ಅಪ್ರಾಪ್ತ ಬಾಲಕಿ ಮೇಲೆ ರೇಪ್ ಪ್ರಕರಣ; ಟಿವಿ ನಟ ವಿ.ಪುರಿಗೆ ಕೋರ್ಟ್ ನಿಂದ ಜಾಮೀನು

Team Udayavani, Jun 5, 2021, 5:18 PM IST

ಮುಂಬಯಿ: ಅಪ್ರಾಪ್ತ ಬಾಲಕಿ ಮೇಲೆ ಅತ್ಯಾಚಾರ ಎಸಗಿದ ಆರೋಪದ ಮೇಲೆ ಬಂಧಿಸಲ್ಪಟ್ಟು, 7 ದಿನಗಳ ನ್ಯಾಯಾಂಗ ಬಂಧನಕ್ಕೆ ಒಳಗಾಗಿದ್ದ ಬಾಲಿವುಡ್ ಕಿರುತೆರೆಯ ಜನಪ್ರಿಯ ನಟ ಪರ್ಲ್ ವಿ ಪುರಿಗೆ ಕೋರ್ಟ್ ಜಾಮೀನು ನೀಡಿರುವುದಾಗಿ ವರದಿ ತಿಳಿಸಿದೆ.

ಅತ್ಯಾಚಾರ ಆರೋಪದಲ್ಲಿ ನಟ ಪುರಿಯನ್ನು ಮುಂಬಯಿ ಪೊಲೀಸರು ಶುಕ್ರವಾರ(ಜೂನ್ 04) ಬಂಧಿಸಿದ್ದರು. ಈ ಸುದ್ದಿ ಪುರಿ ಅಭಿಮಾನಿಗಳು ಮತ್ತು ಟಿವಿ ಸಹೋದ್ಯೋಗಿಗಳಲ್ಲಿ ಅಪನಂಬಿಕೆ, ದಿಗಿಲು ಮೂಡಿಸಿರುವುದಾಗಿ ವರದಿ ವಿವರಿಸಿತ್ತು.

ಅಪ್ರಾಪ್ತ ಬಾಲಕಿ ಮೇಲೆ ಅತ್ಯಾಚಾರ ಎಸಗಿದ ನಟ ಪರ್ಲ್ ವಿ ಪುರಿ ವಿರುದ್ಧ ಐಪಿಸಿ ಸೆಕ್ಷನ್ 376 (ರೇಪ್) ಹಾಗೂ 2012ರ ಪೋಕ್ಸೊ ಕಾಯ್ದೆಯಡಿ ಪ್ರಕರಣ ದಾಖಲಿಸಿದ್ದು, ವಶಕ್ಕೆ ಪಡೆಯಲಾಗಿದೆ ಎಂದು ಮೀರಾ ಭಾಯಂದರ್ ವಸೈ ವಿರಾರ್ ವಲಯದ ಡಿಜಿಪಿ ಸಂಜಯ್ ಪಾಟೀಲ್ ತಿಳಿಸಿದ್ದರು.

ಟಿವಿ ಸೀರಿಯಲ್ ನಲ್ಲಿ ಕೆಲಸ ಕೊಡಿಸಲು ತನ್ನೊಂದಿಗೆ ಲೈಂಗಿಕ ಸಂಪರ್ಕ ನಡೆಸಬೇಕು ಎಂದು ಒತ್ತಾಯಿಸಿ ಅತ್ಯಾಚಾರ ಎಸಗಿರುವುದಾಗಿ ಅಪ್ರಾಪ್ತ ಬಾಲಕಿ ನಟ ಪರ್ಲ್ ಪುರಿ ವಿರುದ್ಧ ದೂರು ನೀಡಿರುವುದಾಗಿ ವಿವರಿಸಿದ್ದರು.

ಏಕ್ತಾ ಕಪೂರ್ ನಿರ್ಮಾಣದ ಹಿಂದಿಯ ನಾಗಿನ್ 3 ಮತ್ತು ಬೆಪನಾ ಪ್ಯಾರ್ ಧಾರವಾಹಿ ಪರ್ಲ್ ಪುರಿಗೆ ಸ್ಟಾರ್ ಗಿರಿ ತಂದು ಕೊಟ್ಟಿತ್ತು. 2013ರಲ್ಲಿ ತೆರೆಕಂಡಿದ್ದ ಟಿವಿ ಶೋ ದಿಲ್ ಕಿ ನಜರ್ ಸೇ ಖೂಬ್ ಸೂರತ್ ಧಾರವಾಹಿಯಲ್ಲಿ ಪರ್ಲ್ ಪುರಿ ನಟಿಸುವ ಮೂಲಕ ಕಿರುತೆರೆ ಪ್ರವೇಶಿಸಿದ್ದರು. ನಂತರ ಹಲವಾರು ಸೀರಿಯಲ್ ಗಳಲ್ಲಿ ನಟಿಸಿದ್ದರು.