ಮುರುಗನ್ ಹೇಳಿದ್ದರು.