ಸರಕಾರಿ ಕನ್ನಡ ಶಾಲೆಗೆ ಮೆಟ್ರೋ ರೈಲಿನ ಬಣ್ಣ 

Team Udayavani, Dec 14, 2018, 5:30 PM IST

ಬನಹಟ್ಟಿ: ಮಕ್ಕಳನ್ನು ಆಕರ್ಷಿಸಲು ಇಲ್ಲಿಯ ಕೆಎಚ್‌ಡಿಸಿ ಕಾಲೋನಿಯ ಸರಕಾರಿ ಕನ್ನಡ ಶಾಲೆಗೆ ಮೆಟ್ರೋ ರೈಲಿನ ಬಣ್ಣ ಬಳಿಯಲಾಗಿದೆ. ಇಲ್ಲಿನ ನಾಗರಿಕರು, ಎಸ್‌ಡಿಎಂಸಿ ಪದಾಧಿಕಾರಿಗಳು, ಮುಖ್ಯಗುರುಗಳ, ಸಹ ಶಿಕ್ಷಕರ ಸಹಕಾರದಿಂದ ಇಲ್ಲಿನ ಶಾಲೆಗೆ ಮೆಟ್ರೋ ಬಣ್ಣ ಬಳಿಯುವ ಮೂಲಕ ಅತಿ ವೇಗದ ಜ್ಞಾನದ ಕಲಿಕೆಗೆ ಮತ್ತು ಆಕರ್ಷಣಿಯವಾಗುವಂತೆ ಮಾಡಿದ್ದಾರೆ.

ಈ ರೈಲಿಗೆ ಸಭಾಂಗಣ ನಿಲ್ದಾಣ ಕಾರ್ಯಾಲಯ ನಿಲ್ದಾಣ, ಶಾಲಾ ಡ್ರೆಸ್‌ ಕೋಡ್‌ ಹೀಗೆ ನಿಲ್ದಾಣಗಳ ಹೆಸರು ಅಲ್ಲಲ್ಲಿ ಬರೆಯಲಾಗಿದೆ. ಮಕ್ಕಳಿಗೆ ಬೆಳಗ್ಗೆ ಶಾಲೆ ಆರಂಭದ ಗಂಟೆ ಬಾರಿಸುವುದಷ್ಟೆ ತಡ ಥಟ್ಟ ಅಂತ ಮೆಟ್ರೋ ರೈಲು ಎದುರು ಓಡಿ ಬಂದು ಪ್ರಾರ್ಥನೆಗೆ ನಿಲ್ಲುವರು. ಪ್ರಾರ್ಥನೆ ಮುಗಿದ ತಕ್ಷಣ ಮೆಟ್ರೋ ರೈಲು ಹತ್ತಲು ಮಕ್ಕಳು ಸರದಿಯಲ್ಲಿ ಸಜ್ಜಾಗಿ ನಿಂತು ಬಿಡುತ್ತಾರೆ. ಇದು ರೈಲು ನಿಲ್ದಾಣದಲ್ಲಿ ನಿಂತ ಹಾಗೆ ಭಾಸವಾಗಿ ಮಕ್ಕಳು ರೈಲಿನಲ್ಲಿ ಹತ್ತುವರು. ನಂತರ ವಿಶ್ರಾಮದ ಗಂಟೆ, ಭೋಜನದ ಗಂಟೆ, ಶಾಲೆ ಬಿಡುವ ಗಂಟೆ ಭಾರಿಸಿದ ತಕ್ಷಣ ಮುಂದಿನ ಊರು ಅಥವಾ ನಿಲ್ದಾಣ ಬಂತೆಂದು ಭಾವಿಸಿ ಇಳಿಯುವರು.

ಶಾಲೆಯಲ್ಲಿ ನಿತ್ಯ ಪ್ರಾರ್ಥನೆ ವೇಳೆಯಲ್ಲಿ ಪಂಚಾಂಗ ಪಠಣ ಸಾಮಾನ್ಯ. ಈ ಶಾಲೆಯಲ್ಲಿ ಪ್ರಚಲಿತ ವಿದ್ಯಮಾನಗಳ ಹಾಗೂ ರಸಪ್ರಶ್ನೆಯಂತಹ ಕಾರ್ಯಕ್ರಮಗಳನ್ನು ನಡೆಸಿ ವಿಜೇತ ಮಕ್ಕಳಿಗೆ ಪ್ರೋತ್ಸಾಹಿಸುವ ಕಾರ್ಯ ನಡೆಯುತ್ತಿವೆ. ಇದರಿಂದ ಮಕ್ಕಳಿಗೆ ಪ್ರಾರ್ಥನೆ ವೇಳೆಯಲ್ಲಿಯೆ ಅನೇಕ ಮಾಹಿತಿ ಪಡೆದುಕೊಳ್ಳಲು ನೆರವಾಗುತ್ತಿದೆ.

