Kollywood: 18 ವರ್ಷದ ಬಳಿಕ ಪತಿ ಸೂರ್ಯ ಜೊತೆ ನಟಿಸಲಿದ್ದಾರೆ ಜ್ಯೋತಿಕಾ

Team Udayavani, Apr 20, 2024, 6:47 PM IST

ಚೆನ್ನೈ: ಕಾಲಿವುಡ್‌ ರಿಯಲ್‌ ಲೈಫ್‌ ಜೋಡಿ ಸೂರ್ಯ – ಜ್ಯೋತಿಕಾ ಚಿತ್ರರಂಗದಲ್ಲಿ ಸಕ್ರಿಯರಾಗಿದ್ದಾರೆ. ಬಣ್ಣದ ಲೋಕದಲ್ಲಿ ಹತ್ತಾರು ಸಿನಿಮಾದಲ್ಲಿ ಜೊತೆಯಾಗಿ ಕಾಣಿಸಿಕೊಂಡ ಬಳಿಕ 2006 ರಲ್ಲಿ ಸೂರ್ಯ – ಜ್ಯೋತಿಕಾ ವಿವಾಹವಾದರು.

ವಿವಾಹದ ಮೊದಲು ʼ ಪೂವೆಲ್ಲಂ ಕೆಟ್ಟುಪ್ಪಾರ್ʼ,ʼಉಯಿರಿಲೆ ಕಾಲಂತತುʼ,ʼಕಾಖ ಕಾಖಾʼ,ʼಸಿಲ್ಲುನು ಒರು ಕಾದಲ್ʼ ಸಿನಿಮಾದಲ್ಲಿ ಜೊತೆಯಾಗಿ ನಟಿಸಿ ಗಮನ ಸೆಳೆದಿದ್ದರು. ಪ್ರೀತಿಸಿ ಮದುವೆಯಾದ ಬಳಿಕ ಸಿನಿಮಾರಂಗದಿಂದ ದೂರವಾದ ಜ್ಯೋತಿಕಾ 2015 ರಲ್ಲಿ ʼ36 ವಯಧಿನಿಲೆʼ ಮೂಲಕ ಕಂಬ್ಯಾಕ್‌ ಮಾಡಿದರು.

ʼಕಾತಲ್ – ದಿ ಕೋರ್ʼ, ʼಸೈತಾನ್‌ʼ ಹೀಗೆ ಸಾಲು ಸಾಲಾಗಿ ಸಿನಿಮಾದಲ್ಲಿ ಜ್ಯೋತಿಕಾ ಕಾಣಿಸಿಕೊಂಡಿದ್ದಾರೆ. ಪತಿಯ ಸಿನಿಮಾಗಳಿಗೆ ಸದಾ ಸಾಥ್‌ ನೀಡುವ ಜ್ಯೋತಿಕಾ ಮತ್ತೆ ಬಣ್ಣದ ಲೋಕದಲ್ಲಿ ಪತಿಯ ಜೊತೆ ತೆರೆ ಹಂಚಿಕೊಳ್ಳಲಿದ್ದಾರೆ.

ಸೂರ್ಯ ಹಾಗೂ ಜ್ಯೋತಿಕಾ 18 ವರ್ಷದ ಬಳಿಕ ಒಂದೇ ಸಿನಿಮಾದಲ್ಲಿ ತೆರೆ ಹಂಚಿಕೊಳ್ಳಲಿದ್ದಾರೆ ಎನ್ನುವ ಸುದ್ದಿಯೊಂದು ಕಾಲಿವುಡ್‌ ವಲಯದಲ್ಲಿ ಹರಿದಾಡಿದೆ.

ಈ ಸಿನಿಮಾವನ್ನು ಪ್ರಶಸ್ತಿ ವಿಜೇತೆ ತಮಿಳು ನಿರ್ದೇಶಕಿ ಹಲಿತಾ ಶಮೀಮ್ ಅಥವಾ ʼಬೆಂಗಳೂರು ಡೇಸ್ʼ ಖ್ಯಾತಿಯ ಮಲಯಾಳಂ ನಿರ್ದೇಶಕಿ ಅಂಜಲಿ ಮೆನನ್ ಸಿನಿಮಾವನ್ನು ನಿರ್ದೇಶನ ಮಾಡಲಿದ್ದಾರೆ ಎನ್ನಲಾಗಿದೆ.

ಆದರೆ ಅಧಿಕೃತವಾಗಿ ಇನ್ನಷ್ಟೇ ಸಿನಿಮಾದ ಬಗ್ಗೆ ಮಾಹಿತಿ ಹೊರಬೀಳಬೇಕಿದೆ.