ಕೋವಿಡ್‌ -19 ವೈರಸ್‌ : ರೂಪಾಂತರವಾಗಿ ಇನ್ನಷ್ಟು ಸಾಂಕ್ರಾಮಿಕ

Team Udayavani, Jun 15, 2020, 12:05 PM IST

ಸಾಂದರ್ಭಿಕ ಚಿತ್ರ

ಲಂಡನ್‌: ಕೋವಿಡ್‌ ವೈರಸ್‌ ಹಬ್ಬಲು ಶುರುವಾದಾಗಿನಿಂದ ರೂಪಾಂತರಗೊಳ್ಳುತ್ತಿದ್ದು ಇನ್ನಷ್ಟು ಹಬ್ಬಲು ಕಾರಣವಾಗಿದೆ ಮತ್ತು ಸುದೀರ್ಘಾವಧಿ ಅದು ಇಲ್ಲೇ ಇರಲಿದೆ ಎಂದು ಸಂಶೋಧಕರು ಹೇಳಿದ್ದಾರೆ. ಫ್ಲೋರಿಡಾದ ಸ್ಕ್ರಿಪ್ಸ್‌ ರಿಸರ್ಚ್‌ ಇನ್‌ಸ್ಟಿಟ್ಯೂಟ್‌ನ ಸಂಶೋಧಕರು ಈ ಸಂಶೋಧನೆಯನ್ನು ನಡೆಸುತ್ತಿದ್ದು, ಕೋವಿಡ್‌ ವೈರಾಣು ರೂಪಾಂತರಗೊಳ್ಳುತ್ತ ಸಾಗುತ್ತಿದೆ ಎಂದು ಹೇಳುತ್ತಾರೆ. ಜತೆಗೆ ಇದರಿಂದಲೇ ಅದು ಹೆಚ್ಚು ಸಾಂಕ್ರಾಮಿಕವೂ ಆಗಿದೆ ಎಂದಿದ್ದಾರೆ. ಇದೇ ಕಾರಣಕ್ಕೆ ಯುರೋಪ್‌ ಮತ್ತು ಅಮೆರಿಕಾದಲ್ಲಿ ಅದು ಇನ್ನಷ್ಟು ಹಬ್ಬುತ್ತಿದೆ ಎಂದಿದ್ದಾರೆ.

ಕೋವಿಡ್‌ ಸೋಂಕಿನ ಈ ಗುಣಲಕ್ಷಣಗಳನ್ನು ಗುರುತಿಸಲು ಲ್ಯಾಬೊರೇಟರಿಯಲ್ಲಿ ವಿವಿಧ ಪರೀಕ್ಷೆಗಳನ್ನು ನಡೆಸಲಾಗಿದೆ. ಅಲ್ಲದೇ ಅದರ ರೂಪಾಂತರವನ್ನು ಗುರುತಿಸಲಾಗಿದೆ. ಯುರೋಪ್‌ ಮತ್ತು ಅಮೆರಿಕದಲ್ಲಿ ಹಬ್ಬಿದ ವೈರಸ್‌ಗಳು ರೂಪಾಂತರಗೊಂಡವು ಮತ್ತು ಮಾನವನ ಜೀವಕೋಶಗಳ ಮೇಲೆ ಪರಿಣಾಮ ಬೀರುವಂತಹವುಗಳು ಎಂದು ಸಂಶೋಧಕರು ಹೇಳಿದ್ದಾರೆ. ಇಷ್ಟೊಂದು ಬಗೆಯಲ್ಲಿ ರೂಪಾಂತರಗೊಳ್ಳುವುದೇ ಆಗಿದ್ದರೆ, ಖಂಡಿತವಾಗಿ ಆ ವೈರಸ್‌ ಹೆಚ್ಚು ಸಾಂಕ್ರಾಮಿಕವಾಗುತ್ತದೆ. ನಮ್ಮ ಜೀವಕೋಶ ವ್ಯವಸ್ಥೆಯಲ್ಲೇ ಇದು ನಡೆಯುವುದರಿದ ಹಾನಿಕಾರಕವೂ ಆಗಿದೆ ಎಂದು ಸ್ಕ್ರಿಪ್ಸ್‌ ರಿಸರ್ಚ್‌ನ ವೈರಾಲಜಿಸ್ಟ್‌ ಡಾ| ಹೆಯ್ರುನ್‌ ಚಾವೋ ಅವರು ಹೇಳಿದ್ದಾರೆ. ಕೋವಿಡ್‌ ಸೋಂಕು ಹಬ್ಬಿದ ಬಳಿಕ ಕೆಲವು ದೇಶಗಳಲ್ಲಿ ತೀವ್ರವಾಗಿ ಹರಡತೊಡಗಿದ್ದರೆ, ಇನ್ನು ಕೆಲವು ದೇಶದಲ್ಲಿ ಅದರ ಪರಿಣಾಮ ಸಾಮಾನ್ಯವಾಗಿತ್ತು. ವೈರಸ್‌ನಲ್ಲಿ ಇಂತಹ ವ್ಯತ್ಯಾಸಕ್ಕೆ ಕಾರಣವೇನೆಂದು ಶೋಧಿಸಿದಾಗ ಅದು ರೂಪಾಂತರವಾಗುವುದು ಪತ್ತೆಯಾಗಿದೆ. ಸಂಶೋಧನ ವರದಿಯ ಪ್ರಕಾರ, ರೂಪಾಂತರಗೊಂಡ ವೈರಸ್‌, ಸ್ವಲ್ಪ ಬದಲಾವಣೆಗೊಳಗಾಗುತ್ತವೆ.

ಆದರೂ ವೈರಸ್‌ ಎಷ್ಟು ಬಲಯುತವಾಗಿವೆ, ಅದರ ಸಮಗ್ರತೆ ಬಗ್ಗೆ ಇನ್ನಷ್ಟು ಶೋಧನೆಗಳು ಅಗತ್ಯವಿದೆ ಎಂಬುದನ್ನು ಸಂಶೋಧನೆ ಬೊಟ್ಟು ಮಾಡಿದೆ. ವೈರಸ್‌ನ ರೂಪಾಂತರ, ವಿವಿಧ ವಿಧಗಳು ಜಗತ್ತಿನಾದ್ಯಂತ ಕಂಡುಬಂದಿರುವುದರಿಂದ ಕೋವಿಡ್‌ ಬಗ್ಗೆ ಇದಮಿತ್ಥ ಎಂಬ ಬಗ್ಗೆ ತೀರ್ಮಾಕ್ಕೆ ಈವರೆಗೆ ಸಂಶೋಧಕರಿಗೆ ತೀರ್ಮಾನಕ್ಕೆ ಬರಲು ಸಾಧ್ಯವಾಗಿಲ್ಲ.