ಕೇರಳ ಸರಕಾರಿ ನೌಕರರ 6 ದಿನದ ವೇತನ ಕಟ್‌

Team Udayavani, Apr 24, 2020, 12:04 PM IST

ಕೇರಳ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್‌

ಕೋವಿಡ್ – 19 ವೈರಸ್‌ ಸೋಂಕಿನಿಂದ ತಲೆದೋರಿರುವ ಆರ್ಥಿಕ ಸಂಕಷ್ಟವನ್ನು ಎದುರಿಸುವ ದೃಷ್ಟಿಯಿಂದ ಕೇರಳ ರಾಜ್ಯಸರಕಾರಿ ನೌಕರರ ಮಾಸಿಕ ವೇತನ ಕಡಿತಗೊಳಿಸಲು ಸರಕಾರ ನಿರ್ಧರಿಸಿದೆ ಎಂದು ಮುಖ್ಯಮಂತ್ರಿ ಪಿಣರಾಯಿ ವಿಜಯನ್‌ ತಿಳಿಸಿದ್ದಾರೆ.

ಈ ಕುರಿತು ಗುರುವಾರ ಸುದ್ದಿಗಾರರಿಗೆ ಮಾಹಿತಿ ನೀಡಿದ ಅವರು, ರಾಜ್ಯ ಸರಕಾರಿ ನೌಕರರ ಮಾಸಿಕ ವೇತನದಲ್ಲಿ ತಿಂಗಳಿಗೆ ಆರು ದಿನಗಳಂತೆ ಒಟ್ಟು ಐದು ತಿಂಗಳ ವೇತನವನ್ನು ಹಿಡಿದುಕೊಳ್ಳಲಾಗುವುದು. ಈ ವೇತನ ಕಡಿತವು ಸರಕಾರದ ಅನುದಾನ ಪಡೆಯುವ, ಅರೆಸರಕಾರಿ ಸಂಸ್ಥೆಗಳ ನೌಕರರಿಗೂ ಅನ್ವಯವಾಗಲಿದೆ. ಇದರೊಂದಿಗೆ ಸಚಿವರು, ಶಾಸಕರು ಮತ್ತು ವಿವಿಧ ಮಂಡಳಿಗಳ ಸದಸ್ಯರು ತಮ್ಮ ವೇತನದ ಶೇ.30 ಭಾಗವನ್ನು ಬಿಟ್ಟುಕೊಡಲು ನಿರ್ಧರಿಸಿದ್ದಾರೆ ಎಂದು ತಿಳಿಸಿದರು. 2018-19ರಲ್ಲಿ ಸಂಭವಿಸಿದ್ದ ಪ್ರವಾಹದಿಂದ ಆಗಿದ್ದ ಪ್ರಮಾಣದಷ್ಟೇ ನಷ್ಟ ಕೋವಿಡ್ ಸೋಂಕಿನಿಂದ ರಾಜ್ಯಕ್ಕಾಗಿದ್ದು, ರಾಜ್ಯದ ನಿರೀಕ್ಷಿತ ಆರ್ಥಿಕ ಪ್ರಗತಿ ಪ್ರಮಾಣ ಕೂಡ ಕುಸಿದಿದೆ. ಇದರೊಂದಿಗೆ ವಿವಿಧ ದೇಶಗಳಲ್ಲಿ ನೆಲೆಸಿರುವ ಅನಿವಾಸಿ ಕೇರಳಿಗರು ಮಾಡುತ್ತಿದ್ದ ಹಣ ವರ್ಗಾವಣೆ ಕೂಡ ಕಡಿಮೆಯಾಗಿರುವ ಕಾರಣ ರಾಜ್ಯಕ್ಕೆ ಆರ್ಥಿಕವಾಗಿ ತುಂಬಾ ಹಿನ್ನಡೆಯಾಗಿದೆ ಎಂದು ವಿಜಯನ್‌ ಮಾಹಿತಿ ನೀಡಿದ್ದಾರೆ.