ಕುಡಿಯುವ ನೀರು ಪೂರೈಕೆ ಯೋಜನೆ ವಿಫಲ

Team Udayavani, Jan 25, 2017, 12:48 PM IST

ಬಾಗಲಕೋಟೆ: ಕಳೆದ ಬಿಜೆಪಿ ಸರ್ಕಾರದ ಐದು ವರ್ಷಗಳ ಅವಧಿಯಲ್ಲಿ ಪ್ರತಿ ಬಾರಿ ಚರ್ಚೆಗೆ ಬರುತ್ತಿದ್ದ ಬಹುಹಳ್ಳಿ ಕುಡಿಯುವ ನೀರು ಪೂರೈಕೆ (ಎಂವಿಎಸ್‌) ಯೋಜನೆಗಳ ವೈಫಲ್ಯತೆ ಕುರಿತು 2016-17ನೇ ಆರ್ಥಿಕ ವರ್ಷದ ಕೊನೆಯ ಕೆಡಿಪಿ ಸಭೆಯಲ್ಲೂ ಸುದೀಘ್ರ ಚರ್ಚೆ ನಡೆಯಿತು. 

ಉಮಾಶ್ರೀ ಅವರು ಉಸ್ತುವಾರಿ ಸಚಿವರಾದ ಬಳಿಕ ಜಿ.ಪಂ. ಸಭಾ ಭವನದಲ್ಲಿ ಮೊದಲ ಬಾರಿಗೆ ನಡೆದ ಕೆಡಿಪಿ ಸಭೆಯ ಅಧ್ಯಕ್ಷತೆ ವಹಿಸಿ ಮಾತನಾಡಿ, ಕುಡಿಯುವ ನೀರು ಪೂರೈಕೆ ಯೋಜನೆ ವಿಫಲಗೊಂಡಿದ್ದಕ್ಕೆ ತೀವ್ರ ಆಕ್ರೋಶ ವ್ಯಕ್ತಪಡಿಸಿದರು. ಸಚಿವರ ಆಕ್ರೋಶಕ್ಕೆ ಶಾಸಕ ಜೆ.ಟಿ. ಪಾಟೀಲ, ಜಿ.ಪಂ. ಉಪಾಧ್ಯಕ್ಷ ಮುತ್ತಪ್ಪ ಕೋಮಾರ ಕೂಡ ಧ್ವನಿಗೂಡಿಸಿದರು. 

ಜವಾಬ್ದಾರಿ ಅರಿತು ಕೆಲ್ಸ ಮಾಡಿ: ಅಧಿಕಾರಿಗಳು ತಮ್ಮ ಜವಾಬ್ದಾರಿಗಳನ್ನು ಅರಿತು ಜನಸಾಮಾನ್ಯರ ಅಹವಾಲುಗಳಿಗೆ ಸ್ಪಂದಿಸಿ ತಮ್ಮ ವ್ಯಾಪ್ತಿಯ ಕಾರ್ಯಗಳನ್ನು ಸಮರ್ಥವಾಗಿ ನಿರ್ವಹಿಸಬೇಕು. ಅಧಿಕಾರಿಗಳು ತಮ್ಮ ಇಲಾಖಾ ವ್ಯಾಪ್ತಿಯಯೋಜನಾ ಕಾರ್ಯಕ್ರಮ ನಿಗದಿತ ಅವಧಿಯಲ್ಲಿ ಪೂರ್ಣಗೊಳಿಸಿದಲ್ಲಿ ಜನಸಾಮಾನ್ಯರಿಗೆ ಅನುಕೂಲವಾಗಿದೆ ಎಂದರು. 

ಈ ಹಿಂದೆ ಜರುಗಿದ ಕೆಡಿಪಿ ಸಭೆಗಳಲ್ಲಿ ಜನಪ್ರತಿನಿಧಿಗಳು ನೀಡಿರುವ ಸೂಚನೆಗಳನ್ನು ಹಾಗೂ ಕಾರ್ಯಗಳನ್ನು ಪೂರ್ಣಗೊಳಿಸುವಂತೆ ಹಾಗೂ ಅನುಸರಣಾ ವರದಿಯಲ್ಲಿ ಕೈಗೊಂಡ ಕ್ರಮಗಳು ಅಪೂರ್ಣವಾಗಿದ್ದಲ್ಲಿ ಅವುಗಳನ್ನು ತಪ್ಪದೇ ಪೂರ್ಣಗೊಳಿಸಿ ತಮಗೆ ಮಾಹಿತಿ ನೀಡುವಂತೆ ಸಚಿವರು ಜಿ.ಪಂ ಸಿಇಒ ವಿಕಾಸ ಸುರಳಕರ ಅವರಿಗೆ ತಿಳಿಸಿದರು.

