ಮೇಡ್ ಇನ್ ಇಂಡಿಯಾ ಕೋವಿಡ್ 19 ಲಸಿಕೆ ಫೆಬ್ರವರಿಯಲ್ಲಿ ಲಭ್ಯ? ಯಾವುದು ಈ ಲಸಿಕೆ

ನಿರೀಕ್ಷೆಗಿಂತ ಒಂದು ತಿಂಗಳ ಮುನ್ನವೇ ಕೋವಿಡ್ ಲಸಿಕೆ ಲಭಿಸುವ ಸಾಧ್ಯತೆ ಇದೆ.

Team Udayavani, Nov 5, 2020, 3:28 PM IST

ಮೇಡ್ ಇನ್ ಇಂಡಿಯಾ ಕೋವಿಡ್ 19 ಲಸಿಕೆ ಫೆಬ್ರವರಿಯಲ್ಲಿ ಲಭ್ಯ? ಯಾವುದು ಈ ಲಸಿಕೆ

ನವದೆಹಲಿ:ಭಾರತ ಸರ್ಕಾರ ಪ್ರಾಯೋಜಕತ್ವದ ಕೋವಿಡ್ 19 ಸೋಂಕಿನ ಲಸಿಕೆ 2021ನೇ ಇಸವಿಯ ಫೆಬ್ರುವರಿಯ ಆರಂಭದಲ್ಲಿ ಲಭ್ಯವಾಗುವ ಸಾಧ್ಯತೆಗಳಿರುವುದಾಗಿ ವರದಿ ತಿಳಿಸಿದೆ. ನಿರೀಕ್ಷೆಗಿಂತ ಒಂದು ತಿಂಗಳ ಮುನ್ನವೇ ಕೋವಿಡ್ ಲಸಿಕೆ ಲಭಿಸುವ ಸಾಧ್ಯತೆ ಇದೆ. ಅಂತಿಮ ಹಂತದ ಪ್ರಯೋಗದಲ್ಲಿ ಈ ಲಸಿಕೆ ಸುರಕ್ಷಿತ ಮತ್ತು ಪರಿಣಾಮಕಾರಿ ಎಂಬ ಅಂಶ ಕಂಡುಬಂದಿರುವುದಾಗಿ ಸರ್ಕಾರದ ಹಿರಿಯ ವಿಜ್ಞಾನಿ ರಾಯಿಟರ್ಸ್ ಗೆ ತಿಳಿಸಿದ್ದಾರೆ.

ಕೇಂದ್ರ ಸರ್ಕಾರದ ಇಂಡಿಯನ್ ಕೌನ್ಸಿಲ್ ಆಫ್ ಮೆಡಿಕಲ್ ರಿಸರ್ಚ್ (ಐಸಿಎಂಆರ್) ಜತೆಗೂಡಿ ಖಾಸಗಿ ಕಂಪನಿಯಾದ ಭಾರತ್ ಬಯೋಟೆಕ್ “ಕೋವ್ಯಾಕ್ಸಿನ್” ಲಸಿಕೆಯನ್ನು ಅಭಿವೃದ್ದಿಪಡಿಸಿದ್ದು, ಈ ಲಸಿಕೆ 2021ರ ಏಪ್ರಿಲ್ ನಂತರ ಲಭ್ಯವಾಗುವ ಸಾಧ್ಯತೆ ಇದೆ ಎಂದು ತಿಳಿಸಿತ್ತು.

ಕೋವಿಡ್ ಗಾಗಿ ಸಿದ್ಧಪಡಿಸುತ್ತಿರುವ ಕೋವ್ಯಾಕ್ಸಿನ್ ಲಸಿಕೆ ಪ್ರಯೋಗದಲ್ಲಿ ತುಂಬಾ ಪರಿಣಾಮಕಾರಿ ಫಲಿತಾಂಶ ಕಂಡು ಬಂದಿರುವುದಾಗಿ ಐಸಿಎಂಆರ್ ವಿಜ್ಞಾನಿ ರಜನಿಕಾಂತ್ ತಿಳಿಸಿದ್ದು, ರಜನಿಕಾಂತ್ ಕೋವಿಡ್ 19 ಟಾಸ್ಕ್ ಫೋರ್ಸ್ ನ ಸದಸ್ಯರಾಗಿದ್ದಾರೆ.

ಇದನ್ನೂ ಓದಿ:ಪ್ರವಾಸಿಗರ ಸೋಗಿನಲ್ಲಿ ಖೋಟಾ ನೋಟು ಚಲಾವಣೆ! ಪೊಲೀಸರಿಂದ ತಂದೆ, ತಾಯಿ, ಮಗನ ಬಂಧನ

ಈ ನೂತನ ಲಸಿಕೆ ಮುಂದಿನ ವರ್ಷ(2021)ದ ಫೆಬ್ರುವರಿ ಅಥವಾ ಮಾರ್ಚ್ ನಲ್ಲಿ ಲಭ್ಯವಾಗುವ ಸಾಧ್ಯತೆ ಇದೆ ಎಂದು ಹೇಳಿದೆ. ಆದರೆ ಈ ಬಗ್ಗೆ ಭಾರತ್ ಬಯೋಟೆಕ್ ತಕ್ಷಣಕ್ಕೆ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ ಎಂದು ವರದಿ ಹೇಳಿದೆ.

ಒಂದು ವೇಳೆ ಫೆಬ್ರುವರಿಯಲ್ಲಿ ಕೋವ್ಯಾಕ್ಸಿನ್ ಲಸಿಕೆ ಬಿಡುಗಡೆಯಾದರೆ ಮೇಡ್ ಇನ್ ಇಂಡಿಯಾದ ಮೊದಲ ಲಸಿಕೆ ಲಭ್ಯವಾದಂತಾಗಲಿದೆ ಎಂದು ವರದಿ ತಿಳಿಸಿದೆ.