ಶಾಸಕ ಸಿ.ಪಿ.ಯೋಗೇಶ್ವರ್‌ ಖಾತೆ ಹ್ಯಾಕ್‌-1.9 ಲಕ್ಷ ಡ್ರಾ

Team Udayavani, Mar 25, 2017, 3:45 AM IST

ಬೆಂಗಳೂರು:ಮಾಜಿ ಸಚಿವ ಹಾಗೂ ಚನ್ನಪಟ್ಟಣ ಶಾಸಕ ಸಿ.ಪಿ.ಯೋಗೇಶ್ವರ್‌ ಅವರ ಬ್ಯಾಂಕ್‌ ಖಾತೆ ಹ್ಯಾಕ್‌ ಮಾಡಿರುವ ಕಿಡಿಗೇಡಿಗಳು 1.90 ಲಕ್ಷ ರೂ. ಡ್ರಾ ಮಾಡಿಕೊಂಡಿದ್ದಾರೆ.

ಈ ಕುರಿತು ಯೋಗೇಶ್ವರ್‌, ಬನಶಂಕರಿ ಠಾಣೆಗೆ ದೂರು ನೀಡಿದ್ದಾರೆ. ನಗರದ ಜೆ.ಸಿ.ರಸ್ತೆಯ ಸ್ಟೆಂಟ್‌ ಬ್ಯಾಂಕ್‌ ಆಫ್ ಇಂಡಿಯಾ ಶಾಖೆಯಲ್ಲಿ ಉಳಿತಾಯ ಖಾತೆ ತೆರೆದಿದ್ದು, ತನ್ನ ಖಾತೆಯಲ್ಲಿದ್ದ 1.90 ಲಕ್ಷ ಹಣವನ್ನು ಒಂದೇ ಕಂತಿನಲ್ಲಿ ಹೊರ ರಾಜ್ಯದಲ್ಲಿ ಡ್ರಾ ಮಾಡಿದ್ದಾರೆ ಎಂದು ತಿಳಿಸಿದ್ದಾರೆ.

ಮಾ.18ರಂದು ಘಟನೆ ನಡೆದಿದ್ದು, ಅಂದೇ ದೂರು ನೀಡಲಾಗಿದೆ. ಈ ಹಿನ್ನೆಲೆಯಲ್ಲಿ ಬ್ಯಾಂಕ್‌ನ ಅಧಿಕಾರಿಗಳಿಂದ ಮಾಹಿತಿ ಪಡೆಯಲಾಗಿದೆ. ಹಾಗೇ ಹಣ ಡ್ರಾ ಮಾಡಿದ ಹೊರ ರಾಜ್ಯದ ಬ್ಯಾಂಕ್‌ನ ಅಧಿಕಾರಿಗಳಿಗೆ ಪತ್ರ ಬರೆದಿದ್ದು, ಸಿಸಿಟಿವಿ ದೃಶ್ಯಾವಳಿ ಇದ್ದರೆ ಕೊಡುವಂತೆ ಮನವಿ ಮಾಡಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಯೋಗೇಶ್ವರ್‌ ಅವರ ಆಪ್ತವಲಯದ ವ್ಯಕ್ತಿಗಳೇ ಕೃತ್ಯವೆಸಗಿರುವ ಅನುಮಾನವಿದೆ. ಅವರ ಖಾತೆ ಹಾಗೂ ಡೆಬಿಟ್‌ ಮತ್ತು ಕ್ರಿಡಿಟ್‌ ಕಾರ್ಡನ ಮಾಹಿತಿ ಹೊಂದಿರುವವರೇ ಹಣ ಕಳವು ಮಾಡಿರುವ ಸಾಧ್ಯತೆಯಿದೆ ಎಂದು ಪೊಲೀಸ್‌ ಅಧಿಕಾರಿ ತಿಳಿಸಿದ್ದಾರೆ.