Bigg Boss: ಮೂರು ವರ್ಷದ ಬಳಿಕ ತಂದೆ – ತಾಯಿ ಭೇಟಿ; ಅವ್ವಾ..ಎನ್ನುತ್ತಾ ಓಡೋಡಿ ಬಂದ ಪ್ರತಾಪ್

Team Udayavani, Dec 28, 2023, 11:14 AM IST

ಬೆಂಗಳೂರು: ಬಿಗ್‌ ಬಾಸ್‌ ಕನ್ನಡ ಸೀಸನ್‌ 10 ಕಾರ್ಯಕ್ರಮದಲ್ಲಿ ಈ ವಾರ ದೊಡ್ಮನೆಗೆ ಸ್ಪರ್ಧಿಗಳ ಮನೆಯವರು ಬಂದಿದ್ದಾರೆ. ಹತ್ರ ಹತ್ರ ತಿಂಗಳು ಮನೆಯವರ ಅಪ್ಪುಗೆಯಿಂದ ದೂರವಿದ್ದ ಸ್ಪರ್ಧಿಗಳಿಗೆ ಬಿಗ್‌ ಬಾಸ್‌ ಸರ್ಪ್ರೈಸ್‌ ನೀಡಿದ್ದಾರೆ.

ಈಗಾಗಲೇ ನಮೃತಾ, ಕಾರ್ತಿಕ್‌, ತುಕಾಲಿ ಸಂತು, ವರ್ತೂರು ಸಂತೋಷ್‌, ಸಂಗೀತಾ ಹಾಗೂ ಸಿರಿ ಅವರ ಮನೆಯವರು ಬಿಗ್‌ ಬಾಸ್‌ ಮನೆಗೆ ಬಂದು ತಮ್ಮವರ ಜೊತೆ ಮಾತನಾಡಿ, ಮನೆಯವರೊಂದಿಗೆ ಒಂದಷ್ಟು ಹೊತ್ತು ಹರಟೆ ಹೊಡೆದು, ಮುಂದಿನ ಕ್ಯಾಪ್ಟನ್‌ ಯಾರಾಗಬೇಕೆನ್ನುವ ತಮ್ಮ ಅಭಿಪ್ರಾಯವನ್ನು ಹೇಳಿ ಹೋಗಿದ್ದಾರೆ.

ಇಂದಿನ ಸಂಚಿಕೆಯಲ್ಲಿ ಅಪ್ಪ – ಅಮ್ಮನಿಂದ ಕಳೆದ ಮೂರು ವರ್ಷಗಳಿಂದ ದೂರು ಡ್ರೋನ್‌ ಪ್ರತಾಪ್‌ ಅವರು ಭಾವುಕರಾಗಿ ಕೂರುವುದನ್ನು ಪ್ರೋಮೊದಲ್ಲಿ ತೋರಿಸಲಾಗಿದೆ. ಊಟ – ನೀರು ಬಿಟ್ಟು ತಂದೆ – ತಾಯಿಯ ಬರುವಿಕೆಗಾಗಿ ಕಾದು ಕುಳಿತ ಪ್ರತಾಪ್‌ ಅವರಿಗೆ ಬಿಗ್ ಬಾಸ್‌ ನಿರಾಸೆ ಮಾಡಿಲ್ಲ.

ಮಗನ ಹೆಸರನ್ನು ಕರೆದ ತಕ್ಷಣ “ಅವ್ವಾ..” ಎನ್ನುತ್ತಾ ಭಾವುಕ ಧ್ವನಿಯಿಂದ ಓಡೋಡಿ ಬರುವ ಪ್ರತಾಪ್‌ ನನ್ನು ಪ್ರೋಮೊದಲ್ಲಿ ತೋರಿಸಲಾಗಿದೆ.

ಪ್ರೋಮೊ ನೋಡಿದ ಪ್ರೇಕ್ಷಕರು ಪ್ರತಾಪ್‌ ಅವರ ಭಾವುಕ ಕ್ಷಣವನ್ನು ನೋಡಿ, ಅವರ ಬೆಂಬಲಕ್ಕೆ ನಿಂತಿದ್ದು, ಪ್ರತಾಪ್‌ ಬಿಗ್‌ ಬಾಸ್‌ ಗೆಲ್ಲಬೇಕೆಂದು ಕಮೆಂಟ್‌ ಮಾಡಿದ್ದಾರೆ. ಇದು ಸಿಂಪತಿ ಅಲ್ಲ ನಿಜವಾದ ಭಾವ ಎಂದು ಕೆಲವರು ಕಮೆಂಟ್‌ ಮಾಡಿದ್ದಾರೆ.

ಪ್ರತಾಪ್‌ ಅವರ ʼಡ್ರೋನ್‌ʼ ವಿಚಾರ ನಡೆದ ಬಳಿಕ ಅವರು ತಂದೆ – ತಾಯಿಯಿಂದ ದೂರವಾಗಿದ್ದರು. ಹಳ್ಳಿಯ ಜನ ಹಾಗೂ ಕೆಲವರು ತನ್ನ ಮನೆಯವರಿಗೆ ನನ್ನ ಬಗ್ಗೆ ಇಲ್ಲಸಲ್ಲದ್ದನ್ನು ಹೇಳಿಕೊಟ್ಟಿದ್ದಾರೆ. ಈ ಕಾರಣದಿಂದ ಮೂರು ವರ್ಷಗಳಿಂದ ನಾನು ಮನೆಯವರ ಜೊತೆ ಮಾತನಾಡದೆ ದೂರವಾಗಿದ್ದೇನೆ ಎಂದು ಬಿಗ್‌ ಬಾಸ್‌ ಕಾರ್ಯಕ್ರಮದಲ್ಲಿ ಹೇಳಿದ್ದರು. ಪ್ರತಾಪ್ ಅವರ ತಂದೆ ಮಗನ ಜೊತೆ ಫೋನ್‌ ನಲ್ಲಿ ಮಾತನಾಡಿದ್ದರು.

ಇದೀಗ ಮೂರು ವರ್ಷದ ಬಳಿಕ ತಂದೆ – ತಾಯಿಯನ್ನು ಪ್ರತಾಪ್‌ ಭೇಟಿ ಆಗಿದ್ದಾರೆ. ಅಪ್ಪ – ಮಗನ ಭೇಟಿಯನ್ನು ನೋಡಿ ಮನೆಯ ಇತರೆ ಸ್ಪರ್ಧಿಗಳು ಕೂಡ ಭಾವುಕರಾಗಿದ್ದಾರೆ.