ಕೊಚ್ಚಿ ಹೋಯ್ತು ರೈತರ ಬದುಕು

Team Udayavani, Aug 17, 2019, 10:09 AM IST

ಬಾಗಲಕೋಟೆ: ಕೃಷ್ಣಾ ನದಿ ಪ್ರವಾಹಕ್ಕೆ ತತ್ತರಿಸಿದ ಬಾದಾಮಿ ತಾಲೂಕಿನ ಮಣ್ಣೇರಿ ಗ್ರಾಮದ ದುಸ್ಥಿತಿ.

ಬಾಗಲಕೋಟೆ: ಜಿಲ್ಲೆಯ ಇತಿಹಾಸದಲ್ಲೇ ಕಂಡರಿಯದ ಪ್ರವಾಹ ಈ ಬಾರಿ ರೈತರ ಬದುಕು ತನ್ನೊಟ್ಟಿಗೆ ಸೆಳೆದುಕೊಂಡು ಹೋಗಿದೆ. ಎಲ್ಲಿ ನೋಡಿದರಲ್ಲ ನೆಲಸಮಗೊಂಡ ಬೆಳೆಗಳು. ನಾಲ್ಕು ವರ್ಷ ಬರಕ್ಕೆ ನಲುಗಿದ್ದರೆ, ಈ ಬಾರಿ ಪ್ರವಾಹದ ಹೊಡೆತಕ್ಕೆ ರೈತರ ಬದುಕು ಛಿದ್ರವಾಗಿದೆ.

ಹೌದು, ಘಟಪ್ರಭಾ, ಮಲಪ್ರಭಾ ಹಾಗೂ ಕೃಷ್ಣಾ ನದಿ ಪ್ರವಾಹ ಹಿಂದೆಂದೂ ಕಂಡರಿಯದಷ್ಟು ಬಂದಿವೆ. ಮೂರು ನದಿಗಳ ರುದ್ರ ನರ್ತನಕ್ಕೆ 9 ತಾಲೂಕಿನ 194 ಹಳ್ಳಿಗಳು ಅಕ್ಷರಶಃ ನಲುಗಿವೆ. ರೈತರು, ಸಣ್ಣಪುಟ್ಟ ವ್ಯಾಪಾರಸ್ಥರು, ಕೂಲಿಕಾರರು, ನೇಕಾರರು, ನಿತ್ಯ ದುಡಿದು ಜೀವನ ಸಾಗಿಸುವ ಬಡವರು, ಬೇರೊಬ್ಬ ಹೊಲ ಲಾವಣಿಗೆ ಮಾಡಿದ್ದ ರೈತರು ನಿತ್ಯ ಕಣ್ಣೀರಿನಲ್ಲಿದ್ದಾರೆ. ಮುಂದಿನ ಬದುಕು ಹೇಗೆ? ಎಂಬ ಚಿಂತೆಯಲ್ಲಿದ್ದಾರೆ. ಸರ್ಕಾರ ಕೊಡುವ ಪರಿಹಾರದಲ್ಲಿ ಪುನರ್‌ ಬದುಕು ಕಟ್ಟಿಕೊಳ್ಳಲಾಗುತ್ತದೆಯೇ, ಭ್ರಷ್ಟಾಚಾರ ವ್ಯವಸ್ಥೆಯಲ್ಲಿ ನಮಗೆಲ್ಲ ಸೂಕ್ತ ಪರಿಹಾರ ಸಿಗುತ್ತಾ ಎಂಬ ಆತಂಕ ಕಾಡುತ್ತಿದೆ.

1.25 ಲಕ್ಷ ಎಕರೆ ಕಬ್ಬು ನಾಶ: ಉತ್ತರ ಕರ್ನಾಟಕದಲ್ಲಿ ಬೆಳಗಾವಿ ಬಿಟ್ಟರೆ, ಬಾಗಲಕೋಟೆಗೆ ಸಕ್ಕರೆ ನಾಡು ಎಂದೂ ಕರೆಲಾಗುತ್ತಿದೆ. ಕಬ್ಬು ಬೆಳೆಗಾರ ರೈತರನ್ನು ನಂಬಿಕೊಂಡೇ ಜಿಲ್ಲೆಯಲ್ಲಿ 11 ಸಕ್ಕರೆ ಕಾರ್ಖಾನೆಗಳೂ ಇವೆ. ವಾರ್ಷಿಕ ಜಿಲ್ಲೆಯಲ್ಲಿ 1 ಕೋಟಿ ಮೆಟ್ರಿಕ್‌ ಟನ್‌ ನಷ್ಟು ಕಬ್ಬು ಬೆಳೆಯುತ್ತಿದ್ದು, ಸುಮಾರು 2,835 ಮೆಟ್ರಿಕ್‌ ಟನ್‌ ಸಕ್ಕರೆ ಉತ್ಪಾದನೆಯಾಗುತ್ತದೆ.