ಕೆಎಚ್‌ಡಿಸಿ ಶಾಲೆಗೆ ಮೆಟ್ರೋ ರೈಲಿನ ಬಣ್ಣ ಬಳಿದಿರುವುದು ಮಕ್ಕಳಿಗೆ ಖುಷಿ ಕೊಡುವಂತಹ ವಿಚಾರ, ಮಕ್ಕಳು ಸುಂದರ ಬದುಕನ್ನು ಕಟ್ಟಿಕೊಡುವಂತಹ ಶಿಕ್ಷಣ ನೀಡಲು ಶಿಕ್ಷಕರು ಮತ್ತಷ್ಟು ಕಾರ್ಯೋನ್ಮುಖರಾಗಿ ಪ್ರಯತ್ನಿಸಬೇಕು.
. ಸಿದ್ದು ಸವದಿ, ಶಾಸಕರು 

ಶಾಲೆ ಗೋಡೆಗೆ ಮೆಟ್ರೋ ರೈಲಿನ ಬಣ್ಣ ಬಳಿಯುವ ಮೂಲಕ ಶಾಲೆಗೆ ಮಕ್ಕಳನ್ನು ಆಕರ್ಷಿಸಲು ನೆರವಾಗಿದೆ. ಶಿಕ್ಷಕರು ಕಲಿಕೆಯಲ್ಲಿ ವಿನೂತನ ಪ್ರಯೋಗ ಮಾಡುವುದರ ಮೂಲಕ ಮಕ್ಕಳಿಗೆ ಗುಣಮಟ್ಟ ಶಿಕ್ಷಣ ನೀಡುವಲ್ಲಿ ಮುಂದಾಗಬೇಕು.
.ಎಂ. ಬಿ. ಮೋರಟಗಿ,
ಕ್ಷೇತ್ರ ಶಿಕ್ಷಣಾಧಿಕಾರಿ

ಮಕ್ಕಳ ಸುಂದರ ಭವಿಷ್ಯದ ಏಳ್ಗೆಗಾಗಿ ವಿನೂತನ ರೀತಿಯಲ್ಲಿ ಪ್ರಯತ್ನಿಸುತ್ತಿರುವ ಇಲ್ಲಿನ ಶಿಕ್ಷಕರ ಕಾರ್ಯ ಮೆಚ್ಚುವಂತಹದ್ದು.
. ವಿಜಯಕುಮಾರ ವಂದಾಲ,
 ಕ್ಷೇತ್ರ ಸಮನ್ವಯಾಧಿಕಾರಿ.

ಹೊಸತನದ ರಂಗು ಮಕ್ಕಳಲ್ಲಿ ಮೂಡಬೇಕು, ಅದು ಆಕರ್ಷಣಿಯವಾಗಿರಬೇಕು. ಮಕ್ಕಳು ತಪ್ಪದೆ ಶಾಲೆಗೆ ನಿಯಮಿತವಾಗಿ ಬರುವಂತಾಗಲಿ, ಅವರು ಶಿಸ್ತು ಕಂಡುಕೊಳ್ಳಬೇಕು ಎಂಬ ಕಾರಣದಿಂದ ಎಲ್ಲ ಶಿಕ್ಷಕರ ಎಸ್‌ಡಿಎಂಸಿಯವರ ಸಹಕಾರ ಪಡೆದು ಮೆಟ್ರೊ ರೈಲಿನ ಬಣ ¡ಬಳಿದಿದ್ದೇವೆ. ಇದು ಈಗ ಮಕ್ಕಳ ಗಮನವನ್ನಷ್ಟೆ ಅಲ್ಲ ಶಾಲೆ ನೋಡುಗರ ಗಮನ ಸೆಳೆಯುತ್ತಿದೆ.
.ಬಿ. ಎಂ. ಪಾಟೀಲ,
ಮುಖ್ಯಗುರುಗಳು

ಹೊಸ ಹೊಸ ಮಾದರಿಯ ಶಿಕ್ಷಕರ ಪ್ರಯೋಗಗಳು ಮಕ್ಕಳಿಗೆ ಮನ ಮುಟ್ಟಲಿ. ಇಂತಹ ಒಳ್ಳೆಯ ಪ್ರಯತ್ನಗಳು ಇನ್ನೊಂದು ಶಾಲೆಗೆ ಮಾದರಿಯಾಗಲಿ.
.ಶ್ರೀಶೈಲ ಬುರ್ಲಿ,
ಶಿಕ್ಷಣ ಸಂಯೋಜಕ