ಆಸ್ತಿ ಖಾಸಗಿಯದ್ದು..ಪ್ರಾಥಮಿಕ ಶಾಲೆ ಸರ್ಕಾರಿಯದ್ದು!

ಕಲಾದಗಿ: ಖಾಸಗಿ ಆಸ್ತಿಯಲ್ಲಿ ಸರಕಾರಿ ಶಾಲಾ ಕಟ್ಟಡ ಕಟ್ಟಿ ಶಾಲೆಯನ್ನು ಕಳೆದ 9 ವರ್ಷಗಳಿಂದ ನಡೆಸಿಕೊಂಡು ಬರಲಾಗುತ್ತಿದೆಯಾದರೂ ಅಧಿಕಾರಿಗಳು ಈ ಆಸ್ತಿಯನ್ನು ಸರಕಾರಿ ಆಸ್ತಿಯನ್ನಾಗಿ ಮಾಡಿಕೊಳ್ಳಲು ಪ್ರಯತ್ನಿಸದೇ ಇರುವುದು ವಿಪರ್ಯಾಸ.

ಸೌಂಶಿ ಕ್ರಾಸ್‌ ಹತ್ತಿರ ಬೆಳಗಾವಿ ರಾಯಚೂರು ಹೆದ್ದಾರಿಗೆ ಹೊಂದಿಕೊಂಡ ತೋಟದ ಶಾಲೆ ಸರಕಾರದ ಹೆಸರಿನಲ್ಲಿಲ್ಲ, ನಿವೃತ್ತ ಶಿಕ್ಷಕ ಎಸ್‌.ಎನ್‌.ಹೂಗಾರ ಅವರ ಗೋವಿಂದಕೊಪ್ಪ ಗ್ರಾಮದ ಸರ್ವೇ ನಂ 155/1ರಲ್ಲಿ 9 ಗುಂಟೆ ಜಾಗೆಯಲ್ಲಿ ಕಟ್ಟಲಾಗಿದೆ. ಇದು ಸರ್ಕಾರ ಅಥವಾ ಶಿಕ್ಷಣ ಇಲಾಖೆ ಹೆಸರಿನಲ್ಲಿಲ್ಲ.

ಕಟ್ಟಡ ಕಟ್ಟಿದರಾದರೂ ಹೇಗೆ?: ಶಿಕ್ಷಣ ಪ್ರೇಮಿಗಳು ಭೂ ದಾನ ಮಾಡಿದರೂ ಭೂದಾನ ಪತ್ರ ಪಡೆದು ಆ ಶಾಲೆಯ ಮುಖ್ಯಾಧ್ಯಾಪಕರ ಹೆಸರಿನಲ್ಲಿ ಭೂ ದಾನಪತ್ರ ಪಡೆದು ಶಿಕ್ಷಣ ಇಲಾಖೆಯ ಜಿಲ್ಲಾಮಟ್ಟದ ಅಧಿಕಾರಿಗಳು ಅಥವಾ ಬಿಇಒ ಅವರ ಗಮನಕ್ಕೆ ತಂದು ನೋಂದಣಿ ಕಚೇರಿಯಲ್ಲಿ ನೋಂದಣಿ ಮಾಡಿಕೊಂಡು, ಹಿರಿಯ ಅಧಿಕಾರಿಗಳ ಮಾರ್ಗದರ್ಶನ-ಸೂಚನೆ-ಆದೇಶದಂತೆ ಶಾಲಾ ಕಟ್ಟಡ ಬಗ್ಗೆ ಮುಂದಿನ ಕ್ರಮ ಕೈಗೊಳ್ಳಬೇಕು. ಒಂದು ವೇಳೆ ಭೂದಾನ ನೀಡಿದವರು ಆ ಶಾಲೆಗೆ ತಮ್ಮ ಮನೆತನದವರ ಹಿರಿಯರ ಹೆಸರು, ಶರಣರ ಹೆಸರು ಇಡಲು ಅಪೇಕ್ಷೆ ವ್ಯಕ್ತಪಡಿಸಿ ಭೂದಾನ ಮಾಡಿದಲ್ಲಿ ಆ ಭೂಮಿಯನ್ನು ರಾಜ್ಯಪಾಲರ ಹೆಸರಿಗೆ ಮಾಡಿಕೊಂಡು, ನಂತರ ಇಲಾಖೆಯ ನಿಯಾನುಸಾರ, ಇಲಾಖೆಯ ಹಿರಿಯ ಅಧಿಕಾರಿಗಳ ಆದೇಶ ಮುಂದಿನ ಕ್ರಮ ಕೈಗೊಂಡು, ನಿಯಮನಾನುಸಾರ ಅನುದಾನ ಬಿಡುಗಡೆ ಮಾಡಿ, ಜಿಲ್ಲಾಮಟ್ಟದ ಶಿಕ್ಷಣ ಇಲಾಖಾ ಅಧಿಕಾರಿಗಳ ಸೂಚನೆ ಪ್ರಕಾರ ಕಟ್ಟಡ ಕಟ್ಟಬೇಕು. ಆದರೆ ಇದ್ಯಾವುದು ಈ ಶಾಲೆಗೆ ಸಂಬಂಧಿಸಿಲ್ಲ. ಶಿಕ್ಷಣ ಇಲಾಖೆ ಹೆಸರಿನಲ್ಲಿರದ ಭೂಮಿಯಲ್ಲಿ ಈ ಶಾಲಾ ಕಟ್ಟಡವನ್ನು ಕಟ್ಟಿರುವುದಾದರೂ ಹೇಗೆ ಎಂಬುದು ಪ್ರಜ್ಞಾವಂತರು ಪ್ರಶ್ನೆಯಾಗಿದೆ.

