ಕೋವಿಡ್‌ ಪರಿಹಾರ ಚೆಕ್‌ಗಳಲ್ಲಿ ಟ್ರಂಪ್‌ ನಾಮ

Team Udayavani, Apr 16, 2020, 3:11 PM IST

ವಾಷಿಂಗ್ಟನ್‌: ಶ್ವೇತ ಭವನದಲ್ಲಿ ಅಧ್ಯಕ್ಷ ಟ್ರಂಪ್‌ ಖಾಸಗಿ ಆಸ್ಪತ್ರೆಗಳ ಮುಖ್ಯಸ್ಥರ ಸಲಹೆ, ಸೂಚನೆಗಳನ್ನು ಆಲಿಸಿದರು.

ವಾಷಿಂಗ್ಟನ್‌: ಕೋವಿಡ್‌ ಸಂತ್ರಸ್ತರಿಗೆ ನೀಡುವ ಪರಿಹಾರದ ಚೆಕ್‌ನಲ್ಲಿ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಹೆಸರು ಇರಲಿದೆ. ಈ ಕುರಿತು ಅಮೆರಿಕ ಸರಕಾರ ಆದೇಶ ಹೊರಡಿಸಿದೆ. ಕೋವಿಡ್‌ನಿಂದಾಗಿ ಸಂತ್ರಸ್ತರಾಗಿರುವ ಲಕ್ಷಗಟ್ಟಲೆ ಜನರಿಗೆ ಅಮೆರಿಕ ಸರಕಾರ ಉತ್ತೇಜನಾ ಪರಿಹಾರ ನೀಡಲಿದೆ. ಆದರೆ ಚೆಕ್‌ಗಳಲ್ಲಿ ಟ್ರಂಪ್‌ ಹೆಸರು ಮುದ್ರಿಸುವ ನಿರ್ಧಾರದಿಂದಾಗಿ ಪರಿಹಾರ ವಿತರಣೆ ವಿಳಂಬವಾಗಲಿದೆ ಎಂಬ ಟೀಕೆ ವ್ಯಕ್ತವಾಗಿದೆ.

ಅಮೆರಿಕದ ಕಂದಾಯ ಇಲಾಖೆಯ ಬಹುತೇಕ ಅಧಿಕಾರಿಗಳು ಮನೆಯಿಂದ ಕೆಲಸ ಮಾಡುತ್ತಿದ್ದಾರೆ. ಹೀಗಿರುವಾಗ ಟ್ರಂಪ್‌ ಹೆಸರು ಮುದ್ರಿಸುವ ನಿರ್ಧಾರದಿಂದ ಪರಿಹಾರ ವಿತರಣೆ ವಿಳಂಬವಾಗುವುದು ಖಚಿತ ಎಂದು ವಿರೋಧ ಪಕ್ಷದವರೂ ಹೇಳುತ್ತಿದ್ದಾರೆ. ಇದರ ಮಧ್ಯೆ ಇಂಥದೊಂದು ಪ್ರಚಾರ ಪಡೆಯುವ ತಂತ್ರ ಈ ಹೊತ್ತಿನಲ್ಲಿ ಅಗತ್ಯವಿತ್ತೇ? ಸೂಕ್ತವಾದುದೇ ಎಂಬ ಟೀಕೆಯೂ ಕೇಳಿಬರುತ್ತಿದೆ. ಹಾಗೆಂದು ಟ್ರಂಪ್‌ ಹೆಸರು ಮುದ್ರಿಸುವ ನಿರ್ಧಾರವನ್ನು ಸರಕಾರ ಬದಲಿಸಿಲ್ಲ.

1,200 ಡಾಲರ್‌ ಪರಿಹಾರ
ಕೋವಿಡ್‌ ಪರಿಹಾರಕ್ಕಾಗಿ ಅಮೆರಿಕ ಸರಕಾರ 2.3 ಲಕ್ಷ ಕೋಟಿ ಡಾಲರ್‌ನ ಪರಿಹಾರ ಪ್ಯಾಕೇಜ್‌ ಘೋಷಿಸಿದೆ. ಇದರಂಗವಾಗಿ ಲಕ್ಷಗಟ್ಟಲೆ ಸಂತ್ರಸ್ತರಿಗೆ 1,200 ಡಾಲರ್‌ನ ಪರಿಹಾರ ಚೆಕ್‌ ಕಳುಹಿಸಲಾಗುವುದು. ಆದರೆ ಈ ಚೆಕ್‌ಗಳಲ್ಲಿ ತನ್ನ ಹೆಸರನ್ನು ಮುದ್ರಿಸಿಕೊಳ್ಳುವ ಮೂಲಕ ಟ್ರಂಪ್‌ ನವಂಬರ್‌ನಲ್ಲಿರುವ ಚುನಾವಣೆಗೆ ತಯಾರಿ ಮಾಡುತ್ತಿದ್ದಾರೆಂಬ ಟೀಕೆಗಳು ಕೇಳಿ ಬಂದಿವೆ ಎಂಬುದಾಗಿ ವಾಷಿಂಗ್ಟನ್‌ ಪೋಸ್ಟ್‌ ವರದಿ ಮಾಡಿದೆ.

ನೆಲಕಚ್ಚಿರುವ ಆರ್ಥಿಕತೆಯನ್ನು ಉತ್ತೇಜಿಸುವ ಸಲುವಾಗಿ ಸರಕಾರ ಈ ಉತ್ತೇಜನಾ ಪರಿಹಾರವನ್ನು ನೀಡಿದೆ. ಚೆಕ್‌ ಮೆಮೊ ಲೈನ್‌ನಲ್ಲಿ ಟ್ರಂಪ್‌ ಹೆಸರು ಮುದ್ರಿಸಲಾಗುವುದು. ಇದನ್ನು ಎಕಾನಾಮಿಕ್‌ ಇಂಪ್ಯಾಕ್ಟ್ ಪೇಮೆಂಟ್‌ ಎಂದು ಹೆಸರಿಸಲಾಗಿದೆ.