ಮಾರ್ಚ್‌ನಲ್ಲಿ ಅಭ್ಯರ್ಥಿಗಳ ಪಟ್ಟಿ

Team Udayavani, Dec 20, 2017, 9:54 AM IST

ಬಾಗಲಕೋಟೆ: ಮುಂಬರುವ ವಿಧಾನಸಭೆ ಚುನಾವಣೆಗೆ ಮಾರ್ಚ್‌ ನಲ್ಲಿ ಕಾಂಗ್ರೆಸ್‌ ಅಭ್ಯರ್ಥಿಗಳ ಪಟ್ಟಿ ಅಂತಿಮಗೊಳ್ಳಲಿದೆ. ಸೂಕ್ತರು, ಯೋಗ್ಯರು ಹಾಗೂ ಕಾರ್ಯಕರ್ತರ ಕಷ್ಟ-ಸುಖಗಳಿಗೆ ಸ್ಪಂದಿಸಿದವರಿಗೆ ಆದ್ಯತೆ ನೀಡಲಾಗುವುದು ಎಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ಹೇಳಿದರು.

ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ದೇಶದಲ್ಲಿ ಪ್ರಧಾನಿ ಮೋದಿ ಮತ್ತು ಅಮಿತ್‌ ಶಾ ಅಲೆ ಕುಗ್ಗುತ್ತಿದೆ. ಇದಕ್ಕೆ ಗುಜರಾತ್‌ ಚುನಾವಣೆಯೇ ಸಾಕ್ಷಿ. 40 ಸ್ಥಾನ ಇದ್ದ ಕಾಂಗ್ರೆಸ್‌ ಈಗ 80 ಸ್ಥಾನ ಪಡೆದಿದೆ. ಆ ಮೂಲಕ ಗುಜರಾತ್‌ನಲ್ಲಿ ನಿಜವಾಗಿ ಕಾಂಗ್ರೆಸ್‌ ಗೆದ್ದಿದ್ದು, ಬಿಜೆಪಿ ಸೋತಿದೆ. ಇದು ರಾಹುಲ್‌ ಗಾಂಧಿ ನಾಯಕತ್ವಕ್ಕೆ ಸಿಕ್ಕ ಬೆಂಬಲ. ಬಿಜೆಪಿಯ ಕೆಲ ನಾಯಕರು ಕಾಂಗ್ರೆಸ್‌ಗೆ ಬರಲು ಸಿದ್ಧರಿದ್ದಾರೆ. ಅವರೆಲ್ಲ ನಮ್ಮ ಸಂಪರ್ಕದಲ್ಲೂ ಇದ್ದಾರೆ. ಮುಂದಿನ ಚುನಾವಣೆಗೆ ಹಾಲಿ- ಮಾಜಿ ಶಾಸಕರು ಎನ್ನದೇ ವೀಕ್ಷಕರು, ಪಕ್ಷದ ಕಾರ್ಯಕರ್ತರ ಅಭಿಪ್ರಾಯ ಪಡೆದು ಪಕ್ಷದ ಅಭ್ಯರ್ಥಿಗಳನ್ನು ಅಂತಿಮಗೊಳಿಸ ಲಾಗುವುದು ಎಂದರು.

ಮಹದಾಯಿ ವಿವಾದ ಇತ್ಯರ್ಥಕ್ಕಾಗಿ ನಾನು ಮೂರು ಬಾರಿ ಪ್ರಧಾನಿ ಮೋದಿಗೆ ಪತ್ರ ಬರೆದರೂ ಸ್ಪಂದಿಸಲಿಲ್ಲ. ಈಗ ರಾಜ್ಯದಲ್ಲಿ ಚುನಾವಣೆ ಹತ್ತಿರವಾಗುತ್ತಿದ್ದಂತೆ ವಿವಾದ ಇತ್ಯರ್ಥಪಡಿಸುವುದಾಗಿ ಬಿಎಸ್‌ವೈ ಹೇಳಿದ್ದಾರೆ. ವಿವಾದ ಇತ್ಯರ್ಥಗೊಳಿಸಿದರೆ ನಾನು ಸ್ವಾಗತಿಸುತ್ತೇನೆ. ಏನೇ ಆದರೂ ರಾಜ್ಯದ ಜನರಿಗೆ ಒಳ್ಳೆಯದಾದರೆ ಸಾಕು ಎಂದರು.

