ಇಂಡಿಯನ್‌ -2, ಥಗ್‌ ಲೈಫ್..‌ ಮುಂದಿನ ಮೂರು ಚಿತ್ರಗಳ ಅಪ್ಡೇಟ್‌ ಹಂಚಿಕೊಂಡ ಕಮಲ್‌ ಹಾಸನ್

Team Udayavani, Mar 25, 2024, 11:05 AM IST

ಚೆನ್ನೈ: ಕಾಲಿವುಡ್‌ ನಟ‌ ಕಮಲ್‌  ಹಾಸನ್ ʼವಿಕ್ರಮ್‌ʼ ಸಿನಿಮಾದ ಬಳಿಕ ಬಹು ನಿರೀಕ್ಷಿತ ಸಿನಿಮಾಗಳ ಶೂಟಿಂಗ್‌ ನಲ್ಲಿ ಬ್ಯುಸಿಯಾಗಿದ್ದಾರೆ. ವಿಕ್ರಮ್‌ ಸಿನಿಮಾ ದೊಡ್ಡ ಹಿಟ್‌ ಆದ ಬಳಿಕ ಕಮಲ್‌  ಹಾಸನ್ ಅವರ ಮುಂದಿನ ಚಿತ್ರಗಳನ್ನು ನೋಡಲು ಫ್ಯಾನ್ಸ್‌ ತುದಿಗಾಲಲ್ಲಿ ನಿಂತು ಕಾಯುತ್ತಿದ್ದಾರೆ.

ಅವರು ʼಇಂಡಿಯನ್‌ -2ʼ ಹಾಗೂ ʼ ಥಗ್ ಲೈಫ್’ ಸಿನಿಮಾದಲ್ಲಿ ಕಾಣಿಸಿಕೊಳ್ಳುತ್ತಿರುವುದು ಗೊತ್ತೇ ಇದೆ. ಪ್ರಭಾಸ್‌ ಅವರ ಮಲ್ಟಿಸ್ಟಾರ್ಸ್‌ ʼ ‘ಕಲ್ಕಿ 2898 ಎಡಿʼ ಸಿನಿಮಾದಲ್ಲೂ ಅವರು ಪ್ರಮುಖ ಪಾತ್ರವನ್ನು ಮಾಡಲಿದ್ದಾರೆ.

ಈ ಮೂರು ಸಿನಿಮಾಗಳ ಬಗ್ಗೆ ಕಮಲ್‌ ಹಾಸನ್‌ ಅಪ್ಡೇಟ್‌ ವೊಂದನ್ನು ನೀಡಿದ್ದಾರೆ. ʼದಿ ಹಿಂದೂʼ ಜೊತೆಗಿನ ಇತ್ತೀಚೆಗಿನ ಸಂದರ್ಶನದಲ್ಲಿ ಮಾತನಾಡಿರುವ ಅವರು, “ಕಳೆದುಹೋದ ಸಮಯವನ್ನು ನಾನು ಸರಿದೂಗಿಸಲು ಸಾಧ್ಯವಿಲ್ಲ. ನಾವು ‘ಇಂಡಿಯನ್ 2’ ಮತ್ತು ‘ಇಂಡಿಯನ್ 3’ ಅನ್ನು ಪೂರ್ಣಗೊಳಿಸಿದ್ದೇವೆ. ಸದ್ಯ ‘ಇಂಡಿಯನ್ 2’ ಚಿತ್ರದ ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳು ನಡೆಯುತ್ತಿವೆ. ನಾವು ಅದನ್ನು ಮುಗಿಸಿದ ನಂತರ ನಾವು ‘ಇಂಡಿಯನ್ 3’ ಪೋಸ್ಟ್-ಪ್ರೊಡಕ್ಷನ್ ಕೆಲಸವನ್ನು ಪ್ರಾರಂಭಿಸುತ್ತೇವೆ” ಎಂದಿದ್ದಾರೆ.

ಮಣಿರತ್ನಂ ಅವರ ʼಥಗ್‌ ಲೈಫ್‌ʼ ಸಿನಿಮಾದ ಬಗ್ಗೆ ಮಾತನಾಡಿದ ಅವರು, “ಚುನಾವಣೆಯ ಕ್ಯಾಂಪೇನ್‌ ಮುಗಿದ ಬಳಿಕ ʼಥಗ್‌ ಲೈಫ್‌ʼ ಸಿನಿಮಾದ ಚಿತ್ರೀಕರಣ ಶೀಘ್ರವಾಗಿ ಆರಂಭವಾಗುತ್ತದೆ. ಇದಲ್ಲದೇ ನಾನು ‘ಕಲ್ಕಿ 2898 AD’ ಎಂಬ ಚಿತ್ರದಲ್ಲಿ ಅತಿಥಿ ಪಾತ್ರವನ್ನು ಮಾಡಿದ್ದೇನೆ” ಎಂದು ಹೇಳಿದ್ದಾರೆ.

ಸದ್ಯ ಕಮಲ್‌ ಹಾಸನ್‌ ಮುಂಬರುವ ಲೋಕಸಭೆ ಚುನಾವಣೆಯಲ್ಲಿ ಆಡಳಿತಾರೂಢ ಪಕ್ಷವಾದ ಡಿಎಂಕೆ ಪರ ಪ್ರಚಾರ ಮಾಡಲು ಸಜ್ಜಾಗಿದ್ದಾರೆ.

ಕಮಲ್ ಹಾಸನ್ ತಮ್ಮ ಮಗಳು ಶ್ರುತಿ ಹಾಸನ್ ಅವರೊಂದಿಗೆ ‘ಇನಿಮೆಲ್’ ಶೀರ್ಷಿಕೆಯ ಮ್ಯೂಸಿಕ್ ವಿಡಿಯೋ ಹಾಡಿಗೆ ಸಾಹಿತ್ಯ ಬರೆದಿದ್ದಾರೆ. ಈ ಹಾಡಿನಲ್ಲಿ ನಿರ್ದೇಶಕ ಲೋಕೇಶ್ ಕನಕರಾಜ್ ಜೊತೆಗೆ ಶ್ರುತಿ ಈ ಹಾಡಿಗೆ ಸಂಗೀತ ಸಂಯೋಜನೆ ಮಾಡಿ ನಟಿಸಿದ್ದಾರೆ. ಹಾಡು ಇಂದು (ಮಾರ್ಚ್ 25 ರಂದು) ಯೂಟ್ಯೂಬ್‌ನಲ್ಲಿ ಬಿಡುಗಡೆಯಾಗಲಿದೆ.