ಥಿಯೇಟರ್‌ನಲ್ಲಿ ಇರುವಾಗಲೇ ಟಿವಿಯಲ್ಲಿ ಪ್ರಸಾರ ಕಂಡ ʼಗೇಮ್‌ ಚೇಜರ್‌ʼ: ಚಿತ್ರತಂಡ ಶಾಕ್

Team Udayavani, Jan 16, 2025, 12:57 PM IST

ಹೈದರಾಬಾದ್:‌ ಗ್ಲೋಬಲ್‌ ಸ್ಟಾರ್‌ ರಾಮ್‌ಚರಣ್‌ (Ram Charan) ಅಭಿನಯದ ʼಗೇಮ್‌ ಚೇಂಜರ್‌ʼ ಚಿತ್ರ (Game Changer) ಥಿಯೇಟರ್‌ನಲ್ಲಿ ಪ್ರದರ್ಶನ ಕಾಣುತ್ತಿದೆ.

ಜ.10ರಂದು ರಿಲೀಸ್‌ ಆದ ʼಗೇಮ್‌ ಚೇಂಜರ್ʼ ಚಿತ್ರಕ್ಕೆ ಪ್ರೇಕ್ಷಕರಿಂದ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಆದರೂ ಚಿತ್ರ ವೀಕ್ಷಣೆಗೆ ಪ್ರೇಕ್ಷಕರು ಬರುತ್ತಿದ್ದಾರೆ. ʼಆರ್‌ ಆರ್‌ ಆರ್‌ʼ ಬಳಿಕ ರಾಮ್‌ಚರಣ್‌ ಕಾಣಿಸಿಕೊಳ್ಳುತ್ತಿರುವ ಮೊದಲ ಚಿತ್ರ ಇದಾಗಿರುವುದರಿಂದ ನಿರೀಕ್ಷೆ ಹೆಚ್ಚಾಗಿಯೇ ಇದೆ. ಮಿಶ್ರ ಪ್ರತಿಕ್ರಿಯೆ ಪಡೆದುಕೊಂಡರೂ ಶಂಕರ್‌ ನಿರ್ದೇಶನದ ಚಿತ್ರ ಬಾಕ್ಸಾಫೀಸ್‌ನಲ್ಲಿ 100 ಕೋಟಿ ರೂ.ಗೂ ಅಧಿಕ ಕಲೆಕ್ಷನ್‌ ಮಾಡಿದೆ.

ಇದನ್ನೂ ಓದಿ: Bigg Boss: ಟಾಸ್ಕ್‌ ಮೂಲಕ ನಡೆಯಿತು ಮಿಡ್‌ ವೀಕ್‌ ಎಲಿಮಿನೇಷನ್; ಮಹಿಳಾ ಸ್ಪರ್ಧಿ ಔಟ್

ಇತ್ತೀಚೆಗೆ ಸೌತ್‌ ಸಿನಿಮಾಗಳಿಗೆ ಪೈರಸಿ ಕಾಟ ಶುರುವಾಗಿದೆ. ʼಗೇಮ್‌ ಚೇಂಜರ್‌ʼ ಚಿತ್ರದ ಹೆಚ್ ಡಿ ಪ್ರಿಂಟ್‌ ಆನ್‌ಲೈನ್‌ನಲ್ಲಿ ಸೋರಿಕೆ ಆಗಿದೆ. ಈ ನಡುವೆ ಚಿತ್ರಕ್ಕೆ ಮತ್ತೊಂದು ಪೆಟ್ಟು ಬಿದ್ದಿದೆ.

ಸಿನಿಮಾ ಲೀಕ್‌ ಆದ ಬಳಿಕ ಇದೀಗ ಚಾನೆಲ್‌ವೊಂದರಲ್ಲಿ ಪ್ರಸಾರ ಮಾಡಲಾಗಿದೆ. ಆಂಧ್ರಪ್ರದೇಶದ ಸ್ಥಳೀಯ ಕೇಬಲ್ ಟಿವಿ ಚಾನೆಲ್‌ನಲ್ಲಿ ʼಗೇಮ್ ಚೇಂಜರ್ʼ ಚಿತ್ರವನ್ನು ಪ್ರಸಾರ ಮಾಡಲಾಗಿದೆ.

