ಟಾಲಿವುಡ್‌ ನ ಜನಪ್ರಿಯ ಹಾಸ್ಯನಟ ಅಲ್ಲು ರಮೇಶ್‌ ನಿಧನ

Team Udayavani, Apr 19, 2023, 11:34 AM IST

ಹೈದರಾಬಾದ್: ಟಾಲಿವುಡ್‌ ನ ಜನಪ್ರಿಯ ಹಾಸ್ಯನಟ ಅಲ್ಲು ರಮೇಶ್‌ (52)  ಮಂಗಳವಾರ ಕೊನೆಯುಸಿರೆಳೆದಿದ್ದಾರೆ.

ವಿಶಾಖಪಟ್ಟಣನಲ್ಲಿನ ತಮ್ಮ ನಿವಾಸದಲ್ಲಿ ಅವರಿಗೆ ಹೃದಯ ಸ್ತಂಭನ (ಕಾರ್ಡಿಯಾಕ್ ಅರೆಸ್ಟ್) ಉಂಟಾಗಿ ಅವರು ನಿಧನರಾಗಿದ್ದಾರೆ. ಅವರ ನಿಧನ ಸುದ್ದಿಯನ್ನು ನಿರ್ದೇಶಕ ಆನಂದ್‌ ರವಿ ಅವರು ಹಂಚಿಕೊಂಡು ತಿಳಿಸಿದ್ದಾರೆ.

“ಮೊದಲ ದಿನದಿಂದ ನೀವು ನನಗೆ ದೊಡ್ಡ ಬೆಂಬಲವಾಗಿದ್ದೀರಿ. ನನ್ನ ತಲೆಯಲ್ಲಿ ಇನ್ನೂ ನಿಮ್ಮ ಧ್ವನಿಯನ್ನು ಕೇಳುತ್ತಿದ್ದೇನೆ. ನಿಮ್ಮ ನಿಧನವನ್ನು ಅರಗಿಸಿಕೊಳ್ಳಲು ಸಾಧ್ಯವಾಗುತ್ತಿಲ್ಲ. ನೀವು ನನ್ನಂತೆಯೇ ಹಲವಾರು ಹೃದಯಗಳನ್ನು ಮುಟ್ಟಿದ್ದೀರಿ. ಮಿಸ್ ಯು. ಓಂ ಶಾಂತಿ.” ಎಂದು ಬರೆದುಕೊಂಡಿದ್ದಾರೆ.

‘ಚಿರುಜಲ್ಲು’ ಸಿನಿಮಾದಲ್ಲಿನ ನಟನೆ ಮೂಲಕ ಟಾಲಿವುಡ್‌ ಗೆ ಎಂಟ್ರಿ ಕೊಟ್ಟ ಅಲ್ಲು ರಮೇಶ್‌, ಸುಮಾರು 50 ಚಿತ್ರಗಳಲ್ಲಿ ನಟಿಸಿದ್ದಾರೆ.

‘ತೋಳು ಬೊಮ್ಮಲತಾ,’ ‘ಮಥುರಾ ವೈನ್ಸ್,’ ‘ವೀಧಿ,’ ‘ಬ್ಲೇಡ್ ಬಾಬ್ಜಿ,’ ‘ನೆಪೋಲಿಯನ್’ ‘ಕೇರಿಂಥಾ’ ಮುಂತಾದ ಸಿನಿಮಾದಲ್ಲಿ ನಟಿಸಿದ್ದಾರೆ.

ಇತ್ತೀಚೆಗೆ ಬಂದ ಹಿಟ್ ವೆಬ್ ಸಿರೀಸ್ ‘ಮಾ ವಿದಕುಲು’ ನಲ್ಲಿ ನಟಿಯ ತಂದೆಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ‘ನೆಪೋಲಿಯನ್’ ಮತ್ತು ‘ತೊಳುಬೊಮ್ಮಲತಾ’ ಚಿತ್ರಗಳು ಅವರಿಗೆ ಮೆಚ್ಚುಗೆ ಮತ್ತು ಮನ್ನಣೆಯನ್ನು ತಂದುಕೊಟ್ಟ ಸಿನಿಮಾಗಳು.

ಟಾಲಿವುಡ್‌ ಕಲಾವಿದರು ಸೇರಿದಂತೆ ಅಪಾರ ಅಭಿಮಾನಿಗಳು ಅವರ ನಿಧನಕ್ಕೆ ಸಂತಾಸ ಸೂಚಿಸಿದ್ದಾರೆ.