ಬರದಲ್ಲೂ ಕೈ ಹಿಡಿದ ಮೆಣಸಿನಕಾಯಿ ಬೆಳೆ

Team Udayavani, Aug 2, 2019, 10:07 AM IST

ಔರಾದ: ಮಳೆಗಾಂವ ತಾಂಡಾದ ನಿವಾಸಿ ರಾಮರಾವ್‌ ರೂಪಲಾ ಜಾಧವ ಅವರ ಹೊಲದಲ್ಲಿ ಬೆಳೆದ ಮೆಣಸಿನ ಕಾಯಿ ಸಂಗ್ರಹಿಸುತ್ತಿರುವುದು

ಔರಾದ: ಪ್ರಸಕ್ತ ಸಾಲಿನಲ್ಲಿ ತಾಲೂಕಿನಲ್ಲಿ ಉತ್ತಮ ಮಳೆಯಾಗದಿದ್ದರೂ ಕಮಲನಗರ ತಾಲೂಕಿನ ಚಿಮ್ಮೆಗಾಂವ ಗ್ರಾಪಂ ವ್ಯಾಪ್ತಿಯ ಮಳೆಗಾಂವ ತಾಂಡಾದ ರೈತ ರಾಮರಾವ್‌ ರೂಪಲಾ ಜಾಧವ ಕಡಿಮೆ ನೀರು ಬಳಸಿ ಉತ್ತಮ ಬೆಳೆ ಬೆಳೆದು ಸಾವಿರಾರು ರೂಪಾಯಿ ಸಂಪಾದನೆ ಮೂಲಕ ಇತರ ರೈತರಿಗೆ ಮಾದರಿಯಾಗಿದ್ದಾರೆ.

ಎರಡು ವರ್ಷಗಳಿಂದ ತಾಲೂಕಿನಲ್ಲಿ ವಾಡಿಕೆ ಮಳೆಯಾಗಿಲ್ಲ. ಆದರೂ ರೈತ ರಾಮರಾವ್‌ ರೂಪಲಾ ಜಾಧವ ತಮ್ಮ ಎರಡು ಎಕರೆ ಭೂಮಿಯಲ್ಲಿ ಹನಿ ನೀರಾವರಿ ಮೂಲಕ ಮಾದರಿ ಕೃಷಿ ಕಾಯಕ ಮಾಡುತ್ತಿದ್ದಾರೆ. ಪ್ರಸಕ್ತ ಸಾಲಿನಲ್ಲಿ ತಾಲೂಕಿನಲ್ಲಿ ಬರ ಆವರಿಸಿ ಕುಡಿಯುವ ನೀರಿಗಾಗಿ ಜನರು ಸಮಸ್ಯೆ ಎದುರಿಸುವ ಸ್ಥಿತಿ ಬಂದಿತ್ತು. ಇದೀಗ ಮಳೆಗಾಲ ಆರಂಭವಾಗಿ ಎರಡು ತಿಂಗಳು ಕಳೆದರೂ ಕೂಡ ತಾಲೂಕಿನ ಅರವತ್ತು ಗ್ರಾಮಗಳಲ್ಲಿ ನಿತ್ಯ ಟ್ಯಾಂಕರ್‌ ಮೂಲಕ ನೀರು ಸರಬರಾಜು ಮಾಡಲಾಗುತ್ತಿದೆ. ಇಂಥ ಕಠಿಣ ಪರಿಸ್ಥಿತಿಯಲ್ಲಿ ತೋಟಗಾರಿಕೆ ಇಲಾಖೆಯ ಅಧಿಕಾರಿಗಳ ಸಹಕಾರ ಪಡೆದು ಹನಿ ನೀರಾವರಿ ಮೂಲಕ ತಮ್ಮ ಹೊಲದಲ್ಲಿ ಉತ್ತಮ ಬೆಳೆ ಬೆಳೆದಿದ್ದಾರೆ.

ಹನಿ ನೀರಾವರಿ ಮೂಲಕ ಹೊಲದಲ್ಲಿನ ಕೊಳವೆ ಬಾವಿಯ ನೀರುಣಿಸಿ ನಾಲ್ಕು ವರ್ಷಗಳಿಂದ ದಾಖಲೆ ಪ್ರಮಾಣದಲ್ಲಿ ಆದಾಯ ಸಂಪಾದನೆ ಮಾಡುತ್ತಿದ್ದಾರೆ. ಮೆಣಸಿನಕಾಯಿ ಮೂರು ತಿಂಗಳ ಬೆಳೆಯಾಗಿದ್ದು ಮೂರು ತಿಂಗಳಿಗೆ ಪ್ರತಿ ಎಕರೆಗೆ 3ರಿಂದ 4 ಲಕ್ಷ ರೂ. ಸಂಪಾದನೆ ಮಾಡುತ್ತಾ ಬಂದಿದ್ದಾರೆ. ಹಿಗಾಗಿ ನಾಲ್ಕು ವರ್ಷಗಳಿಂದ ಮೆಣಸಿನಕಾಯಿ ಬೆಳೆದು ಆರ್ಥಿಕ ಸಮಸ್ಯೆಗೆ ಶಾಶ್ವತ ಮುಕ್ತಿ ಕಂಡುಕೊಂಡಿದ್ದಾರೆ.