ಗ್ರಾಪಂನಲ್ಲಿ ದಾಖಲೆಗಳಿಲ್ಲ: ಖಾಸಗಿ ಮಾಲಿಕತ್ವ ಭೂಮಿಯಲ್ಲಿರುವ ಈ ಶಾಲಾ ಕಟ್ಟಡದಲ್ಲಿ ಮೂರು ಶಾಲಾ ಕೊಠಡಿಗಳಿವೆ. ಒಂದು ಮುಖ್ಯೋಪಾಧ್ಯಾಯರ ಕೊಠಡಿ ಇದೆ. ಒಂದನೇ ತರಗತಿಯಿಂದ 5ನೇ ತರಗತಿವರೆಗೆ ತರಗತಿಗಳು ಇಲ್ಲಿ ನಡೆಯುತ್ತಿದ್ದು, ಶೌಚಾಲಯ, ಮೂತ್ರಾಲಯ ಇದೆ. ಮೈದಾನವೂ ಇದ್ದು ಜತೆಗೆ ಒಂದು ಕೊಳವೆ ಬಾವಿ ವಿದ್ಯುತ್‌ ಸೌಲಭ್ಯ ಒಳಗೊಂಡಿದೆ. ಕಳೆದ ಕೆಲ ವರ್ಷಗಳಿಂದ ಇವುಗಳ ದುರಸ್ತಿ ನಿರ್ವಹಣೆಗೆ ಗ್ರಾಪಂ ನಿಂದ ಸಹಕಾರ ಅನುದಾನ ಸಿಗುತ್ತಿಲ್ಲ. ಕಾರಣ ಗ್ರಾಪಂನಲ್ಲಿ ಈ ಶಾಲೆಯ ಯಾವುದೇ ದಾಖಲೆಗಳಿಲ್ಲ.

ಈ ಸರಕಾರಿ ಕಿರಿಯ ಪ್ರಾಥಮಿಕ ಶಾಲೆಯನ್ನು ಇನ್ನಾದರೂ ಸರಕಾರದ ಹೆಸರಿನಲ್ಲಿ ಮಾಡಿಕೊಳ್ಳಲು ಮುಖ್ಯಾಧ್ಯಾಪಕರು, ಶಿಕ್ಷಣ ಇಲಾಖೆಯ ಹಿರಿಯ ಅಧಿಕಾರಿಗಳು ಮುಂದಾಗುತ್ತಾರೋ ಇಲ್ಲವೋ ಕಾದು ನೋಡಬೇಕು.