ಮೋದಿ ವಿರುದ್ಧ ಸಿಎಂ ಆಕ್ರೋಶ: “ರಾಜಕೀಯದಲ್ಲಿ ಇರುವವರು ಅವಾಚ್ಯ ಪದ ಬಳಸಬಾರದು. ರಾಜ್ಯ ಬಿಜೆಪಿ ಕೆಲ ನಾಯಕರು ಬಾಯಿಗೆ ಬಂದಂತೆ ಮಾತನಾಡುತ್ತಿದ್ದಾರೆ. ನಾನೂ ಹಳ್ಳಿಯವನು, ಅವರಿಗಿಂತ ಹೆಚ್ಚಿನ ಅಸಂಸದೀಯ ಪದಗಳಿಂದ ಬೈಯ್ಯಲು ಬರುತ್ತದೆ. ಅವರದೇ ಪಕ್ಷದ ಪ್ರಧಾನಿ ಮೋದಿ, 3 ವರ್ಷಗಳಿಂದ ಕೇವಲ ಭಾಷಣ ಮಾಡುತ್ತಿದ್ದಾರೆ. ಅಭಿವೃದ್ಧಿ ವಿಷಯದಲ್ಲಿ ಏನು ಮಾಡಿದ್ದಾರೆ’ ಎಂದು ಸಿಎಂ ಸಿದ್ದರಾಮಯ್ಯ ಪ್ರಧಾನಿ ಮೋದಿ ವಿರುದ್ಧ ಹರಿಹಾಯ್ದರು. ಜಮಖಂಡಿಯಲ್ಲಿ ನಡೆದ ಸಾಧನಾ ಸಮಾವೇಶದಲ್ಲಿ ಮಾತನಾಡಿ, 2014ರಲ್ಲಿ ಒಂದು ಬ್ಯಾರೇಲ್‌ ಕಚ್ಚಾ ತೈಲಕ್ಕೆ 120 ರೂ. ಇತ್ತು. ಆಗ ಪೆಟ್ರೋಲ್‌ 70 ರೂ., ಡೀಸೆಲ್‌ 55 ರೂ. ಬೆಲೆ ಇತ್ತು. ಈಗ ಅದೇ ಬ್ಯಾರೇಲ್‌ ಕಚ್ಚಾ ತೈಲದ ಬೆಲೆ ರೂ. 43ಕ್ಕೆ ಇಳಿದಿದೆ. ಹಾಗಾದರೆ, ಈಗ ಪೆಟ್ರೋಲ್‌- ಡೀಸೆಲ್‌ ಬೆಲೆ ಅರ್ಧಕ್ಕೂ ಕಡಿಮೆ ಆಗಬೇಕಿತ್ತು. ಏಕೆ ಬೆಲೆ ಇಳಿಸಿಲ್ಲ? ಅದರಿಂದ ಉಳಿದ ಹಣ ಎಲ್ಲಿ ಹೋಯಿತು? ಆ
ಹಣವನ್ನು ಪ್ರಧಾನಿ ಏನು ಮಾಡಿದ್ದಾರೆ ಎಂದು ಪ್ರಶ್ನಿಸಿದರು.

