ಬಸವ ಜ್ಞಾನ ಗುರುಕುಲದ ಅಸ್ತಿತ್ವದ ಉಳಿವೆಗೆ ಸಹಕಾರ ಅಗತ್ಯ: ಗುರುಮಹಾಂತ ಸ್ವಾಮೀಜಿ

Team Udayavani, Dec 29, 2021, 7:17 PM IST

ರಬಕವಿ-ಬನಹಟ್ಟಿ: ಈಚೇಗೆ ನಿಧನರಾದ ಡಾ.ಈಶ್ವರ ಮಂಟೂರ ಹುನ್ನೂರು ಮಧುರಖಂಡಿಯಲ್ಲಿ ಸ್ಥಾಪಿಸಿದ ಬಸವ ಜ್ಞಾನ ಗುರುಕುಲ ಅಸ್ತಿತ್ವದಲ್ಲಿ ಉಳಿವೆಗೆ ಎಲ್ಲರ ಸಹಕಾರ ಮುಖ್ಯವಾಗಿದೆ. ಈ ಆಶ್ರಮವನ್ನು ಉಳಿಸಿ ಬೆಳೆಸುವ ನಿಟ್ಟಿನಲ್ಲಿ ಸಮಾಜದ ಜವಾಬ್ದಾರಿ ಬಹಳಷ್ಟಿದೆ ಎಂದು ಇಳಕಲದ ಚಿತ್ತರಗಿ ಸಂಸ್ಥಾನ ಮಠದ ಗುರುಮಹಾಂತ ಸ್ವಾಮೀಜಿ ತಿಳಿಸಿದರು.

ಅವರು ಸೋಮವಾರ ಸ್ಥಳೀಯ ಈಶ್ವರಲಿಂಗ ಮೈದಾನದಲ್ಲಿ ಈಚೇಗೆ ನಿಧನರಾದ ಹುನ್ನೂರು ಮಧುರಖಂಡಿಯ ಬಸವ ಜ್ಞಾನ ಗುರುಕುಲದ ಡಾ. ಈಶ್ವರ ಮಂಟೂರ ಅವರಿಗೆ ಹಮ್ಮಿಕೊಳ್ಳಲಾದ ನುಡಿ ನಮನ ಕಾರ್ಯಕ್ರಮ ಸಾನ್ನಿಧ್ಯ ವಹಿಸಿ ಮಾತನಾಡಿದರು.

ಎಲ್ಲ ಸಮಾಜವನ್ನು ಕಟ್ಟಿಕೊಂಡು ಹೋಗುವ ಶಕ್ತಿ ಬಸವಣ್ಣನವರಿಗೆ ಮಾತ್ರ ಇತ್ತು. ಅಂಥ ಬಸವ ತತ್ವವನ್ನು ವಿಶ್ವದ ಅನೇಕ ದೇಶಗಳಲ್ಲಿ ಮತ್ತು ನಾಡಿನ ಮೂಲೆ ಮೂಲೆಗೂ ಹರಡಿದ ಕೀರ್ತಿ ಡಾ.ಮಂಟೂರ ಅವರಿಗೆ ಸಲ್ಲಬೇಕು. ಡಾ. ಈಶ್ವರ ಮಂಟೂರ ಜೀವಿಗಳ ಉದ್ಧಾರಕ್ಕಾಗಿ ನಿಸರ್ಗ ನಮಗೆ ನೀಡಿದ ಕೊಡುಗೆ ಎಂದು ಗುರುಮಹಾಂತ ಸ್ವಾಮೀಜಿ ತಿಳಿಸಿದರು.

ಇದೇ ಸಂದರ್ಭದಲ್ಲಿ ರಬಕವಿಯ ಗುರುದೇವ ಬ್ರಹ್ಮಾನಂದ ಆಶ್ರಮದ ಗುರುಸಿದ್ಧೇಶ್ವರ ಸ್ವಾಮೀಜಿ ಮಾತನಾಡಿ, ಡಾ.ಮಂಟೂರ ಅಪರೂಪದವರಲ್ಲಿ ಅಪರೂಪದವರಾಗಿದ್ದರು. ಯುವಕರದಲ್ಲಿ ಆಧ್ಯಾತ್ಮಿಕ ಚಿಂತನೆಯನ್ನು ಬೆಳೆಸುವಲ್ಲಿ ಡಾ. ಮಂಟೂರ ಅವರ ಪಾತ್ರ ವಿಶೇಷವಾಗಿತ್ತು. ಸರಳತೆ, ವಿನಯತೆ ಸಾಕಾರ ಮೂರ್ತಿಯಾಗಿದ್ದ ಅವರು ಬಸವ ತತ್ವದ ಹರಿಕಾರರಾಗಿದ್ದರು ಎಂದರು.

ಕಾರ್ಯಕ್ರಮದಲ್ಲಿ ಸ್ಥಳೀಯ ಹಿರೇಮಠದ ಶರಣಬಸವ ಶಿವಾಚಾರ್ಯರು, ಸಾಹಿತಿಗಳಾದ ಸಿದ್ಧರಾಜ ಪೂಜಾರಿ, ಮಲ್ಲಿಕಾರ್ಜುನ ಹುಲಗಬಾಳಿ, ಸುರೇಶ ಚಿಂಡಕ, ಡಾ.ಪದ್ಮಜೀತ ನಾಡಗೌಡಪಾಟೀಲ, ಶಂಕರ ಸೋರಗಾವಿ, ರವಿ ಯಡಹಳ್ಳಿ, ಕೆ.ಆರ್‍. ಮಹಾಲಿಂಗಪ್ಪ ಸೇರಿದಂತೆ ಅನೇಕರು ಮಾತನಾಡಿದರು.

ಶಿವಲೀಲಾ ಬರಗಲ್ ಪ್ರಾರ್ಥಿಸಿದರು. ಸದಾಶಿವ ಗಾಯಕವಾಡ ಸ್ವಾಗತಿಸಿದರು. ಡಾ.ಎನ್‍.ವಿ.ಅಸ್ಕಿ ನಿರೂಪಿಸಿದರು. ಡಾ.ಶಂಕರ ವಸ್ತ್ರದ ವಂದಿಸಿದರು.

ಕಾರ್ಯಕ್ರಮದಲ್ಲಿ ಗಂಗಪ್ಪ ಮಂಟೂರ, ಅಶೋಕ ವಸ್ತ್ರದ, ಶಂಕರ ಜಾಲಿಗಿಡದ, ಬ್ರಿಜ್ಮೋಹನ ಡಾಗಾ, ರವಿ ಬಾಡಗಿ, ಗುರುಸಿದ್ಧಪ್ಪ ಚನಾಳ, ಚಿದಾನಂದ ಮಟ್ಟಿಕಲ್ಲಿ, ಶಾಂತಾ ಸೋರಗಾವಿ, ಶೈಲಜಾ ನುಚ್ಚಿ, ಬಾಳವ್ವ ಮಾಲಾಪುರ ಸೇರಿದಂತೆ ಅನೇಕರು ಇದ್ದರು.