NBK109: ಮತ್ತೊಂದು ಸೌತ್‌ ಸಿನಿಮಾದಲ್ಲಿ ಬಾಬಿ ಡಿಯೋಲ್; ಬಾಲಯ್ಯ ಜೊತೆ ಆ್ಯಕ್ಷನ್

Team Udayavani, Jan 28, 2024, 2:40 PM IST

ಹೈದರಾಬಾದ್: ʼಅನಿಮಲ್‌ʼ ಸಿನಿಮಾದ ಬಾಲಿವುಡ್‌ ನಟ ಬಾಬಿ ಡಿಯೋಲ್‌ ಅವರ ಜನಪ್ರಿಯತೆ ಹೆಚ್ಚಾಗಿದೆ. ಅವರನ್ನು ಹುಡುಕಿಕೊಂಡು ನಾನಾ ಸಿನಿಮಾ ತಂಡದವರು ಬರುತ್ತಿದ್ದಾರೆ. ಬಾಲಿವುಡ್‌ ಮಾತ್ರವಲ್ಲದೆ, ದಕ್ಷಿಣ ಸಿನಿಮಾರಂಗಕ್ಕೂ ಬಾಬಿ ಡಿಯೋಲ್‌ ಬೇಡಿಕೆಯ ನಟನಾಗುತ್ತಿದ್ದಾರೆ.

ರಣ್ಬೀರ್‌ ಕಪೂರ್‌ ಅವರ ʼಅನಿಮಲ್‌ʼ ಸಿನಿಮಾ ಬಾಕ್ಸ್‌ ಆಫೀಸ್‌ ನಲ್ಲಿ ದೊಡ್ಡ ಹಿಟ್‌ ಆಗಿದೆ. ಆ ಮೂಲಕ ಅವರ ವೃತ್ತಿ ಬದುಕಿಗೆ ಬೂಸ್ಟ್‌ ನೀಡಿದೆ. ಆ ಸಿನಿಮಾದಲ್ಲಿ ನೆಗೆಟಿವ್‌ ರೋಲ್‌ ನಲ್ಲಿ ಕಾಣಿಸಿಕೊಂಡ ನಟ ಬಾಬಿ ಡಿಯೋಲ್‌ ಅವರಿಗೂ ದೊಡ್ಡ ಪ್ಲಸ್‌ ಪಾಯಿಂಟ್‌ ಆಗಿದೆ.

ನಿನ್ನೆಯಷ್ಟೇ(ಜ.27 ರಂದು) ಬಾಬಿ ಡಿಯೋಲ್‌ ಹುಟ್ಟುಹಬ್ಬವನ್ನು ಆಚರಿಸಿಕೊಂಡಿದ್ದಾರೆ.ಈ ಸಂಭ್ರಮದಲ್ಲಿ ಸೂರ್ಯ ಅವರ ಪ್ಯಾನ್‌ ಇಂಡಿಯಾ ʼಕಂಗುವʼ ಸಿನಿಮಾದಲ್ಲಿನ ಅವರ ʼ ಉಧಿರನ್ʼ ಪಾತ್ರದ ಫಸ್ಟ್‌ ಲುಕ್‌ ಪೋಸ್ಟರ್‌ ನ್ನು ಬಿಡುಗಡೆ ಮಾಡಲಾಗಿದೆ.

ಇದರೊಂದಿಗೆ ಮತ್ತೊಂದು ಸೌತ್‌ ಸಿನಿಮಾದಲ್ಲಿ ಅವರು ಕಾಣಿಸಿಕೊಳ್ಳುತ್ತಿದ್ದಾರೆ. ಟಾಲಿವುಡ್‌ ನಟ ಬಾಲಕೃಷ್ಣ ಅವರ ʼಎನ್‌ ಬಿಕೆ 109ʼ ಸಿನಿಮಾದಲ್ಲಿ ಬಾಬಿ ಕಾಣಿಸಿಕೊಳ್ಳಲಿದ್ದಾರೆ. ಬಾಬಿ ಡಿಯೋಲ್ ಹುಟ್ಟುಹಬ್ಬದಂದು‌ ಈ ವಿಚಾರವನ್ನು ಚಿತ್ರತಂಡ ರಿವೀಲ್‌ ಮಾಡಿದೆ.

ʼವಾಲ್ಟೇರ್ ವೀರಯ್ಯʼ ಸಿನಿಮಾವನ್ನು ನೀಡಿ ಗಮನ ಸೆಳೆದ ನಿರ್ದೇಶಕ ಕೆ ಎಸ್ ಬಾಬಿ ಬಾಲಕೃಷ್ಣ ಅವರೊಂದಿಗೆ ಈ ಸಿನಿಮಾವನ್ನು ಮಾಡುತ್ತಿದ್ದಾರೆ. ಸಿತಾರಾ ಎಂಟರ್ಟೈನ್ಮೆಂಟ್ಸ್ ಬ್ಯಾನರ್ ಅಡಿಯಲ್ಲಿ ʼಗುಂಟೂರು ಖಾರಂʼ ಸಿನಿಮಾವನ್ನು ನಿರ್ಮಾಣ ಮಾಡಿರುವ ನಿರ್ಮಾಪಕ ನಾಗ ವಂಶಿ ಈ ಸಿನಿಮಾಕ್ಕೆ ಬಂಡವಾಳ ಹಾಕಲಿದ್ದಾರೆ.

ʼNBK109ʼ ಸಿನಿಮಾದ ಇತರೆ ಪಾತ್ರವರ್ಗದ ಬಗ್ಗೆ ಇನ್ನಷ್ಟೇ ಮಾಹಿತಿ ಹೊರಬೀಳಬೇಕಿದೆ. ಮೂಲಗಳ ಪ್ರಕಾರ ಈ ಸಿನಿಮಾದಲ್ಲಿ ಗೌತಮ್ ವಾಸುದೇವ್ ಮೆನನ್ ನಟಿಸಲಿದ್ದಾರೆ ಎನ್ನಲಾಗಿದೆ.

ʼಕಂಗುವʼ ಸಿನಿಮಾದ ಬಳಿಕ ಬಾಬಿ ಪವನ್‌ ಕಲ್ಯಾಣ್‌ ಅವರ ʼಹರಿ ಹರ ವೀರ ಮಲ್ಲುʼ ಚಿತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎನ್ನಲಾಗಿದೆ.