ಕೋವಿಡ್ 19: ಝೈಡಸ್ ಕಂಪನಿಯ ವಿರಾಫಿನ್ ತುರ್ತು ಬಳಕೆಗೆ ಡಿಜಿಸಿಐ ಅನುಮತಿ

Team Udayavani, Apr 23, 2021, 6:14 PM IST

ನವದೆಹಲಿ: ವಯಸ್ಕ ಕೋವಿಡ್ ರೋಗಿಗಳ ತುರ್ತು ಬಳಕೆಗಾಗಿ ಗುಜರಾತ್ ಮೂಲದ ಝೈಡಸ್ ಕ್ಯಾಡಿಲಾ ಕಂಪನಿಯ ಸೋಂಕು ನಿರೋಧಕ ವಿರಾಫಿನ್ ಗೆ ಭಾರತೀಯ ಪ್ರಧಾನ ಔಷಧ ನಿಯಂತ್ರಕ (ಡಿಜಿಸಿಐ) ಇಲಾಖೆ ಶುಕ್ರವಾರ(ಏಪ್ರಿಲ್ 23) ಅನುಮತಿ ನೀಡಿದೆ.

ಕೋವಿಡ್ ನಿಂದ ಬಳಲುತ್ತಿದ್ದ ಶೇ.91.15ರಷ್ಟು ಮಂದಿಗೆ ಪೆಗ್ಐ ಎಫ್ ಎನ್ ಮೂಲಕ ಚಿಕಿತ್ಸೆ ನೀಡಲಾಗಿದ್ದು, ಸುಮಾರು 7 ದಿನಗಳ ಬಳಿಕ ಆರ್ ಟಿ ಪಿಸಿಆರ್ ನಲ್ಲಿ ಪರೀಕ್ಷಿಸಿದಾಗ ನೆಗೆಟಿವ್ ವರದಿ ಬಂದಿರುವುದಾಗಿ ಝೈಡಸ್ ತಿಳಿಸಿದೆ.

ಕೋವಿಡ್ ಸೋಂಕಿನಿಂದ ಬಳಲುತ್ತಿರುವ ವ್ಯಕ್ತಿಗಳಿಗೆ ಒಂದು ಡೋಸ್ ಆ್ಯಂಟಿ ವೈರಲ್ ವಿರಾಫಿನ್ ನೀಡಿದರೆ ರೋಗನಿರೋಧಕ ಶಕ್ತಿ ಹೆಚ್ಚಾಗಲಿದೆ ಎಂದು ಹೇಳಿದೆ. ಆ ನಿಟ್ಟಿನಲ್ಲಿ ಸೂಕ್ಷ್ಮ ಲಕ್ಷಣಗಳು ಇರುವ ವಯಸ್ಕ ಕೋವಿಡ್ ಸೋಂಕಿತರಿಗೆ ವಿರಾಫಿನ್ ಲಸಿಕೆ ತುರ್ತು ಬಳಕೆ ಮಾಡಲು ಡಿಸಿಜಿಐ ಅನುಮತಿ ನೀಡಿದೆ ಎಂದು ಝೈಡಸ್ ಕಂಪನಿ ವಿವರಿಸಿದೆ.

ಕೋವಿಡ್ ಸೋಂಕಿತರು ಶೀಘ್ರವಾಗಿ ಗುಣಮುಖರಾಗಲು ವಿರಾಫಿನ್ ಹೆಚ್ಚು ನೆರವಾಗಬಲ್ಲದು ಅಲ್ಲದೇ ಇದು ಹೆಚ್ಚಿನ ಅಪಾಯವನ್ನು ತಪ್ಪಿಸಲು ಸಹಕಾರಿಯಾಗಿದೆ ಎಂದು ಝೈಡಸ್ ಕ್ಯಾಡಿಲಾ ಕಂಪನಿ ತಿಳಿಸಿದೆ.