ಕುಳಗೇರಿಯಲ್ಲಿ ಹೆಚ್ಚಿ‌ ಬೈಕ್‌ ಕಳ್ಳತನ

Team Udayavani, Jun 23, 2021, 5:00 PM IST

ಕುಳಗೇರಿ ಕ್ರಾಸ್‌: ಗ್ರಾಮದ ಮನೆಗಳ ಮುಂಭಾಗದಲ್ಲಿ ಪಾರ್ಕ್‌ ಮಾಡಿದ್ದ ಬೈಕ್‌ ಗಳಲ್ಲಿನ ಪೆಟ್ರೋಲ್‌, ರಸ್ತೆಬದಿ ನಿಂತ ಲಾರಿಗಳ ಡೀಸೆಲ್‌ ಕಳ್ಳತನ ಮಾಡುತ್ತಿದ್ದ ಕಳ್ಳರು, ಇದೀಗ ಗ್ರಾಮದಲ್ಲಿನ ಬೈಕ್‌ ಕಳ್ಳತನ ಮಾಡುತ್ತಿದ್ದಾರೆ. ಇದರಿಂದ ಬೆ„ಕ್‌ ಕಳೆದುಕೊಂಡ ಮಾಲೀಕರು ಹಾಗೂ ಗ್ರಾಮಸ್ಥರು ಆತಂಕ ಪಡುವಂತಾಗಿದೆ.

ಕಳೆದ ಎರಡು ದಿನಗಳ ಹಿಂದೆ ಅದೆ ಕ್ಲಿನಿಕ್‌ ಮುಂಭಾಗದಲ್ಲಿ ಲಾಕ್‌ ಮಾಡಿ ನಿಲ್ಲಿಸಿದ್ದ ಮತ್ತೂಂದು ಬೈಕ್‌ನ ಲಾಕ್‌ ಮುರಿದ ಕಳ್ಳರು ಎರಡು ತಿಂಗಳ ಅಂತರದಲ್ಲಿ ಎರಡು ಬೈಕ್‌ ಕಳ್ಳತನ ಮಾಡಿದ್ದಾರೆ. ಈ ದೃಶ್ಯ ಸಿಸಿ ಕ್ಯಾಮೆರಾದಲ್ಲಿ ಸೆರೆಯಾಗಿದ್ದು, ಠಾಣೆಗೆ ದೂರು ಸಹ ನೀಡಿದ್ದಾರೆ.

ಹಾಡ ಹಗಲೇ ಕಳ್ಳತನ: ಜೂನ್‌ 20ರಂದು ಮಧ್ಯಾಹ್ನ 3 ಗಂಟೆಗೆ ಗ್ರಾಮದ ಪೊಲೀಸ್‌ ಠಾಣೆಯ ಎದುರಿಗೆ ಹೊಟೇಲ್‌ ಮಾಲಿಕನ ಹಿರೋಹೋಂಡಾ ಬೈಕ್‌ ಕಳ್ಳತನವಾಗಿದೆ. ಗ್ರಾಮದಲ್ಲಿ ಸಾಕಷ್ಟು ಕಳ್ಳತನ ಪ್ರಕರಣಗಳು ನಡೆಯುತ್ತಿದ್ದು ಈ ಬಗ್ಗೆ ಠಾಣೆಗೆ ದೂರು ನೀಡಿದ್ದರೂ ಯಾವುದೆ ಪ್ರಯೋಜನವಾಗುತ್ತಿಲ್ಲ. ಈ ಹಿಂದೆ ಸಾಕಷ್ಟು ಬೈಕ್‌ ಕಳ್ಳತನವಾಗಿದ್ದರೂ ಬೈಕ್‌ ಕಳ್ಳರ ಸುಳಿವೇ ಸಿಗುತ್ತಿಲ್ಲ ಎಂಬುದೆ ಗ್ರಾಮಸ್ಥರ ಆರೋಪವಾಗಿದೆ.

ಗ್ರಾಮದ ಸಂಗೊಳ್ಳಿ ರಾಯಣ್ಣ ವೃತ್ತದಲ್ಲಿ ಬಂದು ಸೇರುವ ರಾಜ್ಯ ಹಾಗೂ ರಾಷ್ಟ್ರೀಯ ಹೆದ್ದಾರಿಗಳ ಚಲನ-ವಲನ ಸೆರೆಹಿಡಿಯಲು ದೊಡ್ಡದಾದ ಸಿಸಿ ಕ್ಯಾಮೆರಾ ಅಳವಡಿಸಲಾಗಿದೆ. ಆದರೆ, ಸುಮಾರು ವರ್ಷಗಳಿಂದ ಸಿಸಿ ಕ್ಯಾಮೆರಾ ಕೆಟ್ಟು ಹೋಗಿದ್ದು, ದುರಸ್ತಿ ಮಾಡುವ ಗೋಜಿಗೆ ಹೋಗಿಲ್ಲ.