ಮಾಲಕರೆಡ್ಡಿ ಮನವೊಲಿಸಿದ ಸಿಎಂ
ಯಾದಗಿರಿ: “2018ರ ಚುನಾವಣೆಯಲ್ಲಿ ಪಕ್ಷದಿಂದ ಸ್ಪರ್ಧೆ ಮಾಡಿ ಮುಂದಿನ ಚುನಾವಣೆಗೆ ಇಬ್ಬರೂ ನಿವೃತ್ತಿ ಆಗೋಣ’ ಎಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ಶಾಸಕ ಡಾ.ಎ.ಬಿ. ಮಾಲಕರೆಡ್ಡಿ ಅವರ ಮನವೊಲಿಸಿದ್ದಾರೆ ಎನ್ನಲಾಗಿದೆ. ಜಿಲ್ಲೆಯಲ್ಲಿ ಹಮ್ಮಿಕೊಂಡಿದ್ದ ಸಾಧನಾ ಸಮಾವೇಶಕ್ಕೆ ಆಗಮಿಸಿದ್ದ ಸಂದರ್ಭದಲ್ಲಿ ಯಾದಗಿರಿ ಸರ್ಕಿಟ್‌ ಹೌಸ್‌ನಲ್ಲಿ ಭಾನುವಾರ ರಾತ್ರಿ ಭೋಜನ ಕೂಟದಲ್ಲಿ ಶಾಸಕ ಡಾ.ಎ.ಬಿ. ಮಾಲಕರೆಡ್ಡಿ ಅವರನ್ನು ಕರೆಸಿಕೊಂಡು, “ಡಾಕ್ಟ್ರೇ ನನ್ನ ಐದು ವರ್ಷದ ಅಧಿಕಾರವಧಿಯಲ್ಲಿ ಸಾಕಷ್ಟು ಕೆಲಸಗಳಾಗಿವೆ. ಇದು ನಿಮಗೂ ಗೊತ್ತು, ಜೊತೆಗೆ ರಾಜ್ಯದ ಜನತೆಯೂ ಕಾಂಗ್ರೆಸ್‌ ಬಗ್ಗೆ ಒಲವು ತೋರುತ್ತಿದ್ದಾರೆ. ನಮ್ಮ ಪಕ್ಷ ಮತ್ತೆ ಅಧಿಕಾರಕ್ಕೆ ಬಂದೇ ಬರುತ್ತದೆ. ಆದ್ದರಿಂದ ಇನ್ನೊಂದು ಬಾರಿ ಚುನಾವಣೆಯಲ್ಲಿ ಸ್ಪರ್ಧಿಸುವಂತೆ’ ಕೇಳಿಕೊಂಡಿದ್ದಾರೆ ಎನ್ನಲಾಗಿದೆ. 
ಇನ್ನೊಂದು ಬಾರಿ ಸ್ಪರ್ಧಿಸಿ ಕಾಂಗ್ರೆಸ್‌ ಮತ್ತೆ ಅ ಧಿಕಾರಕ್ಕೆ ಬರಲು ಕಾರಣಕರ್ತರಾಗಬೇಕೆಂದು ಮನವೊಲಿಸಿದಾಗ, ಡಾ.ಎ.ಬಿ.ಮಾಲಕರೆಡ್ಡಿ ಯಾವುದೇ ಪ್ರತಿಕ್ರಿಯೆ ನೀಡದೆ ಮೌನ ವಹಿಸಿದ್ದರು ಎನ್ನಲಾಗಿದೆ.

ಚಿನ್ನ  ಲೇಪಿತ ಗಣೇಶ ಕಾಣಿಕೆ ಜಮಖಂಡಿಯಲ್ಲಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರಿಗೆ ಚಿನ್ನ ಲೇಪಿತ ಗಣೇಶ ದೇವರ ಭಾವಚಿತ್ರ ನೀಡಿ ಸನ್ಮಾನಿಸಲಾಯಿತು. ಜಮಖಂಡಿ ಶಾಸಕ ಸಿದ್ದು ನ್ಯಾಮಗೌಡ, ನಾಲ್ಕೂವರೆ ವರ್ಷಗಳಲ್ಲಿ ಜಮಖಂಡಿ ವಿಧಾನಸಭೆ ಕ್ಷೇತ್ರಕ್ಕೆ ಒಟ್ಟು 1500 ಕೋಟಿ ರೂ. ಅನುದಾನ ನೀಡಿದ್ದಾರೆ ಎಂದರು. ಇದೇ ವೇಳೆ ಕುಲಹಳ್ಳಿ, ಸಾವಳಗಿ ಏತ ನೀರಾವರಿ ಯೋಜನೆ ವ್ಯಾಪ್ತಿಯ ಹಳ್ಳಿಗಳ ರೈತರು ಬೆಳ್ಳಿಯ ಗದೆ ನೀಡಿ, ಸನ್ಮಾನಿಸಿದರು.