ಇಂದಿನಿಂದ ದಿನವಿಡೀ ಅಂಗಡಿ ಓಪನ್‌

Team Udayavani, May 26, 2020, 6:47 AM IST

ಬಾಗಲಕೋಟೆ: ಕೋವಿಡ್  ವೈರಸ್‌ ನಿಯಂತ್ರಣಕ್ಕಾಗಿ ಕಳೆದ ಮಾರ್ಚ್‌ 24ರ ರಾತ್ರಿಯಿಂದಲೇ ಬಂದ್‌ ಆಗಿದ್ದ ಅಂಗಡಿ-ಮುಂಗ್ಗಟ್ಟುಗಳು ಮೇ 3ರ ಬಳಿಕ ಮಧ್ಯಾಹ್ನದ ವರೆಗೆ ಓಪನ್‌ ಆಗಿದ್ದು, ಮೇ 26ರಿಂದ ದಿನವಿಡೀ ಓಪನ್‌ ಮಾಡಲು ಜಿಲ್ಲಾಡಳಿತ ಅನುಮತಿ ನೀಡಿದೆ.

ಸರ್ಕಾರದ ಎಲ್ಲ ನಿಯಮಗಳಿಗೆ ಒಳಪಟ್ಟು ಪ್ರತಿದಿನ ಬೆಳಗ್ಗೆ 9ರಿಂದ ಸಂಜೆ 6ರ ವರೆಗೆ ಎಲ್ಲ ರೀತಿಯ ಅಂಗಡಿಗಳನ್ನು ಓಪನ್‌ ಮಾಡಲು ಆದೇಶಿಸಿದ್ದು, ಸಾಮಾಜಿಕ ಅಂತರ ಕಾಯ್ದುಕೊಳ್ಳುವ ಜತೆಗೆ ಮಾಸ್ಕ ಕಡ್ಡಾಯವಾಗಿ ಧರಿಸಬೇಕು. ಆಯಾ ಅಂಗಡಿಗಳಿಗೆ ಜಿಲ್ಲಾಡಳಿತ ನೀಡಿದ ಷರತ್ತುಗಳನ್ನು ಕಡ್ಡಾಯವಾಗಿ ಪಾಲಿಸಿ, ವ್ಯಾಪಾರ ವಹಿವಾಟು ನಡೆಸಬೇಕು ಎಂದು ಸೂಚಿಸಲಾಗಿದೆ.

ಈವರೆಗೆ ಪ್ರತಿದಿನ ಬೆಳಗ್ಗೆ 7-30ರಿಂದ ಮಧ್ಯಾಹ್ನ 1ರ ವರೆಗೆ ಮಾತ್ರ ಅಂಗಡಿಗಳನ್ನು ತೆರೆಯಲು ಅನುಮತಿ ನೀಡಲಾಗಿತ್ತು. ಮಂಗಳವಾರದಿಂದ ಬೆಳಗ್ಗೆ 9ರಿಂದ ಸಂಜೆ 6ರವರೆಗೆ ಅಂಗಡಿಗಳನ್ನು ತೆರೆಯಲು ಜಿಲ್ಲಾಧಿಕಾರಿಗಳು ಅನುಮತಿ ನೀಡಿದ್ದಾರೆ ಎಂದು ಎಸ್ಪಿ ಲೋಕೇಶ ಜಗಲಾಸರ ಉದಯವಾಣಿಗೆ ತಿಳಿಸಿದರು.

ರಂಜಾನ್‌ದಲ್ಲೂ ವ್ಯಾಪಾರ: ಸೋಮವಾರ ರಂಜಾನ್‌ ಹಬ್ಬದಂದು ಜಿಲ್ಲೆಯಲ್ಲಿ ವ್ಯಾಪಾರ ವಹಿವಾಟು ನೀರಸವಾಗಿ ನಡೆಯಿತು. ಸಾರಿಗೆ ಸಂಸ್ಥೆಗಳ ಬಸ್‌ಗಳೂ ರಸ್ತೆಗಳಿದವು. ಆದರೆ, ಪ್ರಯಾಣಿಕರ ಸಂಖ್ಯೆ ತೀರಾ ಕಡಿಮೆಯಿತ್ತು.