ರೈತ ಆರ್ಥಿಕವಾಗಿ ಅಭಿವೃದ್ಧಿ ಹೊಂದಲಿ

Team Udayavani, May 31, 2019, 2:28 PM IST

ಬೀಳಗಿ: ಪಟ್ಟಣದ ಕೃಷಿ ಇಲಾಖೆ ಆವರಣದಲ್ಲಿ ನಡೆದ ಕೃಷಿ ಅಭಿಯಾನಕ್ಕೆ ಶಾಸಕ ಮುರುಗೇಶ ನಿರಾಣಿ ಚಾಲನೆ ನೀಡಿದರು

ಬೀಳಗಿ: ಕೃಷಿ ಬೆಳೆಗಳ ಇಳುವರಿ, ಉತ್ಪಾದನೆ ವೃದ್ಧಿ ಪಡಿಸಲು ಹಾಗೂ ಕೃಷಿಯಲ್ಲಿ ನೂತನ ತಾಂತ್ರಿಕತೆ ಅಳವಡಿಸಿಕೊಂಡು ಕಡಿಮೆ ಖರ್ಚಿನಲ್ಲಿ ಅಧಿಕ ಲಾಭ ಗಳಿಸಲು ಮತ್ತು ಸುಸ್ಥಿರ ಕೃಷಿ ಅಭಿವೃದ್ಧಿಪಡಿಸಲು ಕೃಷಿ ಇಲಾಖೆ ಎಲ್ಲ ವರ್ಗದ ರೈತರಿಗಾಗಿ ಹಲವಾರು ಪ್ರಮುಖ ಯೋಜನೆಗಳನ್ನು ತಂದಿದೆ. ಕೃಷಿ ಯೋಜನೆ ಸದುಪಯೋಗ ಪಡಿಸಿಕೊಳ್ಳುವ ಮೂಲಕ ರೈ‌ರು ಆರ್ಥಿಕವಾಗಿ ಅಭಿವೃದ್ಧಿ ಹೊಂದಬೇಕು ಎಂದು ಶಾಸಕ ಮುರುಗೇಶ ನಿರಾಣಿ ಹೇಳಿದರು.

ಪಟ್ಟಣದ ಕೃಷಿ ಇಲಾಖೆ ಆವರಣದಲ್ಲಿ ಗುರುವಾರ ಹಮ್ಮಿಕೊಂಡ ಸಮಗ್ರ ಕೃಷಿ ಅಭಿಯಾನ ಕಾರ್ಯಕ್ರಮಕ್ಕೆ ಚಾಲನೆ ನೀಡಿ ಅವರು ಮಾತನಾಡಿದರು. ಕೃಷಿ ಅಭಿಯಾನ ವಾಹನವು ನಾಲ್ಕು ದಿನಗಳ ಕಾಲ, ತಾಲೂಕಿನ ಎಲ್ಲ 24 ಗ್ರಾಪಂಗಳಿಗೆ ಸಂಚರಿಸಲಿದೆ. ವಾಹನದಲ್ಲಿ ವಿವಿಧ ಇಲಾಖೆಯ ಕ್ಷೇತ್ರ ಮಟ್ಟದ ಸಿಬ್ಬಂದಿಗಳಿದ್ದು, ತೋಟಗಾರಿಕೆ, ಕೃಷಿ ಹಾಗೂ ಪಶುಸಂಗೋಪನೆ ಕುರಿತು ರೈತರಿಗೆ ಸಮಗ್ರ ಮಾಹಿತಿ ಒದಗಿಸಲಿದ್ದಾರೆ. ದೇಶದ ಅಭಿವೃದ್ಧಿಗೆ ಕೃಷಿ ಕ್ಷೇತ್ರದ ಪಾಲು ಬಹಳಷ್ಟಿದೆ. ಮೊದಲು ರೈತರು ಸಂಕಷ್ಟದಿಂದ ಹೊರಬರಬೇಕು ಎನ್ನುವ ಧ್ಯೇಯ ಸರಕಾರದ್ದಾಗಿದೆ ಎಂದರು.

ತಾಲೂಕಿನ ಎಲ್ಲ ಸವಳು-ಜವಳು ಭೂಮಿಯನ್ನು ಕೃಷಿ ಯೋಗ್ಯ ಭೂಮಿಗಳನ್ನಾಗಿ ಪರಿವರ್ತಿಸಲು ಸರಕಾರದಿಂದ ಹೆಚ್ಚಿನ ಅನುದಾನ ಬಳಕೆ ಮಾಡಿಕೊಳ್ಳಲು ಆದ್ಯತೆ ನೀಡಲಾಗುತ್ತಿದೆ. ಗಲಗಲಿ ಬ್ರಿಜ್‌ ಕಂ ಬ್ಯಾರೇಜ್‌ ಎತ್ತರಿಸುವ ಕಾಮಗಾರಿ ಭರದಿಂದ ಸಾಗಿದೆ. ಈ ಬ್ರಿಜ್‌ ಕಂ ಬ್ಯಾರೇಜ್‌ನಿಂದ ಎರಡು ಕೊಳವೆ ಮಾರ್ಗಗಳ ಮೂಲಕ ತಾಲೂಕಿನ ವಿವಿಧ ಕೆರೆ ತುಂಬುವ ಯೋಜನೆ ಹಾಕಿಕೊಳ್ಳಲಾಗಿದೆ. ಬೀಳಗಿ ಕೆರೆ ತುಂಬುವ ಯೋಜನೆ ಪೂರ್ಣಗೊಂಡಿದೆ. ಬೇಸಿಗೆ ಕಾರಣದಿಂದ ಕೆರೆಗೆ ನೀರು ಬಂದಿಲ್ಲ. ಮುಗಿದ ಕಾಮಗಾರಿ ಕುರಿತು ಕೆಲ ಗೆಳೆಯರು ಪ್ರತಿಭಟನೆ ಹಾಕಿಕೊಳ್ಳುವುದು ಸಮಂಜಸವಲ್ಲ. ಬೇರೆ ಅಭಿವೃದ್ಧಿ ಕಾಮಗಾರಿಗಳು ಆಗಬೇಕಿದ್ದರೆ ನಮ್ಮ ಗಮನ ಸೆಳೆಯಬಹುದು. ಕೃಷಿ ಕುರಿತು ತಿಳಿವಳಿಕೆ ನೀಡಲು ಯೋಜನೆ ಹಾಕಿಕೊಳ್ಳಲಾಗಿದೆ ಎಂದರು.

ಉಪಕೃಷಿ ನಿರ್ದೇಶಕ ಡಾ| ಎಲ್.ಐ.ರೂಢಗಿ, ಎಡಿಎ ಪರಶುರಾಮ ಗಣಿ, ಕೃಷಿ ಇಲಾಖೆಯ ಎಂ.ಎಚ್. ಉಳ್ಳಾಗಡ್ಡಿ, ಎಸ್‌.ಎಂ.ಕಳಸದ, ಎಸ್‌.ಎಸ್‌. ಕಟ್ಟಿಮನಿ, ಎಸ್‌.ಬಿ. ಸಣಮನಿ, ಬಿಜೆಪಿ ಮುಖಂಡ ಮಲ್ಲಪ್ಪ ಶಂಭೋಜಿ, ವಿಠuಲ ಬಾಗೇವಾಡಿ, ರಾಮಣ್ಣ ಕಾಳಪ್ಪಗೋಳ ಇದ್ದರು.