ಅದಮ್ಯ ಚೇತನದ ಪ್ರವರ್ತಕ

Team Udayavani, Nov 13, 2018, 6:00 AM IST

ಅನಂತಕುಮಾರ್‌ ಸಾರ್ವಜನಿಕ ಜೀವನದ ಬಗ್ಗೆ ವಿಶೇಷ ಒಲವು ಹೊಂದಿದ್ದರು. ರಾಜಕಾರಣವಲ್ಲದೇ ಸಾಮಾಜಿಕ ಸೇವೆಗಳ ಬಗ್ಗೆ ಕಾಳಜಿ ಹೊಂದಿದ್ದರೆನ್ನುವುದಕ್ಕೆ “ಅದಮ್ಯ ಚೇತನ’ವೇ ಸಾಕ್ಷಿ.

ಸಕ್ರಿಯ ರಾಜಕಾರಣದ ಜತೆಗೆ ಸಾಮಾಜಿಕ ಕಾರ್ಯಕ್ಕಾಗಿ ತಾಯಿ ಗಿರಿಜಾ ಶಾಸಿOಉಯವರ ಸ್ಮರಣಾರ್ಥ ಒಂದು ಟ್ರಸ್ಟ್‌ ಮಾಡಿಕೊಂಡುಅದರಡಿ 1998ರಲ್ಲಿ ಅದಮ್ಯ ಚೇತನ ಸಂಸ್ಥೆ ನೋಂದಾಯಿಸಿಕೊಂಡರು. ಆರಂಭದ ದಿನಗಳಲ್ಲಿ ಅದಮ್ಯ ಚೇತನದ ಮೂಲಕ ಬಡ ಕುಟುಂಬದ ಹೆಣ್ಣುಮಕ್ಕಳಿಗೆ ಕಸೂತಿ(ಟೈಲರಿಂಗ್‌) ತರಬೇತಿ ನೀಡಲಾಗುತಿತ್ತು. 1999ರಲ್ಲಿ ಹೆಣ್ಣುಮಕ್ಕಳಿಗೆ ಕಂಪ್ಯೂಟರ್‌ ತರಬೇತಿ ನೀಡಲು ಆರಂಭಿಸಿದರು.

2001ರಲ್ಲಿ ರಕ್ತದಾನ ಹಾಗೂ ಆಟ-ಪಾಠ ಯೋಜನೆ ಕೈಗೆತ್ತುಕೊಂಡಿದ್ದರು. ಈಗ ಅದ್ಯಮ ಚೇತನ ಅನ್ನ, ಅಕ್ಷರ ಮತ್ತು ಆರೋಗ್ಯ ಕ್ಷೇತ್ರದಲ್ಲಿ ಬಹುದೊಡ್ಡ ಹೆಸರು ಮಾಡಿದೆ. ಅವರ ಪತ್ನಿ ಡಾ.ತೇಜಸ್ವಿನಿ ಅನಂತ್‌ ಕುಮಾರ್‌ ಅವರು ಇದರ ಸಂಪೂರ್ಣ ನಿರ್ವಹಣೆ ಮಾಡುತ್ತಿದ್ದಾರೆ. ಅನಂತ್‌ ಕುಮಾರ್‌ ಅವರು ಮಹಾಪೋಷಕರಾಗಿದ್ದರು.

ಅನ್ನಪೂರ್ಣ ಯೋಜನೆ: ಅದಮ್ಯ ಚೇತನವು ಅನ್ನಪೂರ್ಣಾ ಮಧ್ಯಾಹ್ನದ ಬಿಸಿಯೂಟ ಯೋಜನೆಯ ಮೂಲಕ ಬೆಂಗಳೂರು, ಹುಬ್ಬಳ್ಳಿ, ಕಲಬುರಗಿ ಹಾಗೂ ಜೋಧ್‌ಪುರದ ಸಾವಿರಾರು ಶಾಲೆಗಳ 2 ಲಕ್ಷಕ್ಕೂ ಹೆಚ್ಚು ಮಕ್ಕಳಿಗೆ ಉಣಬಡಿಸುತ್ತಿದೆ. ಆಹಾರವು ದಿನದಿಂದ ದಿನಕ್ಕೆ ವಿಭಿನ್ನವಾಗಿದ್ದು, ಅನ್ನ ಸಾಂಬಾರ್‌, ಮೊಸರನ್ನ, ಪೊಂಗಲ್‌, ಬಿಸಿಬೇಳೆ ಬಾತ್‌, ಸಿಹಿ ಪೊಂಗಲ್‌, ದಾಲ್‌, ರೋಟಿ ಇತ್ಯಾದಿಗಳನ್ನು ಒಳಗೊಂಡಿರುತ್ತದೆ. ಸರ್ಕಾರದಷ್ಟೇ ಅಚ್ಚುಕಟ್ಟಾಗಿ ಮಧ್ಯಾಹ್ನದ ಬಿಸಿಯೂಟವನ್ನು ಅದ್ಯಮ ಚೇತನ ನಡೆಸಿಕೊಂಡು ಬರುತ್ತಿದೆ. ಇದಕ್ಕೆ ಬೆನ್ನೆಲುಬಾಗಿ ಅನಂತ್‌ ಕುಮಾರ್‌ ಇದ್ದರು.

