ಅದಮ್ಯ ಚೇತನದಲ್ಲಿ ಅನಂತ ಕಾಯಕ

Team Udayavani, Nov 13, 2018, 12:00 PM IST

ಬೆಂಗಳೂರು: ಅಲ್ಲಿ ಎಂದಿನಂತೆ “ಅನಂತ ಕಾಯಕ’ ಸಾಗಿತ್ತು. ಸೂರ್ಯೋದಯವಾಗುವ ಮೊದಲೇ ಶಾಲಾ ಮಕ್ಕಳಿಗೆ ಊಟ ಅಣಿಮಾಡುವ ಕೆಲಸ ನಡೆದಿತ್ತು. ಮುಂಜಾನೆ ಹತ್ತರ ಸಮಯದಲ್ಲೇ ಸುಮಾರು 33,450 ವಿದ್ಯಾರ್ಥಿಗಳಿಗೆ ಮಧ್ಯಾಹ್ನದ ಬಿಸಿಯೂಟ ಸಿದ್ಧವಾಗಿ ಅಕ್ಷಯ ಪಾತ್ರೆ ಸೇರಿತ್ತು. ಎಂದಿನಂತೆ “ಲವಲವಿಕೆ’ ವಾತವರಣ ಅಲ್ಲಿತ್ತು.

-ಇದು ಗವಿಪುರಂ ಗುಟ್ಟಹಳ್ಳಿಯ “ಅದಮ್ಯ ಚೇತನ’ ಕಚೇರಿ ಕಟ್ಟಡದಲ್ಲಿ ಸೋಮವಾರ ಬೆಳಗ್ಗೆ ಕಂಡು ಬಂದ ದೃಶ್ಯ. ಕೇಂದ್ರ ಸಚಿವ ಅನಂತಕುಮಾರ್‌ ಅವರು, ತಾಯಿ ಗಿರಿಜಾ ಶಾಸಿ ಅವರ ಸ್ಮರಣಾರ್ಥ ಸ್ಥಾಪಿಸಿದ ಅದಮ್ಯ ಚೇತನ ಸಂಸ್ಥೆಯ ಬೆಂಗಳೂರು ಶಾಖೆಯಲ್ಲಿ, ಅನಂತಕುಮಾರ್‌ ಅವರ ಸಾವು, ಅನ್ನದಾಸೋಹಕ್ಕೆ ಅಡ್ಡಿಯಾಗಲೇ ಇಲ್ಲ. ಅವರ ನಿಧನದ ಸಣ್ಣ ಸುಳಿವು ಕೂಡ ಅಲ್ಲಿ ಸುಳಿಯಲಿಲ್ಲ.

ಅದಮ್ಯ ಚೇನತದ ಕಟ್ಟಡದ ಮುಂಬಾಗಿಲ ಬಳಿ ಅವರ ಭಾವಚಿತ್ರಕ್ಕೆ ಹೂವಿನ ಹಾರ ಹಾಕಿದ ದೊಡ್ಡ ಪೋಟೋ ಬಿಟ್ಟರೆ ಎಂದಿನಂತೆ ಕೆಲಸ ಸಾಗಿತ್ತು. ಅದಮ್ಯ ಚೇತನವನ್ನು ಹುಟ್ಟಿಹಾಕಿದ ಅನಂತಕುಮಾರ್‌ ನಿಧನರಾಗಿದ್ದಾರೆ. ಆದರೂ ಕೆಲಸ ಸಾಗಿದೆಯಲ್ಲ ಎಂದು ಪ್ರವೇಶ ದ್ವಾರದ ಬಳಿಯೇ ಕುಳಿತಿದ್ದ ಸಂಸ್ಥೆಯ ಬೆಂಗಳೂರು ಉಸ್ತುವಾರಿ ಶ್ರೇಯರಾವ್‌ ಅವರನ್ನು “ಉದಯವಾಣಿ ‘ಮಾತಿಗೆಳೆದಾಗ, ಅನ್ನದಾಸೋಹ ನಿಲ್ಲಬಾರದು ಎಂಬುವುದು ಅನಂತಕುಮಾರ್‌ ಅವರ ಕನಸು.

