ಹಸಿವಿನಿಂದಲೇ ಹೆಚ್ಚು ಸಾವು!

Team Udayavani, Jul 10, 2020, 10:00 AM IST

ಸಾಂದರ್ಭಿಕ ಚಿತ್ರ

ಲಂಡನ್‌: ಯುನಿಸೆಫ್ ಸೇರಿದಂತೆ ವಿಶ್ವದ ವಿವಿಧ ಸಂಸ್ಥೆಗಳು ಕೋವಿಡ್‌ನಿಂದಾಗಿ ಮತ್ತಷ್ಟು ಜನ ಬಡತನ ರೇಖೆಗಿಂತ ಕೆಳಗೆ ಹೋಗುವ ಅಪಾಯವನ್ನು ವ್ಯಕ್ತಪಡಿಸಿರುವಂತೆಯೇ, ಕೋವಿಡ್‌ನಿಂದಲೂ ಹೆಚ್ಚು ಮಂದಿ ಹಸಿವಿನಿಂದಲೇ ಸಾಯಬಹುದು ವಿಶ್ವದಲ್ಲಿ ಬಡತನ ವಿರುದ್ಧ ಹೋರಾಡುತ್ತಿರುವ ಸರಕಾರೇತರ ಸಂಘಟನೆ ಆಕ್ಸ್‌ಫಾಮ್‌ ಹೇಳಿದೆ.

ಸುಮಾರು 12.2 ಕೋಟಿಗೂ ಹೆಚ್ಚು ಮಂದಿಯನ್ನು ಕೋವಿಡ್‌ ಬಡತನಕ್ಕೆ ದೂಡಬಹುದು. ಸಾಮೂಹಿಕ ನಿರುದ್ಯೋಗ, ನೆರವು ಸಿಗದೇ ಇರುವುದು, ಆಹಾರದ ಅಲಭ್ಯತೆ, ಆಹಾರ ಉತ್ಪಾದನೆಯಲ್ಲಿ ತೊಡಕುಗಳಿಂದ ಹೀಗಾಗಬಹುದು ಎಂದು ಹೇಳಿದೆ.

ಇದರೊಂದಿಗೆ ಕೋವಿಡ್‌ನಿಂದಲೂ ಹಸಿವಿನ ವೈರಸ್‌ ತೀವ್ರವಾಗುವ ಸಾಧ್ಯತೆ ಇದ್ದು ವಿಶ್ವಾದ್ಯಂತ ಇದು ದಿನವೊಂದಕ್ಕೆ 12 ಸಾವಿರ ಮಂದಿಯನ್ನು ಬಲಿಪಡೆಯುವ ಸಾಧ್ಯತೆಯೂ ಇದೆ. ಅಫ್ಘಾನಿಸ್ಥಾನ, ಸಿರಿಯಾ, ದಕ್ಷಿಣ ಸೂಡಾನ್‌ಗಳಲ್ಲಿ ಹಸಿವಿನ ಸಮಸ್ಯೆ ಹಿಂದೆದಿಗಿಂತಲೂ ಹೆಚ್ಚಾಗಿದೆ ಎಂದು ಅದು ಹೇಳಿದೆ.
ಎಪ್ರಿಲ್‌ನಲ್ಲಿ ಕೋವಿಡ್‌ನಿಂದಾಗಿ ವಿಶ್ವಾದ್ಯಂತ ಮೃತರ ಪ್ರಮಾಣ ದಿನವೊಂದಕ್ಕೆ 10 ಸಾವಿರಷ್ಟು ಆಗಿತ್ತು ಎಂದು ಅದು ಹೇಳಿದೆ.

ಉದಾಹರಣೆಗೆ ಅಫ್ಘಾನಿಸ್ಥಾನ ವೊಂದರಲ್ಲೇ ಆಹಾರದ ಕ್ಷಾಮ 2019ರಲ್ಲಿ 25 ಲಕ್ಷ ಮಂದಿಯನ್ನು ತಟ್ಟಿದ್ದು, 2020ರ ಮೇ ವೇಳೆಗೆ ಇದು 35 ಲಕ್ಷಕ್ಕೇರಿದೆ. ಲಾಕ್‌ಡೌನ್‌ ನಿಯಮಾವಳಿಗಳು ಇತ್ಯಾದಿಗಳಿಂದ ವಿವಿಧ ದೇಶಗಳ ಗಡಿಗಳು ಮುಚ್ಚಿದ್ದು ಅದರ ಪರಿಣಾಮ ದೇಶಗಳ ಮೇಲೆ ಆಗಿವೆ. ಅಫ್ಘಾನಿಸ್ಥಾನಕ್ಕೆ ಇರಾನ್‌ ಗಡಿ ಮುಚ್ಚಿದ್ದು ಪರಿಣಾಮ ಬೀರಿದೆ. ಇದರೊಂದಿಗೆ ಅಭಿವೃದ್ಧಿ ಹೊಂದುತ್ತಿರುವ ದೇಶಗಳಾದ ಬ್ರಜಿಲ್‌, ಭಾರತ, ದಕ್ಷಿಣ ಆಫ್ರಿಕಾದಲ್ಲೂ ಹಸಿವಿನ ಪ್ರಮಾಣ ಹೆಚ್ಚುವ ಅಪಾಯವಿದೆ. ಹಸಿವಿನ ಸಮಸ್ಯೆಯನ್ನು ಪರಿಹರಿಸಲು ಇದೀಗ ವಿಶ್ವ ವಿನಿಯೋಗಿಸುತ್ತಿರುವ ನಿಧಿಯ 10 ಪಟ್ಟು ಹೆಚ್ಚು ನಿಧಿ ಅಗತ್ಯವಿದೆ ಎಂದು ಆಕ್ಸ್‌ಫಾಮ್‌ ಹೇಳಿದೆ.