ಕೋವಿಡ್ 19; 65ವರ್ಷದ ನಿವೃತ್ತ ಬಿಎಸ್ ಎಫ್ ವ್ಯಕ್ತಿ ಸಾವು, ಈಶಾನ್ಯ ರಾಜ್ಯದಲ್ಲಿ ಮೊದಲ ಸಾವು

Team Udayavani, Apr 10, 2020, 10:04 AM IST

Representative Image

ನವದೆಹಲಿ:ಮಾರಣಾಂತಿಕ ಕೋವಿಡ್ 19 ವೈರಸ್ ಗೆ 65 ವರ್ಷದ ವ್ಯಕ್ತಿಯೊಬ್ಬರು ಶುಕ್ರವಾರ ಅಸ್ಸಾಂ ರಾಜ್ಯದಲ್ಲಿ ಸಾವನ್ನಪ್ಪುವ ಮೂಲಕ ಈಶಾನ್ಯ ರಾಜ್ಯಗಳಲ್ಲಿ ಕೋವಿಡ್ ಸೋಂಕಿಗೆ ಮೊದಲ ಬಲಿಯಾದಂತಾಗಿದೆ ಎಂದು ವರದಿ ತಿಳಿಸಿದೆ.

“ಇದೊಂದು ತುಂಬಾ ದುಃಖದ ಸಂಗತಿ, ಅಸ್ಸಾಂನ ಫೈಜುಲ್ ಹಾಖ್ವಿ ಬಾರ್ಭಾಯನ್ (65ವರ್ಷ) ಹೈಲಾಕಾಂಡಿ ಜಿಲ್ಲೆಯಲ್ಲಿ ಇಂದು ಬೆಳಗ್ಗೆ ಕೋವಿಡ್ 19 ಸೋಂಕಿನಿಂದ ಸಾವನ್ನಪ್ಪಿರುವುದಾಗಿ ತಿಳಿಸಲು ವಿಷಾದಪಡುತ್ತೇನೆ. ಅವರ ಕುಟುಂಬ ಧೈರ್ಯ ತಂದುಕೊಳ್ಳಲಿ” ಎಂದು ಅಸ್ಸಾಂ ಆರೋಗ್ಯ ಸಚಿವ ಹಿಮಂತ್ ಬಿಸ್ವಾ ಶರ್ಮಾ ಟ್ವೀಟ್ ಮಾಡಿದ್ದಾರೆ.

65ವರ್ಷದ ನಿವೃತ್ತ ಬಿಎಸ್ ಎಫ್ ಯೋಧರಾಗಿದ್ದ ಫೈಜುಲ್ ಅವರ ಆರೋಗ್ಯ ಸ್ಥಿತಿ ತೀರಾ ಹದಗೆಟ್ಟಿದ್ದರಿಂದ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಗುರುವಾರ ಸಂಜೆ ಬಳಿಕ ಎಸ್ ಎಂ ಸಿಎಚ್ ಆಸ್ಪತ್ರೆಗೆ ಸ್ಥಳಾಂತರಿಸಲಾಗಿತ್ತು ಎಂದು ವರದಿ ತಿಳಿಸಿದೆ.

ಫೈಜುಲ್ ಅವರಿಗೆ ಕೋವಿಡ್ 19 ವೈರಸ್ ಇದ್ದಿರುವುದು ಮಂಗಳವಾರ ದೃಢಪಟ್ಟಿತ್ತು. ಈ ವ್ಯಕ್ತಿ ದಿಲ್ಲಿಯಲ್ಲಿ ನಡೆದ ತಬ್ಲಿಘಿ ಜಮಾತ್ ನಲ್ಲಿ ಪಾಲ್ಗೊಂಡಿದ್ದರು. ನವದೆಹಲಿಗೆ ಆಗಮಿಸುವ ಮುನ್ನ ಸೌದಿ ಅರೇಬಿಯಾಕ್ಕೆ ಭೇಟಿ ಕೊಟ್ಟಿರುವುದಾಗಿ ಸಚಿವರು ತಿಳಿಸಿದ್ದಾರೆ.