ಒಂದು ಅಂದಾಜಿನ ಪ್ರಕಾರ ಜಿಲ್ಲೆಯಲ್ಲಿ ಈ ಬಾರಿ 2.40 ಲಕ್ಷ ಎಕರೆ ಭೂಮಿಯಲ್ಲಿ ಕಬ್ಬು ಬೆಳೆಯಲಾಗಿತ್ತು. ಆದರೆ, ಮೂರು ನದಿಗಳ ಪ್ರವಾಹಕ್ಕೆ 1.25 ಹೆಕ್ಟೇರ್‌ನಷ್ಟು ಕಬ್ಬು ಬೆಳೆ ಸಂಪೂರ್ಣ ನೆಲಸಮವಾಗಿದೆ ಎಂದು ಅಂದಾಜಿಸಲಾಗಿದೆ. ಇದರಿಂದ ರೈತರು, ಕಬ್ಬು ಬೆಳೆಯಿಂದ ಪಡೆಯುತ್ತಿದ್ದ ಸುಮಾರು 3 ಸಾವಿರ ಕೋಟಿಗೂ ಅಧಿಕ ಹಾನಿಯಾಗಿದೆ ಎಂದು ಪ್ರಾಥಮಿಕ ಮಾಹಿತಿ ಹೇಳುತ್ತಿದೆ.

ರೈತರಿಗೆ ಇಷ್ಟೊಂದು ಪ್ರಮಾಣದ ಹಾನಿಯಾದರೆ, ಇನ್ನು ಕಬ್ಬು ನುರಿಸಿ, ಸಕ್ಕರೆ ಉತ್ಪಾದಿಸಿ, ಮಾರಾಟ ಮಾಡುತ್ತಿದ್ದ ಜಿಲ್ಲೆಯ ಕಾರ್ಖಾನೆಗಳ ಉದ್ಯಮಿಗಳೂ ಈ ಬಾರಿ ಕಬ್ಬಿಗಾಗಿ ಪರಿತಪಿಸುವ ಅನಿವಾರ್ಯತೆ ಬಂದಿದೆ. ರೈತರು ಎಷ್ಟೇ ಗೋಳಾಡಿದರೂ, ಹೋರಾಟ ಮಾಡಿದರೂ ತಕ್ಷಣಕ್ಕೆ ಕಬ್ಬು ಕಟಾವು ಮಾಡಿಕೊಂಡು ಹೋಗದ ಹಾಗೂ ಕಬ್ಬು ನುರಿಸಿದ ಬಳಿಕ ಬಾಕಿ ಕೊಡದೇ ಸತಾಯಿಸುವ ಕಾರ್ಖಾನೆ ಮಾಲಿಕರು, ಈ ಬಾರಿ ನಮಗೆ ಕಬ್ಬು ಕೊಡಿ ಎಂದು ಕೇಳುವ ಪರಿಸ್ಥಿತಿ ಬರಲಿದೆ.

ಹಾನಿ ಸಮೀಕ್ಷೆಗೆ ಡ್ರೋಣ್‌ ಬಳಕೆ: ಜಿಲ್ಲೆಯ ಮಲಪ್ರಭಾ ಮತ್ತು ಘಟಪ್ರಭಾ ನದಿ ಪಾತ್ರದಲ್ಲಿ ಭೂಮಿ, ಗ್ರಾಮಗಳಿಗೆ ನುಗ್ಗಿದ್ದ ನೀರು ಕಡಿಮೆಯಾಗಿದ್ದು, ಕೃಷ್ಣಾ ನದಿ ಪಾತ್ರದಲ್ಲಿ ಇನ್ನೂ ಪ್ರವಾಹ ಯಥಾಸ್ಥಿತಿ ಮುಂದುವರೆದಿದೆ. ಕೃಷ್ಣಾ ನದಿ ಪಾತ್ರದ ಜಮಖಂಡಿ, ರಬಕವಿ-ಬನಹಟ್ಟಿ, ಬೀಳಗಿ, ಬಾಗಲಕೋಟೆ ಹಾಗೂ ಹುನಗುಂದ ತಾಲೂಕಿನ (ನಾರಾಯಣಪುರ ಜಲಾಶಯದ ಹಿನ್ನೀರು) ಜಲಾವೃತಗೊಂಡ ಗ್ರಾಮ, ಭೂಮಿ ಮೇಲಿನ ನೀರು ಸರಿದಿಲ್ಲ. ಹೀಗಾಗಿ ನೀರು ಕಡಿಮೆಯಾದ ಸ್ಥಳಗಳಲ್ಲಿ ಬೆಳೆ ಹಾನಿ ಕುರಿತು ಪ್ರತ್ಯೇಕ ಸಮೀಕ್ಷೆ ಮಾಡಲಾಗುತ್ತಿದೆ. ಇದಕ್ಕಾಗಿ ಜಿಲ್ಲಾಡಳಿತ ಡ್ರೋಣ್‌ ಕ್ಯಾಮರಾ ಬಳಸುತ್ತಿದೆ ಎನ್ನಲಾಗಿದೆ.

• 194 ಹಳ್ಳಿಗಳು ಅಯೋಮಯ

• 3 ಸಾವಿರ ಕೋಟಿ ಮೌಲ್ಯದ ಕಬ್ಬು ಬೆಳೆ ನೆಲಸಮ

• ಈ ಬಾರಿ ಕಾರ್ಖಾನೆ ಮಾಲಿಕರಿಗೂ ನಷ್ಟ