ಮದ್ಯದ ಅಮಲಿನಲ್ಲಿ ಚರ್ಚ್‌ಗೆ ಹಾನಿಗೊಳಿಸಿದ ಯುವಕ ಸೆರೆ

Team Udayavani, Jun 22, 2023, 11:53 AM IST

ಬೆಂಗಳೂರು: ಮದ್ಯದ ಅಮಲಿನಲ್ಲಿ ಚರ್ಚ್‌ ಬಾಗಿಲು ಮುರಿದು ಒಳ ನುಗ್ಗಿದ ಯುವಕನೊಬ್ಬ ಅಲ್ಲಿದ್ದ ಕೆಲ ವಸ್ತುಗಳಿಗೆ ಹಾನಿ ಮಾಡಿರುವ ಘಟನೆ ಬಾಣಸವಾಡಿ ಠಾಣೆ ವ್ಯಾಪ್ತಿಯ ಕಮ್ಮನಹಳ್ಳಿಯಲ್ಲಿ ನಡೆದಿದೆ.

ಕೃತ್ಯವೆಸಗಿದ ಕಮ್ಮನಹಳ್ಳಿ ನಿವಾಸಿ ಟಾಮ್‌ ಮ್ಯಾಥ್ಯೂ(20) ಎಂಬಾತನನ್ನು ಪೊಲೀಸರು ಬಂಧಿಸಿದ್ದಾರೆ. ಬುಧವಾರ ನಸುಕಿನ 4.30ರ ಸುಮಾರಿಗೆ ಚರ್ಚ್‌ ಬಳಿ ಬಂದಿದ್ದ ಟಾಮ್‌ ಮ್ಯಾಥ್ಯೂ, ಸುತ್ತಿಗೆ ಬಳಸಿ ಚರ್ಚ್‌ನ ಮುಂಬಾಗಿಲು ಮುರಿದಿದ್ದಾನೆ. ಬಳಿಕ ಚರ್ಚ್‌ ಒಳಗಿರುವ ಕೆಲ ವಸ್ತುಗಳಿಗೆ ಹಾನಿ ಮಾಡಿದ್ದ. ಬಳಿಕ ಅಲ್ಲೆಯಿದ್ದ ಚರ್ಚ್‌ನ ಭದ್ರತಾ ಸಿಬ್ಬಂದಿ ಶಬ್ದ ಕೇಳಿ ಸ್ಥಳಕ್ಕೆ ಬಂದಿದ್ದಾರೆ. ಅವರ ಮೇಲೂ ಆತ ಜಗಳ ಮಾಡುತ್ತಿದ್ದ. ಬಳಿಕ ಘಟನೆಯ ಮಾಹಿತಿ ತಿಳಿದ ತಕ್ಷಣ ಸ್ಥಳಕ್ಕೆ ಬಂದ ಬಾಣಸವಾಡಿ ಪೊಲೀಸರು ಆತನನ್ನು ವಶಕ್ಕೆ ಪಡೆದುಕೊಂಡು ಠಾಣೆಗೆ ಕರೆದೊಯ್ದಿದ್ದಾರೆ. ನಂತರ ವಿಚಾರಣೆ ವೇಳೆ ಆರೋಪಿ ಮಾನಸಿಕವಾಗಿ ತೊಂದರೆಗೀಡಾಗಿದ್ದ ಎಂದು ತಿಳಿದುಬಂದಿದೆ.

ಈ ಕುರಿತು ಪ್ರತಿಕ್ರಿಯೆ ನೀಡಿದ ಡಿಸಿಪಿ ಭೀಮಾಶಂಕರ್‌ ಗುಳೇದ್‌, ತನಿಖೆಯ ವೇಳೆ ಆರೋಪಿ ಯಾವುದೇ ಪ್ರಶ್ನೆಗಳಿಗೆ ಸೂಕ್ತ ಉತ್ತರ ನೀಡುತ್ತಿರಲಿಲ್ಲ. ಸಮೀಪದ ಶಾಲಾ ಕಾಲೇಜುಗಳಲ್ಲಿ ವಿಚಾರಿಸಿ ಆತನ ವಿಳಾಸ ಪತ್ತೆಹಚ್ಚಿ ಅವನ ತಾಯಿಯನ್ನು ಸಂಪರ್ಕಿಸಲಾಯಿತು. ಆರೋಪಿಯು ಸ್ಥಳೀಯನಾಗಿದ್ದು, ಇಪ್ಪತ್ತು ವರ್ಷಗಳಿಂದಲೂ ಅದೇ ಭಾಗದಲ್ಲಿ ನೆಲೆಸಿದ್ದ. ಆರೋಪಿ ತಾಯಿ ಅದೇ ಚರ್ಚ್‌ಗೆ ಪ್ರಾರ್ಥನೆಗೆ ಬರುತ್ತಿದ್ದರು. ನಾಲ್ಕು ವರ್ಷಗಳ ಹಿಂದೆ ಆತನ ತಂದೆ ಮೃತಪಟ್ಟಿದ್ದರು. ಆ ಬಳಿಕ ಆರೋಪಿ ನೊಂದಿದ್ದ ಟಾಮ್‌ ಮ್ಯಾಥ್ಯೂ, ತಾನೇ ದೇವರು ಎಂದು ಹೇಳುತ್ತಿದ್ದ . ಜತೆಗೆ ಆತನ ಮನೆಯ ಕೋಣೆ ಪರಿಶೀಲಿಸಿದಾಗ ಮದ್ಯ ವ್ಯಸನಿಯಾಗಿರುವುದು ಗೊತ್ತಾಗಿದೆ ಎಂದು ತಿಳಿಸಿದ್ದಾರೆ.