Covid-19; 60 ದಿನಗಳ ಬಳಿಕ ವುಹಾನ್ ಲಾಕ್ ಡೌನ್ ಅಂತ್ಯ, ಚೀನಾದ ಉಳಿದೆಡೆ ಆರಂಭ

Team Udayavani, Apr 8, 2020, 3:34 PM IST

ಬೀಜಿಂಗ್:ಇಡೀ ಜಗತ್ತನ್ನೇ ಕಂಗೆಡಿಸಲು ಮೂಲ ಕಾರಣವಾಗಿದ್ದ ಕೋವಿಡ್ 19 ವೈರಸ್ ನ ಕೇಂದ್ರಸ್ಥಾನವಾದ ಚೀನಾದ ವುಹಾನ್
ಪ್ರಾಂತ್ಯದ ಮೇಲೆ ಹೇರಿದ್ದ 2 ತಿಂಗಳ ಕಾಲದ ಲಾಕ್ ಡೌನ್ ಅಂತ್ಯಗೊಂಡಿರುವುದಾಗಿ ಬುಧವಾರ ವರದಿ ತಿಳಿಸಿದೆ. ಆದರೆ ಎರಡನೇ
ಬಾರಿ ಮತ್ತೆ ಕೋವಿಡ್ 19 ವೈರಸ್ ಹರಡುವ ಭಯದಿಂದ ಚೀನಾದ ಉಳಿದೆಡೆ ಲಾಕ್ ಡೌನ್ ಮುಂದುವರಿಸುವ ಮೂಲಕ
ನಾಗರಿಕರಿಗೆ ನಿರ್ಬಂಧ ವಿಧಿಸಿದೆ ಎಂದು ವಿವರಿಸಿದೆ.

ಕೋವಿಡ್ 19 ವೈರಸ್ ಸ್ವರೂಪ ತೀವ್ರ ಸ್ವರೂಪ ತಾಳುತ್ತಿರುವಂತೆಯೇ ಚೀನಾ ಇಡೀ ವುಹಾನ್ ಪ್ರಾಂತ್ಯವನ್ನೇ ಲಾಕ್ ಡೌನ್
ಮಾಡಿತ್ತು. ವುಹಾನ್ ಜನಸಂಖ್ಯೆ 11 ಲಕ್ಷ. ಕೋವಿಡ್ ಹರಡದಂತೆ ತಡೆಯುವ ನಿಟ್ಟಿನಲ್ಲಿ ಚೀನಾ ಸರ್ಕಾರ ಈ ಕಠಿಣ ನಿರ್ಧಾರ
ತಳೆದಿತ್ತು ಎಂದು ವರದಿ ಹೇಳಿದೆ.

ವುಹಾನ್ ನಲ್ಲಿ 50 ಸಾವಿರಕ್ಕೂ ಅಧಿಕ ಮಂದಿಗೆ ಕೋವಿಡ್ 19 ಸೋಂಕು ತಗುಲಿತ್ತು. ಮೂರು ಸಾವಿರಕ್ಕೂ ಅಧಿಕ ಜನರು
ಸಾವನ್ನಪ್ಪಿದ್ದರು. ಶೇ.80ರಷ್ಟು ಜನರು ಕೋವಿಡ್ ವೈರಸ್ ಗೆ ಬಲಿಯಾಗಿದ್ದರು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಈ ಮಾರಣಾಂತಿಕ ವೈರಸ್ ಜಗತ್ತಿನಾದ್ಯಂತ 1.4 ಮಿಲಿಯನ್ ಗಿಂತಲೂ ಅಧಿಕ ಜನರಿಗೆ ಹರಡಿತ್ತು. 82 ಸಾವಿರ ಜನರು
ಸಾವನ್ನಪ್ಪಿದ್ದರು. ಅಲ್ಲದೇ ಲಾಕ್ ಡೌನ್ ನಿಂದಾಗಿ ಜಾಗತಿಕ ಆರ್ಥಿಕತೆಗೆ ದೊಡ್ಡ ಹೊಡೆತ ಬಿದ್ದಿರುವುದಾಗಿ ವರದಿ ತಿಳಿಸಿದೆ.