SSLC: ವೈದ್ಯನ ಚಿಕಿತ್ಸೆಗೆ ಬಲಿಯಾದ ಅಭಿರಾಮ್‌ಗೆ ಶೇ.96ಅಂಕ

Team Udayavani, May 13, 2017, 11:53 AM IST

ಬೇತಮಂಗಲ: ಆತ ಬದುಕಿದ್ದರೆ ಫ‌ಲಿತಾಂಶ ನೋಡಿ ಎಷ್ಟು ಖುಷಿಪಡುತ್ತಿದ್ದನೋ ಏನೋ, ವಿಧಿಯ ಆಟದ ಎದುರು ಎಲ್ಲವೂ ನಗಣ್ಯ ಎಂಬುದು ಇದಕ್ಕೇ ಇರಬಹುದು. ಕಿವಿನೋವಿಗೆ ಚಿಕಿತ್ಸೆ ಪಡೆಯಲು ಕೋಲಾರ ಜಿಲ್ಲೆ ಬೇತಮಂಗಲ ಪಟ್ಟಣದ ಶಾರದಮೂರ್ತಿ ಕ್ಲಿನಿಕ್‌ಗೆ ಬುಧವಾರ ತೆರಳಿದ್ದ ವಡ್ಡಹಳ್ಳಿ ಗ್ರಾಮದ ಅಭಿರಾಮ್‌(16) ಎಂಬ ವಿದ್ಯಾರ್ಥಿ ಅಸುನೀಗಿದ್ದು, ಇದಕ್ಕೆ ವೈದ್ಯರ ನಿರ್ಲಕ್ಷ್ಯವೇ ಕಾರಣ ಎಂದು ಪಾಲಕರು ಆರೋಪಿಸಿದ್ದರು.

ಆದರೆ ಶುಕ್ರವಾರ ಬಂದ ಎಸ್‌ಎಸ್‌ಎಲ್‌ಸಿ ಫ‌ಲಿತಾಂಶದಲ್ಲಿ ಅಭಿರಾಮ್‌ ಉನ್ನತ ಶ್ರೇಣಿಯಲ್ಲಿ (603)ಶೇ.96.4ರಷ್ಟು ಸಾಧನೆ ಮಾಡಿ ಉತ್ತೀರ್ಣನಾಗಿದ್ದ. ಮಗನಿಗೆ ಸಿಹಿ ತಿನ್ನಿಸಿ ಸಂಭ್ರಮಿಸಬೇಕಾದ ದಿನವನ್ನು ಮಸಣದಲ್ಲಿ ಹಾಲು ಹಾಕುವ ಶಿಕ್ಷೆಯನ್ನು ನಕಲಿ ವೈದ್ಯ ನೀಡಿದ್ದಾನೆ ಎಂದು ಅಭಿರಾಮ್‌ ಪಾಲಕರು ಅಳಲು ತೋಡಿಕೊಂಡಿದ್ದಾರೆ.