ಇಟಲಿಯಿಂದ “ಜಿಆರ್‌ಎಡಿ-ಕೋವ್‌2′ ; ಕೋವಿಡ್‌ ಲಸಿಕೆಯ ಪ್ರಯೋಗ ಆರಂಭ

Team Udayavani, Aug 25, 2020, 5:33 AM IST

ಸ್ಪ್ಯಾನಿಷ್‌ ದ್ವೀಪ: ಇಲ್ಲಿನ ಜನರು ಸಾಮಾಜಿಕ ಅಂತರವನ್ನು ಮರೆತು ಕಂಡಿದ್ದು ಹೀಗೆ.

ರೋಮ್: ಸದ್ಯ ವಿಶ್ವದ ಬಹತೇಕ ರಾಷ್ಟ್ರಗಳು ಕೋವಿಡ್ ಸೋಂಕನ್ನು ನಿಷ್ಕ್ರಿಯಗೊಳಿಸುವ ಲಸಿಕೆ ಅಭಿವೃದ್ಧಿ ಕಾರ್ಯದ ಹಿಂದೆ ಬಿದ್ದಿದ್ದಾರೆ. ಇದೀಗ ಕೊರೊನಾ ಸೋಂಕು ಪೀಡಿತ ರಾಷ್ಟ್ರಗಳ ಪಟ್ಟಿಯಲ್ಲಿ ಸ್ಥಾನಪಡೆದಿದ್ದ ಇಟಲಿಯಲ್ಲಿ ಸೋಮವಾರದಿಂದ ಕೋವಿಡ್‌ ಲಸಿಕೆಯ ಪ್ರಯೋಗ ಆರಂಭವಾಗಿದೆ.

ಈ ಸಂಭಾವ್ಯ ಲಸಿಕೆಗೆ “ಜಿಆರ್‌ಎಡಿ-ಕೋವ್‌2′ ಎಂದು ಹೆಸರಿಸಲಾಗಿದ್ದು, ರೋಮ್‌ ಮೂಲದ ರೀಥೆರಾ ಎಂಬ ಕಂಪನಿ ಲಸಿಕೆಯನ್ನು ಅಭಿವೃದ್ಧಿಪಡಿಸಿದೆ. ಈ ಲಸಿಕೆಯನ್ನು ಮಿಲಾನ್ನ ಸುತ್ತಲಿನ ಪ್ರದೇಶಗಳಲ್ಲಿರುವ ಪ್ರಾಣಿಗಳ ಮೇಲೆ ಪ್ರಯೋಗ ನಡೆಸಿದ್ದು, ಸಕಾರಾತ್ಮಕ ಪರಿಣಾಮ, ಫ‌ಲಿತಾಂಶಗಳು ಲಭ್ಯವಾಗಿವೆ ಎಂದು ತಜ್ಞರು ತಿಳಿಸಿದ್ದಾರೆ. ರೋಮ್‌ನ ಲಝಾರೊ ಸ್ಪಲಾಂಝನಿ ಇನ್‌ಸ್ಟಿಟ್ಯೂಟ್‌ ಈ ಲಸಿಕೆಯನ್ನು ಮಾನವರ ಮೇಲೆ ಪ್ರಯೋಗ ನಡೆಸಲು ಮುಂದಾಗಿದ್ದು, ಸೋಂಕು ರೋಗಕ್ಕೆ ಚಿಕಿತ್ಸೆ ನೀಡುವಲ್ಲಿ ಪರಿಣತಿ ಹೊಂದಿರುವ ಲಝಾರೊ ಮುಂದಿನ ವಾರ 90 ಸ್ವಯಂ ಸೇವಕರ ಮೇಲೆ ಈ ಲಸಿಕೆಯನ್ನು ಪ್ರಯೋಗಿಸಲಾಗುತ್ತಿದೆ. ಮುಂದಿನ ವರ್ಷದ ಮಳೆಗಾಲದ ಹೊತ್ತಿಗೆ ಅಧಿಕೃತವಾಗಿ ಲಸಿಕೆ ಲಭ್ಯವಾಗುವ ವಿಶ್ವಾಸವಿದೆ ಎನ್ನುತ್ತಿದ್ದಾರೆ ಸಂಸ್ಥೆಯ ಮುಖ್ಯಸ್ಥರು. ಲಸಿಕೆ ಪ್ರಯೋಗ ಕುರಿತು ಸುದ್ದಿ ಸಂಸ್ಥೆಯೊಂದಿಗೆ ಮಾತನಾಡಿದ ಸ್ಪಲಾಂಝನಿ ಆಸ್ಪತ್ರೆಯ ಆರೋಗ್ಯ ನಿರ್ದೇಶಕ ಫ್ರಾನ್ಸಿಸ್ಕೊ ವೈಯಾ, “ಮೊದಲು ಲಸಿಕೆಯ ಪ್ರಯೋಗಕ್ಕೆ ಒಳಪಟ್ಟ ವ್ಯಕ್ತಿಯನ್ನು ಮನೆಗೆ ಕಳುಹಿಸುವ ಮುನ್ನ 4 ಗಂಟೆಗಳ ಕಾಲ ನಿಗಾವಹಿಸಲಾಗುತ್ತದೆ. ಅನಂತರ 12 ವಾರಗಳ ಕಾಲ ಆ ವ್ಯಕ್ತಿಯ ಆರೋಗ್ಯದ ಮೇಲೆ ನಿಗಾ ಇಡಲಾಗುತ್ತದೆ. ಏನಾದರೂ ಆರೋಗ್ಯದ ಮೇಲೆ ಅಡ್ಡ ಅಪರಿಣಾಮಗಳು ಉಂಟಾದರೆ, ತತ್‌ಕ್ಷಣ ಅದಕ್ಕೆ ಚಿಕಿತ್ಸೆ ನೀಡಲಾಗುತ್ತದೆ’ ಎಂದು ಹೇಳಿದ್ದಾರೆ.