ಜಗತ್ತಿನಾದ್ಯಂತ ಕೋವಿಡ್ ಗೆ 1.90 ಲಕ್ಷ ಮಂದಿ ಸಾವು, 27 ಲಕ್ಷ ಜನರು ಸೋಂಕಿತರು: ವರದಿ

Team Udayavani, Apr 24, 2020, 8:59 PM IST

Representative Image

ನವದೆಹಲಿ: ಕೋವಿಡ್ 19 ಮಹಾಮಾರಿಗೆ ಜಾಗತಿಕವಾಗಿ ಸಾವನ್ನಪ್ಪಿದವರ ಸಂಖ್ಯೆ ಶುಕ್ರವಾರ 1,90,000ಕ್ಕೆ ಏರಿಕೆಯಾಗಿದೆ. ಇದರಲ್ಲಿ ಅತೀ ಹೆಚ್ಚಿನ ಸಂಖ್ಯೆಯಲ್ಲಿ ಯುರೋಪ್ ನಲ್ಲಿ ಸಾವನ್ನಪ್ಪಿರುವುದಾಗಿ ಎಎಫ್ ಪಿ ವರದಿ ಮಾಡಿದೆ.

ಕೋವಿಡ್ 19 ವೈರಸ್ ಗೆ ವಿಶ್ವಾದ್ಯಂತ ಒಟ್ಟು 1,90,089 ಜನರು ಸಾವನ್ನಪ್ಪಿದ್ದು, 26,98,733 ಮಂದಿ ಸೋಂಕು ಪೀಡಿತರಾಗಿದ್ದಾರೆ. ಯುರೋಪ್ ನಲ್ಲಿ ಅತೀ ಹೆಚ್ಚು ಮಂದಿ ಸೋಂಕಿಗೆ ಒಳಗಾಗಿದ್ದಾರೆ. ಯುರೋಪ್ ಒಕ್ಕೂಟದಲ್ಲಿ 1,16,221 ಮಂದಿ ಸಾವನ್ನಪ್ಪಿದ್ದು, 12,96,248 ಪ್ರಕರಣಗಳು ಪತ್ತೆಯಾಗಿದೆ ಎಂದು ವರದಿ ವಿವರಿಸಿದೆ.

ವಿಶ್ವದ ದೊಡ್ಡಣ್ಣ ಅಮೆರಿಕದಲ್ಲಿ 49,963 ಜನರು ಕೋವಿಡ್ 19 ವೈರಸ್ ಗೆ ಸಾವನ್ನಪ್ಪಿದ್ದು, ಇಟಲಿಯಲ್ಲಿ ಈವರೆಗೆ 25,549 ಜನರು, ಸ್ಪೇನ್ ನಲ್ಲಿ 22,157 ಮಂದಿ, ಫ್ರಾನ್ಸ್ ನಲ್ಲಿ 21,856 ಹಾಗೂ ಬ್ರಿಟನ್ ನಲ್ಲಿ 18,738 ಜನರು ಸಾವನ್ನಪ್ಪಿದ್ದಾರೆ.