Kollywood: ಚಿನ್ನದ ಹುಡುಕಾಟದ ಜೊತೆ ಸಾಗುವ ಕಾದಾಟ..ವಿಕ್ರಮ್‌ ʼತಂಗಲಾನ್ʼ ಟ್ರೇಲರ್‌ ರಿಲೀಸ್

Team Udayavani, Jul 10, 2024, 7:19 PM IST

ಚೆನ್ನೈ:  ಚಿಯಾನ್‌ ವಿಕ್ರಮ್ (Actor Vikram) ವೃತ್ತಿ ಬದುಕಿನ ಬಹು ನಿರೀಕ್ಷಿತ ಸಿನಿಮಾ ʼತಂಗಲಾನ್ʼ(Thangalaan) ಟ್ರೇಲರ್‌ ರಿಲೀಸ್‌ ಆಗಿದೆ.

ಬಹಳ ಸಮಯದಿಂದ ಸಿನಿಮಾ ನೋಡಲು ಕಾಯುತ್ತಿದ್ದ ವಿಕ್ರಮ್‌ ಫ್ಯಾನ್ಸ್‌ ಗಳಿಗೆ ಚಿತ್ರದ ಟ್ರೇಲರ್‌ ಕುತೂಹಲದಿಂದ ತುದಿಗಾಲಲ್ಲಿ ನಿಲ್ಲುವಂತೆ ಮಾಡಿದೆ.

ʼಕೆಜಿಎಫ್‌ʼ ಅಖಾಡದಲ್ಲಿದ್ದ ಪೂರ್ವಜರ ಕಥೆ ಇದು ಎನ್ನಲಾಗುತ್ತಿದ್ದು, ಬಿಟ್ರೀಷ್‌ ಅಧಿಕಾರಿಯೊಬ್ಬ ಸ್ಥಳೀಯ ಬುಡಕಟ್ಟು ಜನಾಂಗದೊಂದಿಗೆ ʼಕೆಜಿಎಫ್‌ʼ ಚಿನ್ನವನ್ನು ಹುಡುಕುವ  ದೃಶ್ಯವನ್ನು ಟ್ರೇಲರ್‌ ನಲ್ಲಿ ತೋರಿಸಲಾಗಿದೆ.

ಚಿನ್ನ ಹುಡುಕುವ ವೇಳೆ ಎದುರಾಗುವ ಸವಾಲು, ಸಂಕಷ್ಟಗಳನ್ನು ರೋಚಕವಾಗಿ ಟ್ರೇಲರ್‌ ನಲ್ಲಿ ತೋರಿಸಲಾಗಿದೆ. ಚಿಯಾನ್‌ ವಿಕ್ರಮ್‌ ಗುಂಪಿನ ನಾಯಕನಂತೆ ಇಲ್ಲಿ ಕಾಣಿಸಿಕೊಂಡಿದ್ದು, ಅವರ ಅಭಿನಯ ನೈಜವಾಗಿ ಮೂಡಿ ಬಂದಿದೆ.

ಮ್ಯೂಸಿಕ್‌, ದೃಶ್ಯ, ಗ್ರಾಫಿಕ್ಸ್ ಹಾಗೂ ಪಾತ್ರಗಳ ರೋಷವೇಷ ಟ್ರೇಲರ್‌ ನಲ್ಲಿ ಎದ್ದು ಕಾಣುತ್ತದೆ. ಕೆಲ ವರ್ಷಗಳಿಂದ ಸುದ್ದಿಯಲ್ಲಿರುವ ʼತಂಗಲಾನ್‌ʼ ಈ ಹಿಂದೆಯೇ ರಿಲೀಸ್‌ ಆಗಿರಬೇಕಿತ್ತು. ಆದರೆ ನಾನಾ ತಾಂತ್ರಿಕ ಕೆಲಸದಿಂದ ರಿಲೀಸ್‌ ಡೇಟ್‌ ಮುಂದೂಡಿಕೆ ಆಗುತ್ತಾ ಬಂದಿದೆ.

ಪ್ಯಾನ್‌ ಇಂಡಿಯಾ ಸಿನಿಮಾವನ್ನು ಖ್ಯಾತ ನಿರ್ದೇಶಕ ಪಾ ರಂಜಿತ್‌ (Pa Ranjith) ನಿರ್ದೇಶನ ಮಾಡಿದ್ದು, ವಿಕ್ರಮ್ ಜೊತೆ ಪಾರ್ವತಿ ತಿರುವೋತ್ತು, ಮಾಳವಿಕಾ ಮೋಹನನ್, ಪಶುಪತಿ ಮತ್ತು ಇತರರು ನಟಿಸಿದ್ದಾರೆ.

ಟ್ರೇಲರ್‌ ನೋಡಿ ಪ್ರೇಕ್ಷಕರು ಮೆಚ್ಚಿಕೊಂಡಿದ್ದಾರೆ. ಆದರೆ ಸಿನಿಮಾದ ರಿಲೀಸ್‌ ಡೇಟ್‌ ಅನೌನ್ಸ್‌ ಆಗದ ಕಾರಣ ನಿರಾಶರಾಗಿದ್ದಾರೆ.  ಮೂಲಗಳ ಪ್ರಕಾರ ಆಗಸ್ಟ್‌ 15 ಚಿತ್ರ ರಿಲೀಸ್‌ ಆಗಲಿದೆ ಎನ್ನಲಾಗಿದೆ.