280 ನಕ್ಷತ್ರ ಆಮೆಗಳ ಮಾರಾಟಕ್ಕೆ ಯತ್ನಿಸಿದವನ ಬಂಧನ

Team Udayavani, Jan 30, 2017, 11:52 AM IST

ಶಿಡ್ಲಘಟ್ಟ: ತಾಲೂಕಿನ ಬಾಳೇಗೌಡನಹಳ್ಳಿ ಗ್ರಾಮದ ಮನೆಯೊಂದರ ಮೇಲೆ ದಾಳಿ ನಡೆಸಿದ ದಿಬ್ಬೂರಹಳ್ಳಿ ಪೊಲೀಸರು ಹಾಗೂ ಅರಣ್ಯ ಇಲಾಖೆ ಸಿಐಡಿ ತಂಡ, ಲಕ್ಷಾಂತರ ರೂ.ಮೌಲ್ಯದ 280 ನಕ್ಷತ್ರ ಆಮೆಗಳನ್ನು ವಶಪಡಿಸಿಕೊಂಡು, ಆರೋ ಪಿಯನ್ನು ಬಂಧಿಸಿದೆ. 

ತಾಲೂಕಿನ ದಿಬ್ಬೂರಹಳ್ಳಿ ಪೊಲೀಸ್‌ ಠಾಣೆ ವ್ಯಾಪ್ತಿಯ ಬಾಳೇಗೌಡನಹಳ್ಳಿ ಗ್ರಾಮದ ವಿಜಯ್‌ ಬಂಧಿತ ಆರೋಪಿ. ಆತನ ಮನೆಯಲ್ಲಿ ನಕ್ಷತ್ರ ಆಮೆಗಳಿವೆ ಎಂಬ ಖಚಿತ ಮಾಹಿತಿ ಮೇರೆಗೆ ಜಂಟಿಯಾಗಿ ದಾಳಿ ನಡೆಸಿದ ಅರಣ್ಯ ಇಲಾಖೆಯ ಸಿಐಡಿ ವಿಭಾಗದ ಸಿಪಿಐ ಪುರುಷೋತ್ತಮ್‌ ಹಾಗೂ ದಿಬ್ಬೂರಹಳ್ಳಿ ಠಾಣೆಯ ಎಸ್‌ಐ ವಿಜಯ್‌ರೆಡ್ಡಿ ನೇತೃತ್ವದ ತಂಡ, 280 ನಕ್ಷತ್ರ ಆಮೆಗಳನ್ನು ವಶಕ್ಕೆ ಪಡೆದು ಆರೋಪಿಯನ್ನು ಬಂಧಿಸಿದೆ.

ದೆಹಲಿಗೆ ಸಾಗಣೆ ಮಾಡುವ ಉದ್ದೇಶ: ಆಂಧ್ರಪ್ರದೇಶದ ಕದ್ರಿಯಿಂದ ಖರೀದಿಸಿ ತಂದಿದ್ದ ನಕ್ಷತ್ರ ಆಮೆಗಳನ್ನು ಮಾರಾಟಕ್ಕಾಗಿ ದೆಹಲಿಗೆ ಸಾಗಣೆ ಮಾಡುವ ಉದ್ದೇಶದಿಂದ ಮನೆಯಲ್ಲಿ ಇರಿಸಿಕೊಂಡಿದ್ದಾಗಿ ಆರೋಪಿ ವಿಜಯ್‌ ವಿಚಾರಣೆ ವೇಳೆ ತಿಳಿಸಿದ್ದಾನೆ. ತೀವ್ರ ವಿಚಾರಣೆ ನಂತರ ಹೆಚ್ಚಿನ ಮಾಹಿತಿ ದೊರೆಯಲಿದೆ ಎಂದು ದಿಬ್ಬೂರಹಳ್ಳಿ ಪೊಲೀಸರು ಇಳಿಸಿದ್ದಾರೆ. 

ತಾಲೂಕಿನ ಗಡಿ ಪ್ರದೇಶವಾದ ದಿಬ್ಬೂರಹಳ್ಳಿ ಠಾಣಾ ವ್ಯಾಪ್ತಿಯಲ್ಲಿ ಈ ಹಿಂದೆ ಅಕ್ರಮ ಮರಳು ಸಾಗಾಣಿಕೆ, ಎರಡು ತಲೆ ಹಾವುಗಳ ಮಾರಾಟ ಪ್ರಕರಣಗಳು ದಾಖಲಾಗಿದ್ದವು. ಇದೀಗ ನಕ್ಷತ್ರ ಆಮೆಗಳ ಪ್ರಕರಣ ಬಯಲಾಗಿದೆ. ಈ ಕುರಿತು ಪ್ರಕರಣ ದಾಖಲಿಸಿಕೊಂಡಿರುವ ದಿಬ್ಬೂರಹಳ್ಳಿ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.