ಅಕ್ರಮವಾಗಿ ಚಿತ್ರವನ್ನು ಪ್ರಸಾರ ಮಾಡಿರುವ ಸ್ಕ್ರೀನ್‌ ಶಾಟ್‌ಗಳನ್ನು ಹಂಚಿಕೊಂಡು ಅಭಿಮಾನಿಗಳು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಆಂಧ್ರದ ಸ್ಥಳೀಯ ಕೇಬಲ್‌ ಚಾನೆಲ್‌ ಆಗಿರುವ ‘Ap Local TV’ ಎನ್ನುವ ವಾಹಿನಿಯಲ್ಲಿ ʼಗೇಮ್‌ ಚೇಂಜರ್‌ʼ ಚಿತ್ರದ ಹೆಚ್‌ ಡಿ ಪ್ರಿಂಟ್‌ ಪ್ರಸಾರ ಮಾಡಲಾಗಿದೆ. ಇದರ ಸ್ಕ್ರೀನ್‌ ಶಾಟ್ ಗಳನ್ನು ಎಲ್ಲೆಡೆ ಹಂಚಿಕೊಳ್ಳಲಾಗಿದ್ದು, ಇದು ನಿರ್ಮಾಪಕರ ಗಮನಕ್ಕೂ ಬಂದಿದೆ.

Yesterday, ‘Ap Local TV’, a local cable network, streamed a pirated HD print of #GameChanger.

And no action has been taken so far.

There were so many conspiracies and propaganda by a section to kill the film. pic.twitter.com/3K1RWDWMPP

— Fukkard (@Fukkard) January 15, 2025

ನಿರ್ಮಾಪಕರು ಹೇಳಿದ್ದೇನು?:

“ಇದು ನಿಜಕ್ಕೂ ಬೇಸರದ ಸಂಗತಿ ಮತ್ತು ಸ್ವೀಕಾರಾರ್ಹವಲ್ಲ. ಕೇವಲ 4-5 ದಿನಗಳ ಹಿಂದೆ ಬಿಡುಗಡೆಯಾದ ಚಲನಚಿತ್ರವು ಸ್ಥಳೀಯ ಕೇಬಲ್ ಚಾನೆಲ್‌ಗಳು ಮತ್ತು ಬಸ್‌ಗಳಲ್ಲಿ ಪ್ರಸಾರವಾಗುತ್ತಿರುವುದು ಗಂಭೀರ ಕಳವಳವನ್ನು ಉಂಟುಮಾಡುತ್ತದೆ. ಸಿನಿಮಾ ಎಂದರೆ ಕೇವಲ ನಾಯಕ, ನಿರ್ದೇಶಕ ಅಥವಾ ನಿರ್ಮಾಪಕರದ್ದಲ್ಲ. ಇದು 3-4 ವರ್ಷಗಳ ಪರಿಶ್ರಮ, ಸಮರ್ಪಣೆ ಮತ್ತು ಸಾವಿರಾರು ಜನರ ಕನಸುಗಳ ಫಲಿತಾಂಶವಾಗಿದೆ. ಈ ರೀತಿ ಮಾಡುವ ಮುನ್ನಈ ಚಲನಚಿತ್ರಗಳ ಯಶಸ್ಸಿನ ಮೇಲೆ ಜೀವನೋಪಾಯವನ್ನು ಅವಲಂಬಿಸಿರುವ ವಿತರಕರು ಮತ್ತು ಪ್ರದರ್ಶಕರ ಮೇಲೆ ಆಗುವ ಪರಿಣಾಮದ ಬಗ್ಗೆ ಯೋಚಿಸಿ. ಇಂತಹ ಕ್ರಮಗಳು ಅವರ ಪ್ರಯತ್ನಗಳನ್ನು ದುರ್ಬಲಗೊಳಿಸುತ್ತವೆ ಮತ್ತು ಚಿತ್ರರಂಗದ ಭವಿಷ್ಯಕ್ಕೆ ಅಪಾಯವನ್ನುಂಟು ಮಾಡುತ್ತವೆ. ಇದನ್ನು ಕೊನೆಗಾಣಿಸಲು ಗೌರವಾನ್ವಿತ ಸರ್ಕಾರಗಳು ಮುಂದಾಗಬೇಕು ಮತ್ತು ಕಟ್ಟುನಿಟ್ಟಿನ ಕ್ರಮಗಳನ್ನು ತೆಗೆದುಕೊಳ್ಳಬೇಕಾದ ಸಮಯ ಇದು. ಚಿತ್ರರಂಗಕ್ಕೆ ಉತ್ತಮ ಭವಿಷ್ಯವನ್ನು ರೂಪಿಸಲು ಎಲ್ಲರೂ ಒಗ್ಗೂಡಿ ದೃಢವಾಗಿ ನಿಲ್ಲೋಣ” ಎಂದು ನಿರ್ಮಾಪಕ ಶ್ರೀನಿವಾಸ್ ಕುಮಾರ್ (SKN) ಟ್ವೀಟ್‌ ಮಾಡಿದ್ದಾರೆ.

ಈ ಸಂಬಂಧ ಚಿತ್ರತಂಡ ಸೈಬರ್ ಕ್ರೈಮ್ ಅಧಿಕಾರಿಗಳಿಗೆ ದೂರು ಸಲ್ಲಿಸಿದೆ.