20 ದಿನದ ಶಿಶುವಿಗೆ ಸೋಂಕು ; ಆ್ಯಂಬುಲೆನ್ಸ್ ಚಾಲಕನಲ್ಲೂ ಸೋಂಕಿನ ಲಕ್ಷಣ

Team Udayavani, May 2, 2020, 6:43 PM IST

ಸಾಂದರ್ಭಿಕ ಚಿತ್ರವನ್ನು ಬಳಸಲಾಗಿದೆ – Representative Image Used

ಮಹಾರಾಷ್ಟ್ರದ ಕಲ್ಯಾಣ್‌ನಲ್ಲಿ 20 ದಿನದ ಗಂಡುಮಗುವಿಗೆ ಕೋವಿಡ್ 19 ವೈರಸ್ ಸೋಂಕು ಪತ್ತೆಯಾಗಿದೆ.

ಇದರ ಜತೆಗೆ ಇನ್ನೂ ಐದು ಮಂದಿಯಲ್ಲಿ ಸೋಂಕು ದೃಢಪಟ್ಟಿದೆ ಎಂದು ಕಲ್ಯಾಣ್‌- ದೊಂಬಿವಿಲಿ ಮುನಿಸಿಪಲ್‌ ಕಾರ್ಪೊರೇಷನ್‌ನ ವೈದ್ಯಾಧಿಕಾರಿ ಡಾ| ರಾಜು ಲವಂಗೆರೆ ತಿಳಿಸಿದ್ದಾರೆ.

ಅವರೆಲ್ಲರಿಗೂ ಚಿಕಿತ್ಸೆ ನೀಡಲಾಗುತ್ತಿದ್ದು ಈಗಾಗಲೇ ಮಗುವಿನ ತಾಯಿಯಲ್ಲಿಯೂ ಸೋಂಕು ಪತ್ತೆಯಾಗಿದೆ ಎಂದು ಅವರು ಹೇಳಿದ್ದಾರೆ.

ಚಾಲಕನಿಗೆ ಸೋಂಕು: ಚೆನ್ನೈನಲ್ಲಿ ಸಿಲುಕಿದ್ದ ಐವರನ್ನು ಆ್ಯಂಬುಲೆನ್ಸ್‌ನಲ್ಲಿ ತ್ರಿಪುರಾಕ್ಕೆ ಕರೆದುಕೊಂಡು ಹೋಗಿದ್ದ ಚಾಲಕನಿಗೆ ಕೋವಿಡ್ 19 ವೈರಸ್ ಸೋಂಕು ದೃಢವಾಗಿದೆ.

ತ್ರಿಪುರಾಕ್ಕೆ ತೆರಳುವ ಮೊದಲು ರೋಗಿಗಳಿಗೆ ಮತ್ತು ಚಾಲಕನಿಗೆ ಪರೀಕ್ಷೆ ನಡೆಸಲಾಗಿತ್ತು. ಅವರಿಗೆ ಸೋಂಕು ತಗುಲಿಲ್ಲ ಎಂದು ದೃಢಪಡಿಸಿಕೊಂಡ ಬಳಿಕವೇ ಅವರನ್ನು ಕಳಿಸಲಾಗಿತ್ತು ಎಂದು ತ್ರಿಪುರಾ ಕಾರ್ಯದರ್ಶಿ ರತನ್‌ ಲಾಲ್‌ ನಾಥ್‌ ತಿಳಿಸಿದ್ದಾರೆ.

ಚಾಲಕ ಅವರನ್ನೆಲ್ಲ ಎ. 27ರಂದು ತ್ರಿಪುರಾದ ಉದಯಪುರದಲ್ಲಿ ಬಿಟ್ಟು ವಾಪಸ್ಸಾಗುವಾಗ ಅವರಿಗೆ ರೋಗ ಲಕ್ಷಣಗಳು ಕಾಣಿಸಿಕೊಂಡಿವೆ. ಅವರು ಸದ್ಯ ಪಶ್ಚಿಮ ಬಂಗಾಲದ ಸಿಲಿಗುರಿಯಲ್ಲಿ ಇದ್ದಾರೆ.

ಆ್ಯಂಬುಲೆನ್ಸ್‌ ನಲ್ಲಿದ್ದ ಐವರನ್ನು ಈಗಾಗಲೇ ಪ್ರತ್ಯೇಕ ನಿಗಾದಲ್ಲಿ ಇರಿಸಲಾಗಿದೆ. ಅವರನ್ನು ಪುನಃ ಪರೀಕ್ಷೆಗೆ ಒಳಪಡಿಸಲಾಗಿದೆ.