ಡಿಎಚ್‌ಒ ಜಗಳ ನಿಲ್ಲಿಸಿ: ಆರೋಗ್ಯ ಇಲಾಖೆಯಲ್ಲಿ ಕಡತಗಳು ಕಾಣೆಯಾಗಿರುವ ಪ್ರಶ್ನೆಗೆ ಉತ್ತರಿಸಿದ ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣಾಧಿಕಾರಿ ಡಾ|ರಾಜಕುಮಾರ ಯರಗಲ್ಲ, ಡಿಎಚ್‌ಓ ಕೊಠಡಿಯಲ್ಲಿರುವ ಅಲಮೇರಾದ ಕೀಲಿ ದೊರೆಯದೇ ನಂತರ ಜಿ.ಪಂ. ಉಪಕಾರ್ಯದರ್ಶಿಗಳ ನೇತೃತ್ವದಲ್ಲಿ ಪಂಚನಾಮೆ ಮಾಡಿ ಅಲಮೇರಾ ತೆಗೆಯಲಾಗಿ ಎಲ್ಲ ಕಡತಗಳು ದೊರಕಿರುವ ಬಗ್ಗೆ ತಿಳಿಸಿದರು. 

ಇದಕ್ಕೆ ಉತ್ತರಿಸಿದ ಸಚಿವೆ ಉಮಾಶ್ರೀ ಅವರು ಇಬ್ಬರು ಡಿಎಚ್‌ಓಗಳ ಮಧ್ಯೆ ಇರುವ ಮುಸಿಕಿನ ಗುದ್ದಾಟದಿಂದಾಗಿ ಇಲಾಖೆಯ ಕಾರ್ಯವೈಖ್ಯರಿ ಮೇಲೆ ಪರಿಣಾಮ ಬೀರುತ್ತಿದೆ. ಜನಸಾಮಾನ್ಯರಿಗೆ ತಪ್ಪು ಸಂದೇಶ ಹೋಗದಂತೆ ಅಧಿಕಾರಿಗಳು, ಪದೇ ಪದೇ ತಡೆಯಾಜ್ಞೆತಂದು ಒಮ್ಮೆ ಅವರು, ಇನ್ನೊಮ್ಮೆ ನೀವು ಅಧಿಕಾರ ವಹಿಸಿಕೊಂಡು ಗೊಂದಲಮೂಡಿಸಬೇಡಿ. ಹೀಗೆ ಮುಂದುವರೆದರೆ ಬೇರೆ  ರೀತಿಯೇ ಕ್ರಮ ಕೈಗೊಳ್ಳಬೇಕಾಗುತ್ತದೆ ಎಂದು ಎಚ್ಚರಿಕೆ ನೀಡಿದರು.

116 ಕೋಟಿ ಪರಿಹಾರಕ್ಕೆ ಪ್ರಸ್ತಾವನೆ: ಕೃಷಿ ಇಲಾಖೆಯ ಜಂಟಿ ನಿರ್ದೇಶಕ ಡಾ|ಪಿ. ರಮೇಶಕುಮಾರ ಮಾತನಾಡಿ, ಜಿಲ್ಲೆಯ ಆರು ತಾಲೂಕುಗಳನ್ನು ಸರಕಾರ ಬರಪೀಡಿತ ಪ್ರದೇಶಗಳೆಂದು ಘೋಷಿಸಿದೆ. ಕೃಷಿ ಹಾಗೂ ಕಂದಾಯ ಇಲಾಖೆಯ ಸಿಬ್ಬಂದಿಯಿಂದಆರು ತಾಲೂಕುಗಳ ಜಂಟಿ ಸಮೀಕ್ಷೆ  ಕೈಗೊಂಡು ಸರಕಾರಕ್ಕೆ ವರದಿ ಕಳುಹಿಸಲಾಗಿದೆ. ಒಟ್ಟು 1.43 ಲಕ್ಷ ಹೆಕ್ಟೇರ್‌ ಹಾನಿಯಾಗಿದ್ದು, 165545 ರೈತರನ್ನು ಪರಿಹಾರ ತಂತ್ರಾಂಶದಲ್ಲಿ ಎಂಟ್ರಿ ಮಾಡಲಾಗಿದೆ.

116.25 ಕೋಟಿ ಇನ್‌ಪುಟ್‌  ಸಬ್ಸಿಡಿಬೇಕೆಂದು ಸರಕಾರಕ್ಕೆ ವರದಿ ಸಲ್ಲಿಕೆಯಾಗಿದೆ ಎಂದು ತಿಳಿಸಿದರು.ಸಂಸದ ಪಿ.ಸಿ.ಗದ್ದಿಗೌಡರ, ಜಿ.ಪಂ. ಅಧ್ಯಕ್ಷೆ  ವೀಣಾ ಕಾಶಪ್ಪನವರ, ವಿಧಾನಪರಿಷತ್‌ ಸದಸ್ಯರಾದ ಎಚ್‌.ಆರ್‌.ನಿರಾಣಿ, ಆರ್‌.ಬಿ.ತಿಮ್ಮಾಪೂರ, ಜಿ.ಪಂ ಉಪಾಧ್ಯಕ್ಷ ಮುತ್ತಪ್ಪ ಕೋಮಾರ, ಜಿ.ಪಂ ಸಿಇಒ ವಿಕಾಸ ಸುರಳಕರ, ಎಸ್‌.ಪಿ ರಿಷ್ಯಂತ, ಅಪರ ಜಿಲ್ಲಾಧಿಕಾರಿ ಅಶೋಕ ದುಡಗುಂಟೆ ಮುಂತಾದವರು ಉಪಸ್ಥಿತರಿದ್ದರು.