ʼThalapathy69ʼ ಸಿನಿಮಾಕ್ಕೆ ವೆಟ್ರಿಮಾರನ್ ಆ್ಯಕ್ಷನ್ ಕಟ್?

Team Udayavani, Feb 6, 2024, 6:59 PM IST

ಚೆನ್ನೈ: ದಳಪತಿ ವಿಜಯ್‌ ರಾಜಕೀಯಕ್ಕೆ ಎಂಟ್ರಿ ಕೊಟ್ಟ ಬಳಿಕ ಅವರು ಕಾಣಿಸಿಕೊಳ್ಳಲಿರುವ ಕೊನೆಯ ಸಿನಿಮಾವೆಂದು ಹೇಳಲಾಗುತ್ತಿರುವ “ದಳಪತಿ69” ಬಗ್ಗೆ ಕುತೂಹಲ ಹೆಚ್ಚಾಗಿದೆ. ಸಿನಿಮಾ ಅನೌನ್ಸ್‌ ಆಗುವ ಮೊದಲೇ ದೊಡ್ಡಮಟ್ಟದ ಹೈಪ್‌ ಕಾಲಿವುಡ್‌ ನಲ್ಲಿ ಹಬ್ಬಿಸಿದೆ.

ಇತ್ತೀಚೆಗೆ ದಳಪತಿ ವಿಜಯ್‌ ತಮ್ಮ ಪಕ್ಷದ ಹೆಸರನ್ನು ಘೋಷಿಸಿ ಅಧಿಕೃತವಾಗಿ ತಮಿಳುನಾಡಿನ ರಾಜಕೀಯ ಅಖಾಡಕ್ಕೆ ಧುಮುಕಿದ್ದಾರೆ. ಆ ಮೂಲಕ ಸಿನಿರಂಗದ ಜೊತೆ ಅವರ ರಾಜಕೀಯ ಭವಿಷ್ಯದ ಚರ್ಚೆಯೂ ಆರಂಭಗೊಂಡಿದೆ. ಇತ್ತ ದಳಪತಿ ವಿಜಯ್‌ ಅವರ ಕೊನೆಯ ಸಿನಿಮಾವೆಂದು ಹೇಳಲಾಗುತ್ತಿರುವ ʼದಳಪತಿ69ʼ ಸಿನಿಮಾವನ್ನು ಯಾರು ಮಾಡಲಿದ್ದಾರೆ ಎನ್ನುವ ಮಾತುಗಳು ದಿನಕ್ಕೊಂದರಂತೆ ಕಾಲಿವುಡ್‌ ನಲ್ಲಿ ಹರಿದಾಡುತ್ತಿದೆ.

ಇತ್ತೀಚೆಗೆ ಅಟ್ಲಿ ಅವರು ವಿಜಯ್‌ ಜೊತೆ ಸಿನಿಮಾ ಮಾಡಲಿದ್ದಾರೆ ಎನ್ನಲಾಗಿತ್ತು. ಅದರೊಂದಿಗೆ ಹೆಚ್.‌ ವಿನೋದ್‌, ಲೋಕೇಶ್‌ ಕನಕರಾಜ್‌ , ನೆಲ್ಸನ್‌ ದಿಲೀಪ್‌ ಕುಮಾರ್‌ ಹೀಗೆ ಹಲವು ನಿರ್ದೇಶಕರ ಹೆಸರು ವಿಜಯ್‌ ಅವರ 69ನೇ ಸಿನಿಮಾ ಮಾಡುವ ಸಾಲಿನಲ್ಲಿ ಕೇಳಿ ಬರುತ್ತಿದೆ. ಇದೀಗ ಈ ಸಾಲಿಗೆ ಹೊಸ ಹೆಸರು ಸೇರಿದೆ.

ಇದನ್ನೂ ಓದಿ: OTT Release: ಕೊನೆಗೂ ಓಟಿಟಿಗೆ ʼThe Kerala Storyʼ; ಯಾವಾಗ,ಎಲ್ಲಿ ಸ್ಟ್ರೀಮಿಂಗ್?

ಖ್ಯಾತ ನಿರ್ದೇಶಕ ವೆಟ್ರಿಮಾರನ್ ಅವರು ವಿಜಯ್‌ ಅವರೊಂದಿಗೆ ಸಿನಿಮಾ ಮಾಡಲಿದ್ದಾರೆ ಎನ್ನಲಾಗಿದೆ. 2020 ರಲ್ಲಿ ವೆಟ್ರಿಮಾರನ್ ವಿಜಯ್‌ ಅವರಿಗಾಗಿ ಸ್ಕ್ರಿಪ್ಟ್‌ ಮಾಡುವ ಬಗ್ಗೆ ಮಾತನಾಡಿದ್ದರು. ಇದೀಗ ಈ ಮಾತು ಅಂತಿಮ ಹಂತಕ್ಕೆ ಬಂತು ಫೈನಲ್‌ ಆಗಿದೆ ಎನ್ನಲಾಗಿದೆ.

ಸಿನಿಮಾಕ್ಕೆ ವಿಜಯ್‌ ಅವರು ಕೂಡ ಗ್ರೀನ್‌ ಸಿಗ್ನಲ್‌ ನೀಡಿದ್ದು, ಫ್ಯಾಮಿಲಿ ಡ್ರಾಮಾದ ಕಥೆ ಇದಾಗಿರಲಿದೆ ಎನ್ನಲಾಗಿದೆ. ಈ ಸಿನಿಮಾಕ್ಕೆ ಡಿ.ವಿ.ವಿ. ದಾನಯ್ಯ ಅವರು ತಮ್ಮ ಡಿವಿವಿ ಎಂಟರ್‌ಟೈನ್‌ಮೆಂಟ್ಸ್ ಅಡಿಯಲ್ಲಿ ನಿರ್ಮಾಣ ಮಾಡಲಿದ್ದಾರೆ ಎನ್ನಲಾಗಿದೆ.

ಅದೇನೇ ಇದ್ದರೂ ಈ ಬಗ್ಗೆ ಅಧಿಕೃತವಾಗಿ ಇನ್ನಷ್ಟೇ ಮಾಹಿತಿ ಹೊರಬೀಳಬೇಕಿದೆ. ಸದ್ಯ ವಿಜಯ್‌ ವೆಂಕಟ್‌ ಪ್ರಭು ಅವರ ʼದಿ ಗ್ರೇಟಿಸ್ಟ್‌ ಆಫ್‌ ಆಲ್‌ ಟೈಮ್‌ʼ ಸಿನಿಮಾದಲ್ಲಿ ಬ್ಯುಸಿಯಾಗಿದ್ದಾರೆ.