Actor Surya: ಶಿವಣ್ಣ ಜೊತೆ ಸ್ಪರ್ಧೆಯಿಲ್ಲ; ತಮಿಳು ನಟ ಸೂರ್ಯ ಸ್ಪಷ್ಟನೆ  

Team Udayavani, Nov 6, 2024, 1:20 PM IST

ಸ್ಟಾರ್‌ ನಟರ ಸಿನಿಮಾಗಳು ಒಂದೇ ದಿನದಂದು ಬಿಡುಗಡೆಯಾಗುವುದು ಲಾಭ-ನಷ್ಟದ ಲೆಕ್ಕಾಚಾರವಾಗುತ್ತದೆ. ಜೊತೆಗೆ ಪ್ರೇಕ್ಷಕರಿಗೂ ಯಾವ ಸಿನಿಮಾ ನೋಡಬೇಕೆಂಬ ಗೊಂದಲವೂ ಆಗುತ್ತದೆ. ಈಗ ಅಂಥದ್ದೇ ಒಂದು ಗೊಂದಲ ಸೃಷ್ಟಿಯಾಗಿದೆ.

ನವೆಂಬರ್‌ 14ರಂದು ತಮಿಳು ನಟ ಸೂರ್ಯ ಅವರ ಪ್ಯಾನ್‌ ಇಂಡಿಯಾ ಸಿನಿಮಾ “ಕಂಗುವಾ’ ಹಾಗೂ ನವೆಂಬರ್‌ 15ರಂದು ನಟ ಶಿವರಾಜಕುಮಾರ್‌ ಅವರ “ಭೈರತಿ ರಣಗಲ್‌’ ಒಂದು ದಿನದ ಅಂತರದಲ್ಲಿ ಬಿಡುಗಡೆಗೊಳ್ಳುತ್ತಿವೆ. ಭೈರತಿ ರಣಗಲ್‌ ಸಿನಿಮಾಗೆ ಸ್ಪರ್ಧೆ ನೀಡಲು ಸೂರ್ಯ ಹೀಗೆ ಮಾಡಿದ್ದಾರೆ ಎಂಬ ಮಾತುಗಳು ಅಲ್ಲಲ್ಲಿ ಕೇಳಿಬಂದಿದ್ದು, ಇದಕ್ಕೆ ಸ್ವತಃ ಅವರೇ ಸ್ಪಷ್ಟನೆ ನೀಡಿದ್ದಾರೆ.

“ಕಂಗುವ’ ಒಂದು ಪ್ಯಾನ್‌ ಇಂಡಿಯಾ ಚಿತ್ರ. ಎಲ್ಲಾ ರಾಜ್ಯಗಳಲ್ಲೂ ಒಟ್ಟಿಗೆ ಬಿಡುಗಡೆ ಬಿಡುಗಡೆಯಾಗುತ್ತಿದೆ. ಯಾವುದೇ ಕಾರಣಕ್ಕೂ ಶಿವರಾಜಕುಮಾರ್‌ ಅವರ “ಭೈರತಿ ರಣಗಲ್’ ಚಿತ್ರಕ್ಕೆ ಸ್ಪರ್ಧೆ ಒಡ್ಡುವುದಕ್ಕೆ ನಾವು ಈ ಚಿತ್ರವನ್ನು ಅದೇ ಹೊತ್ತಿಗೆ ಬಿಡುಗಡೆ ಮಾಡುತ್ತಿಲ್ಲ. ಶಿವಣ್ಣ ನನ್ನ ಅಣ್ಣನ ತರಹ. ಹಬ್ಬ ಅಥವಾ ರಜಾ ದಿನಗಳ ಸಂದರ್ಭದಲ್ಲಿ ಒಟ್ಟೊಟ್ಟಿಗೆ ಹಲವು ಚಿತ್ರಗಳು ಬಿಡುಗಡೆಯಾಗುತ್ತವೆ. ದೀಪಾವಳಿಗೆ “ಸಿಂಗಂ ಅಗೇನ್‌’ ಮತ್ತು “ಭೂಲ್‌ ಬುಲಯ್ಯಾ 3′ ಚಿತ್ರಗಳು ಒಟ್ಟಿಗೆ ಬಿಡಗುಡೆಯಾಗಿ 100 ಕೋಟಿ ರೂ. ಗಳಿಕೆ ಮಾಡಿವೆ. ಒಂದು ಚಿತ್ರದಿಂದ ಇನ್ನೊಂದು ಚಿತ್ರಕ್ಕೆ ಸಮಸ್ಯೆಯಾಗುವುದಿಲ್ಲ ಎಂದು ಸ್ಪಷ್ಟನೆ ನೀಡಿದ್ದಾರೆ.