ನೆರೆ ರಾಜ್ಯದಲ್ಲಿ ಮಾರಾಟ: ರೈತ ರಾಮರಾವ್‌ ರೂಪಲಾ ಸೇರಿದಂತೆ ಇನ್ನಿತರ ರೈತರು ಕೂಡ ಗಡಿ ತಾಲೂಕಿನಲ್ಲಿ ತಮ್ಮ ಬೆಳೆಗಳಿಗೆ ಉತ್ತಮ ಬೆಲೆ ಸಿಗುವುದಿಲ್ಲವೆಂದು ನೆರೆಯ ಮಹಾರಾಷ್ಟ್ರದ ಉದಗೀರ, ದೇಗಲೂರ ಹಾಗೂ ತೆಲಂಗಾಣಾದ ಜಹಿರಾಬಾದ ತರಕಾರಿ ಮಾರುಕಟ್ಟೆಯಲ್ಲಿ ಮಾರಾಟ ಮಾಡುತ್ತಾರೆ.

ಔರಾದ ಪಟ್ಟಣದ ತರಕಾರಿ ಮಾರುಕಟ್ಟೆಯಲ್ಲಿ ರೈತರು ತಾವು ಬೆಳೆದ ತರಕಾರಿ ಮಾರಾಟ ಮಾಡಿದರೂ ವ್ಯಾಪಾರಿಗಳು ವಾರದ ನಂತರವೇ ರೈತರಿಗೆ ಹಣ ನೀಡುತ್ತಾರೆ. ಹಾಗಾಗಿ ರೈತರು ನೆರೆ ರಾಜ್ಯದ ಮಾರುಕಟ್ಟೆಯಲ್ಲಿ ಮಾರಾಟ ಮಾಡಿ ತಕ್ಷಣ ಹಣ ಪಡೆಯುತ್ತಾರೆ. ಹೀಗೆ ನಗದು ರೂಪದ ವ್ಯವಹಾರಕ್ಕೆ ಬೆರೆ ರಾಜ್ಯಗಳ ಮಾರುಕಟ್ಟೆಗೆ ತೆರಳಿ ವ್ಯಾಪಾರ ಮಾಡುತ್ತಿದ್ದಾರೆ.

ತಾಲೂಕಿನಲ್ಲಿ ಮಳೆ-ಬೆಳೆ ಇಲ್ಲದಿರುವುದರಿಂದ ಆದಾಯವಿಲ್ಲದೇ ಕಂಗಾಲಾದ ರೈತರು ಒಂದೆಡೆ ಇದ್ದರೆ, ಕಡಿಮೆ ನೀರಿನಲ್ಲೇ ಉತ್ತಮ ಬೆಳೆ ಬೆಳೆದು ಕೈ ತುಂಬ ಹಣ ಸಂಪಾದನೆ ಮಾಡುವವರೂ ಇದ್ದಾರೆ ಎಂಬುದಕ್ಕೆ ಈ ರೈತ ನಿದರ್ಶನ. ಎರಡು ಎಕರೆ ಭೂಮಿಯಲ್ಲೇ ವಾರಕ್ಕೆ 20 ಕ್ವಿಂಟಲ್ ಮೆಣಸಿನಕಾಯಿ ಇಳುವರಿ ಬರುತ್ತಿದೆ ಎನ್ನುತ್ತಾರೆ ರೈತ ರಾಮರಾವ್‌ ರೂಪಲಾ. ನಾಲ್ಕು ವರ್ಷಗಳಿಂದ ನಿರಂತರವಾಗಿ ಮೆಣಸಿನಕಾಯಿ ಬೆಳೆದು ನಿರೀಕ್ಷೆಗೆ ಮೀರಿ ಸಂಪಾದನೆ ಮಾಡುತ್ತಿದ್ದಾರೆ. ಅಲ್ಲದೇ ಅಕ್ಕ ಪಕ್ಕದ ಹೊಲದ ರೈತರಿಗೂ ಕೂಡ ಮೆಣಸಿನಕಾಯಿ ಬೆಳೆಯುವಂತೆ ಪ್ರೇರಣೆ ನೀಡಿ, ಸಕಾಲಕ್ಕೆ ರಸಗೊಬ್ಬರ ಹಾಗೂ ಔಷಧ ಸಿಂಪರಣೆ ಬಗ್ಗೆ ಮಾಹಿತಿ ನೀಡುತ್ತಿದ್ದಾರೆ.