2023ರವರೆಗೂ ನಾನು ಸಿಎಂ ಆಗಲ್ಲ: ಸಚಿವ ಮುರುಗೇಶ ನಿರಾಣಿ

Team Udayavani, Dec 10, 2021, 10:30 PM IST

ಬಾಗಲಕೋಟೆ: ವಿಜಯಪುರ ಶಾಸಕ ಬಸನಗೌಡ ಪಾಟೀಲ ಯತ್ನಾಳ ಈ ರಾಜ್ಯದ ದೊಡ್ಡ ನಾಯಕ. ಕೇಂದ್ರದಲ್ಲಿ ಸಚಿವರಾದವರು. ಈಗ ಹಿರಿಯ ಶಾಸಕರಾಗಿ ಕೆಲಸ ಮಾಡುತ್ತಿದ್ದಾರೆ.

ಸಂಕ್ರಾಂತಿ ಬಳಿಕ ಸಿಎಂ ಬದಲಾವಣೆಯಾಗುತ್ತಾರೆ ಎಂಬುದು ಸುಳ್ಳು. ಬಸವರಾಜ ಬೊಮ್ಮಾಯಿ ಅತ್ಯುತ್ತಮವಾಗಿ ಕೆಲಸ ಮಾಡುತ್ತಿದ್ದಾರೆ. 2023ರವರೆಗೂ ಅವರೇ ಮುಖ್ಯಮಂತ್ರಿಯಾಗಿ ಮುಂದುವರಿಯುತ್ತಾರೆ. ಅಲ್ಲಿವರೆಗೂ ನಾನು ಸಿಎಂ ಆಗುತ್ತೇನೆಂಬ ಕನಸು ಕೂಡ ಕಂಡಿಲ್ಲ ಎಂದು ಬೃಹತ್‌ ಮತ್ತು ಮಧ್ಯಮ ಕೈಗಾರಿಕೆ ಸಚಿವ ಮುರುಗೇಶ ನಿರಾಣಿ ಹೇಳಿದರು.

ಇದನ್ನೂ ಓದಿ:ರಾಜ್ಯದಲ್ಲಿಂದು 314 ಕೋವಿಡ್‌ ಸೋಂಕು ಪತ್ತೆ: ಇಬ್ಬರು ಸಾವು

ಪರಿಷತ್‌ ಚುನಾವಣೆ ಹಿನ್ನೆಲೆಯಲ್ಲಿ ಬೀಳಗಿ ಪಪಂನಲ್ಲಿ ಮತದಾನದ ಮಾಡಿದ ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, 2023ರ ಚುನಾವಣೆವರೆಗೂ ಸಿಎಂ ಬದಲಾವಣೆ ಇಲ್ಲ. ಅಲ್ಲಿವರೆಗೂ ನಾನು ಸಿಎಂ ಆಗುತ್ತೇನೆಂಬ ಕನಸೂ ಕಂಡಿಲ್ಲ. ನಾನು ಸಿಎಂ ಆಗುವ ಕುರಿತು ಹಿಂದೆಯೂ ಹೇಳಿಲ್ಲ. ಮುಂದೆಯೂ ಹೇಳುವುದಿಲ್ಲ. ನಾನೊಬ್ಬ ಪಕ್ಷದ ಶಿಸ್ತಿನ ಕಾರ್ಯಕರ್ತ. ಒಂದೂವರೆ ವರ್ಷ ನಾನು ಮಂತ್ರಿಯೇ ಆಗಿರಲಿಲ್ಲ. ಆಗ ರಾಜ್ಯದಲ್ಲಿ ಆರು ಸಕ್ಕರೆ ಕಾರ್ಖಾನೆ ಸ್ಥಾಪಿಸಿ ತೋರಿಸಿದ್ದೇನೆ. ಸಿಕ್ಕ ಅವಕಾಶ ಸದ್ಬಳಕೆ ಮಾಡಿಕೊಳ್ಳಬೇಕು. ಯತ್ನಾಳ ಅವರಂತೆ ನಾನು ಸಿಎಂ ಆಗುತ್ತೇನೆ ಎಂದು ಹಿಂದೆಯೂ ಹೇಳಿಲ್ಲ. ಮುಂದೆಯೂ ಹೇಳಲ್ಲ ಎಂದರು.