ಆಟ ಪಾಠ 2003ರಿಂದ ಅದಮ್ಯ ಚೇತನ ಒಂದು ವಿಶಿಷ್ಟ ಕಾರ್ಯಕ್ರಮವಾಗಿ ನಡೆಸಿಕೊಂಡು ಬರುತ್ತಿದೆ. ಸರ್ಕಾರಿ ಶಾಲೆಗಳಲ್ಲಿ ಓದುವ, ಸಂಪನ್ಮೂಲಗಳ ಕೊರತೆ ಎದುರಿಸುತ್ತಿರುವ ಮಕ್ಕಳಿಗೆ ಇದರ ಲಾಭ ದೊರೆಯುತ್ತಿದೆ. ಬಣ್ಣಗಳೊಂದಿಗೆ ಆಡುವುದು, ಚಿತ್ರ ಬಿಡಿಸುವುದು, ಬಣ್ಣದ ಪೆನ್ಸಿಲ್‌ಗ‌ಳ ಬಳಕೆ, ಕ್ಲೇ ಮಾಡೆಲಿಂಗ್‌,ಕಂಪ್ಯೂಟರ್‌ನಲ್ಲಿ ಚಿತ್ರ ಬಿಡಿಸಲು ಬೇಕಾದ ವ್ಯವಸ್ಥೆ ಆಟ ಪಾಠ ಯೋಜನೆಯ ಮೂಲಕ ಮಕ್ಕಳಿಗೆ ಮಾಡಿಕೊಡಲಾಗುತ್ತಿದೆ.

ಆರೋಗ್ಯ ಚೇತನ ಕಾರ್ಯಕ್ರಮದ ಮೂಲಕಶಾಲಾ ಮಕ್ಕಳ ಆರೋಗ್ಯದ ಮೇಲೆ ಹೆಚ್ಚಿನ ನಿಗಾ ವಹಿಸುತ್ತಿದ್ದಾರೆ. ಆರೋಗ್ಯ ಚೇತನದಡಿ ವೈದ್ಯರ ತಂಡವೊಂದು ಕೆಲಸ ಮಾಡುತ್ತಿದೆ. ಶಾಲೆಗಳಿಗೆ ತೆರಳಿ ಉಚಿತವಾಗಿ ಆರೋಗ್ಯ ತಪಾಸಣೆ
ಮಾಡಿಸುತ್ತಾರೆ. 

ಸುಭಿಕ್ಷ ಗ್ರಾಮ ಯೋಜನೆಯಡಿ ಅದಮ್ಯ ಚೇತನದಿಂದ ವಿಜಯಪುರದ ಎರಡು ಹಳ್ಳಿಗಳಲ್ಲಿ 165 ಗೋಬರ್‌ ಅನಿಲ ಯಂತ್ರ ಮತ್ತು 165 ಶೌಚಾಲಯ ನಿರ್ಮಿಸಲಾಗಿದೆ. ಹಸಿರು ಭಾನುವಾರದ ಕಲ್ಪನೆಯಡಿ ಬೆಂಗಳೂರು ನಗರದಲ್ಲಿ ಸಸಿ ನಡೆವ ಕಾರ್ಯಕ್ರಮ ನಿರಂತರವಾಗಿ ನಡೆದುಕೊಂಡು ಬರುತ್ತಿದೆ. ಹೀಗೆ ಅದ್ಯಮ ಚೇತನದಿಂದ ನಡೆಯುತ್ತಿರುವ ಎಲ್ಲ ಸಾಮಾಜಿಕ ಕಾರ್ಯಕ್ಕೂ ಅನಂತ್‌ ಕುಮಾರ್‌ ದೊಡ್ಡ ಪ್ರೇರಕ ಶಕ್ತಿಯಾಗಿದ್ದರು.