ಭತ್ತ ನಾಟಿ ಕಾರ್ಯ ಚುರುಕು

Team Udayavani, Jan 10, 2020, 4:42 PM IST

ಬಳಗಾನೂರು: ಮಾರ್ಚ್‌ನಲ್ಲಿ ಬೇಸಿಗೆ ಬೆಳೆಗೆ ನೀರಿನ ಕೊರತೆ ಎದುರಾಗುವ ಭೀತಿ ಹಿನ್ನೆಲೆಯಲ್ಲಿ ಈ ಭಾಗದ ರೈತರು ಈಗಲೇ ಭತ್ತ ನಾಟಿ ಮಾಡುತ್ತಿದ್ದಾರೆ.

ಜನವರಿ ಅಂತ್ಯದಲ್ಲಿ ಭತ್ತ ನಾಟಿ ಮಾಡಿದರೆ ಬೆಳೆ ಕಾಳು ಕಟ್ಟುವ ಹಂತದಲ್ಲಿ ಅಂದರೆ ಮಾರ್ಚ್‌ನಲ್ಲಿ ನೀರಿನ ಕೊರತೆ ಎದುರಾಗಬಹುದೆಂಬ ಆತಂಕದಿಂದ ಬಳಗಾನೂರು ಸೇರಿ ಸುತ್ತಲಿನ ಗ್ರಾಮಗಳ ಬಹುತೇಕ ರೈತರು ಡಿಸೆಂಬರ್‌ ಕೊನೆ ವಾರ ಮತ್ತು ಜನವರಿ ಮೊದಲ ವಾರದಿಂದಲೇ ಭತ್ತ ನಾಟಿ ಕಾರ್ಯ ಮಾಡುತ್ತಿದ್ದಾರೆ. ಈಗಾಗಲೇ ಅನೇಕ ರೈತರು ಭತ್ತ ನಾಟಿ ಮಾಡಿ ಮೊದಲ ಹಂತದ ಗೊಬ್ಬರ ಕೂಡ ಹಾಕಿದ್ದಾರೆ.

ಮುಂಗಾರು ಭತ್ತ ಕಟಾವಿನ ನಂತರ ರೈತರು ಗದ್ದೆಯಲ್ಲಿನ ಭತ್ತದ ಕವುಲಿಯನ್ನು ಟ್ರ್ಯಾಕ್ಟರ್‌ ಟಿಲ್ಲರ್‌ ಹೊಡೆಸಿ ಸ್ವತ್ಛಗೊಳಿಸಿ ನೀರು ಹರಿಸಿದ್ದಾರೆ. ಟ್ರ್ಯಾಕ್ಟರ್‌ನಿಂದ ಪಟ್ಲರ್‌ ಹೊಡೆದು ಮತ್ತೆ ಭತ್ತ ನಾಟಿ
ಮಾಡುತ್ತಿದ್ದಾರೆ. ಕೆಲ ರೈತರು ಸಸಿ ಮಡಿಗಳನ್ನು ಹಾಕಿದ್ದು, ನಾಟಿಗೆ ಸಿದ್ಧತೆ ನಡೆಸಿದ್ದಾರೆ. ಮತ್ತೇ ಕೆಲ ರೈತರು ಬೇರೆಡೆಯಿಂದ ಭತ್ತದ ಸಸಿ ತಂದು ನಾಟಿ ಮಾಡುತ್ತಿದ್ದಾರೆ. ಕೆಲವೆಡೆ ಈಗಾಗಲೇ ಭತ್ತ, ತೊಗರಿ, ಜೋಳ, ಕಡ್ಲಿ ಕಟಾವಿಗೆ ಬಂದಿರುವ ಹಿನ್ನೆಲೆಯಲ್ಲಿ ಭತ್ತ ನಾಟಿಗೆ ಕೂಲಿ ಕಾರ್ಮಿಕರ ಕೊರತೆ ಎದುರಾಗಿದೆ. ಹೀಗಾಗಿ ಬೇರೆ ಗ್ರಾಮಗಳಿಂದ ವಾಹನಗಳಲ್ಲಿ ಕೂಲಿ ಕಾರ್ಮಿಕರನ್ನು ಕರೆದುಕೊಂಡು ಬಂದು ಭತ್ತ ನಾಟಿ ಮಾಡುತ್ತಿದ್ದಾರೆ. ಕೆಲ ಕೂಲಿ ಕಾರ್ಮಿಕರು ಎಕರೆಗೆ ಇಂತಿಷ್ಟು ಅಂತ ಗುತ್ತಿಗೆ ಪಡೆದು ಭತ್ತ ನಾಟಿ ಮಾಡಿಕೊಡುತ್ತಿದ್ದಾರೆ.