ಕೋವಿಡ್ 19 ನಿಯಂತ್ರಣಕ್ಕೆ ಲಾಕ್‌ಡೌನ್‌ ಅನಿವಾರ್ಯ

Team Udayavani, May 7, 2020, 2:25 PM IST

ಇಳಕಲ್ಲ: ಜಿಲ್ಲೆಯಲ್ಲಿ ಕೋವಿಡ್ 19 ನಿಯಂತ್ರಣ ಬರುವವರೆಗೂ ಮೇ 17ರ ವರೆಗೆ ಈ ಲಾಕ್‌ಡೌನ್‌ ಅನಿವಾರ್ಯ. ಸಾರ್ವಜನಿಕರು ಮೂರನೇ ಹಂತದ ಲಾಕ್‌ಡೌನ್‌ಗೂ ಸಹಕಾರ ನೀಡಬೇಕು ಎಂದು ಸಿಪಿಐ ಅಯ್ಯನಗೌಡ ಪಾಟೀಲ ವಿನಂತಿಸಿದರು.

ಇಲ್ಲಿಯ ಶ್ರೀಮಠದ ದಾಸೋಹಭವನದಲ್ಲಿ ಇಳಕಲ್ಲ ವರ್ತಕರ ಸಂಘ (ಛೇಂಬರ್‌ ಆಫ್‌ ಕಾಮರ್) ಆಯೋಜಿಸಿದ ಚರ್ಚಾ ಸಭೆಯಲ್ಲಿ ಮಾತನಾಡಿದ ಅವರು, ಬಾಗಲಕೋಟೆ, ಮುಧೋಳ ಹಾಗೂ ಜಮಖಂಡಿಗೆ ಸೀಮಿತವಾಗಿದ್ದ ಈ ಭೀಕರ ಮಹಾಮಾರಿ ಈಗ ಬಾದಾಮಿ ತಾಲೂಕಿಗೂ ಆವರಿಸಿಕೊಂಡಿರುವುದರಿಂದ ನಮ್ಮ ಜಿಲ್ಲೆ ಅಪಾಯಕ್ಕೆ ಸಿಲುಕಿದಂತಾಗಿದೆ. ಇದಲ್ಲದೇ ಬೇರೆಡೆ ದುಡಿಯಲು ಹೋಗಿದ್ದ ಸುಮಾರು 1700 ಕಾರ್ಮಿಕರು ಜಿಲ್ಲೆಗೆ ಬಂದಿದ್ದಾರೆ. ಅವರ ಮೇಲೂ ನಿಗಾ ಇಡಬೇಕು. ವ್ಯಾಪಾರ ಪ್ರಾರಂಭಿಸಲು ಅವಕಾಶ ನೀಡಿದರೇ ಸುತ್ತಮುತ್ತಲಿನ ಗ್ರಾಮಗಳ ಕಾರ್ಮಿಕರು ಬರುವುದರಿಂದ ನಾವೇ ಕೊರೊನಾ ಹರಡಲು ಅವಕಾಶ ನೀಡಿದಂತಾಗುತ್ತದೆ. ಮೇ ತಿಂಗಳು ನಮಗೆ ನಿರ್ಣಾಯಕ ಹಂತವಾಗಿದ್ದು, ಎಚ್ಚರ ತಪ್ಪಿದರೂ ಅಪಾಯ ಗ್ಯಾರಂಟಿ. ಅದಕ್ಕಾಗಿ ಲಾಕ್‌ಡೌನ್‌ ಸಡಿಲಿಕೆ ಸಾಧ್ಯವಿಲ್ಲ. ನಂತರ ಪರಿಸ್ಥಿತಿ ನೋಡಿಕೊಂಡು ಮುಂದುವರಿಯುವ ಅಭಿಪ್ರಾಯವನ್ನು ಜಿಲ್ಲಾಧಿಕಾರಿಗಳು ಹೊಂದಿದ್ದಾರೆ ಎಂದು ಹೇಳಿದರು.

ಇಳಕಲ್ಲ ತಾಲೂಕು ವರ್ತಕರ ಸಂಘದ ಅಧ್ಯಕ್ಷ ಸುಭಾಸಚಂದ್ರ ಕಠಾರಿ ಮಾತನಾಡಿ, 3ನೇ ಹಂತದ ಲಾಕ್‌ಡೌನ್‌ನಲ್ಲಿ ಕೆಲವೊಂದು ಸಡಿಲಿಕೆ ನಿಯಮಾವಳಿಗಳನ್ನು ರಾಜ್ಯ ಹಾಗೂ ಕೇಂದ್ರ ಸರಕಾರ ಘೋಷಿಸಿದ್ದರೂ ಇಳಕಲ್ಲ ತಾಲೂಕಿನಲ್ಲಿ ಈವರೆಗೂ ಜಾರಿಗೊಂಡಿಲ್ಲ. ಲಾಕ್‌ಡೌನ್‌ ಆರಂಭವಾದಾಗಿನಿಂದ ವ್ಯಾಪಾರಸ್ಥರ ಪರಿಸ್ಥಿತಿ ಕಠಿಣವಾಗಿದ್ದು,. ನಮ್ಮನ್ನೇ ಅವಲಂಬಿತರಾಗಿರುವ ಕೆಲಸಗಾರರ, ಹಾಗೂ ನೇಕಾರರ ಬದುಕು ಬೀದಿಗೆ ಬಂದಿದೆ. ಕೂಡಲೇ ನಮಗೆ ವ್ಯಾಪಾರ ವಹಿವಾಟು ಆರಂಭಿಸಲು ಅನುಕೂಲ ಮಾಡಿಕೊಡಬೇಕು. ಕನಿಷ್ಠ ಬೆಳಿಗ್ಗೆ ಮೂರು ಗಂಟೆಯಾದರೂ ಅವಕಾಶ ನೀಡಬೇಕು ಎಂದು ಮನವಿ ಮಾಡಿದರು.

ರಾಜುಗೌಡ ಪಾಟೀಲ ವ್ಯಾಪಾರಸ್ಥರಾದ ನಾರಾಯಣಪ್ಪ ದಿವಟೆ, ಶಿವಪುತ್ರಪ್ಪ ಕರ್ಜಗಿ, ಶ್ರೀನಿವಾಸ ಕಾಳಗಿ, ಪ್ರಮೋದ ಹಂಚಾಟೆ, ಮದನಲಾಲ ಚವ್ಹಾಣ ಇದ್ದರು.