ಹೀಗಾಗಿ ಅವರು ಇಲ್ಲದಿದ್ದರೂ ಅವರು ಹಾಕಿಕೊಟ್ಟ ಮಾರ್ಗದಲ್ಲೇ ಸಾಗಲಿದೆ ಎಂದು ವಿಶ್ವಾಸದ ಮಾತುಗಳನ್ನಾಡಿದರು. “ಅನಂತಕುಮಾರ್‌ ಹಸಿರು ಭಾನುವಾರ ಕಾರ್ಯಕ್ರ ನಡೆಯುತ್ತಿದ್ದ ದಿನ ಮಾತ್ರ ಇಲ್ಲಿಗೆ ಭೇಟಿ ನೀಡುತ್ತಿದ್ದರು. ಬಂದ ತಕ್ಷಣವೇ ಪ್ರವೇಶ ದ್ವಾರ ಬಳಿ ಇರುವ ಅವರ ತಾಯಿ ಭಾವಚಿತ್ರಕ್ಕೆ ಕೈ ಮುಗಿದು, ಮಂತ್ರ ಹೇಳಿ ಮುಂದಕ್ಕೆ ಸಾಗುತ್ತಿದ್ದರು. ಯಾವುದನ್ನು ಮರೆತರೂ ತಾಯಿಗೆ ನಮಸ್ಕರಿಸಿ, ಮಂತ್ರ ಹೇಳುವುದನ್ನು ಮಾತ್ರ ಮೆರೆಯುತ್ತಿರಲಿಲ್ಲ’ ಎಂದು ಹೇಳುತ್ತಿದ್ದಂತೆ ಅವರ ಕಣ್ಣಂಚಿನಲ್ಲಿ ಸಣ್ಣ ಹನಿ ಜಿನುಗಿತು.

“ಸುಮಾರು ನಾಲ್ಕು ತಿಂಗಳ ಹಿಂದೆ (ಆಗಸ್ಟ್‌ 9 ರಂದು) ಅದಮ್ಯ ಚೇತನಕ್ಕೆ ಭೇಟಿ ನೀಡಿದ್ದ ಅವರು, ಪ್ರತಿಭಾನ್ವಿತ ವಿದ್ಯಾರ್ಥಿಗಳನ್ನು ಕುರಿತು ಒಂದು ತಾಸು ಮಾತನಾಡಿದ್ದರು. ಆ ಸಮಾರಂಭವೇ ಕೊನೆ, ನಂತರ ಅವರು ಇಲ್ಲಿಗೆ ಭೇಟಿ ನೀಡಲಿಲ್ಲ. ಸಂಸ್ಥೆಯಲ್ಲಿ ಕೆಲಸ ಮಾಡುವವರ ಜತೆ ಪ್ರೀತಿಯಿಂದ ಮಾತನಾಡಿದ್ದರು’ ಎಂದು ಹೇಳಿ ಭಾವುಕರಾದರು.

ಹಸಿವಿನಿಂದ ಬಳಲುತ್ತಿರುವ ಬಡ ಮಕ್ಕಳಿಗೆ ಅನ್ನ ನೀಡಬೇಕು. ಅವರು ಯಾವತ್ತೂ ಹಸಿವಿನಿಂದ ಬಳಲ ಬಾರದು ಎಂಬ ಉದ್ದೇಶದಿಂದ ಅನಂತಕುಮಾರ್‌, ಅದಮ್ಯ ಚೇತನ ಸಂಸ್ಥೆಯನ್ನು ಸ್ಥಾಪಿಸಿದರು. ಈಗ ಅವರಿಲ್ಲದಿದ್ದರೂ, ಅವರು ಹೇಳಿಕೊಟ್ಟ ಮಾರ್ಗದರ್ಶನದಲ್ಲೇ ತೇಜಸ್ವಿನಿ ಅನಂತಕುಮಾರ್‌ ಅವರು ಸಂಸ್ಥೆಯನ್ನು ಮನ್ನಡೆಸಿಕೊಂಡು ಹೋಗಲಿದ್ದಾರೆ. ಅವರಿಗೆ ನಾವು ಸಾಥ್‌ ನೀಡುತ್ತೇವೆ ಎಂದು ಅದಮ್ಯ ಚೇತನದ ಮೇಲ್ವಿಚಾರಕಿ ಲಕ್ಷಿ$¾à ಹೇಳಿದರು.

“ಹಸಿರು ಭಾನುವಾರ’ಕ್ಕೆ ಮುನ್ನುಡಿ: ಪರಿಸರದ ಬಗ್ಗೆ ಕಾಳಜಿ ಹೊಂದಿದ್ದ ಅನಂತಕುಮಾರ್‌, ಇಡೀ ಬೆಂಗಳೂರನ್ನು ಹಸಿರುಕರಣ ಮಾಡುವ ಕನಸು ಕಂಡಿದ್ದರು. ಈ ಹಿನ್ನೆಲೆಯಲ್ಲಿಯೇ ಪ್ರತಿ ಭಾನುವಾರ “ಹಸಿರು ಭಾನುವಾರ’ ಎಂಬ ಕಾರ್ಯಕ್ರಮವನ್ನು ಅದಮ್ಯ ಚೇತನ ಟ್ರಸ್ಟ್‌ ಮೂಲಕ ರೂಪಿಸಿ, ನಗರದ ಹಲವು ಭಾಗಗಳಲ್ಲಿ ಸಸಿನೆಟ್ಟಿದ್ದರು. ಇದಕ್ಕೆ “ಸಸ್ಯಾಗ್ರಹ’ ಎಂದು ಹೆಸರಿಟ್ಟಿದ್ದರು. 

ಪ್ರತಿ ಭಾನುವಾರ ವಿವಿಧ ಜಾತಿಯ ಎರಡು ಸಸಿ ನೆಟ್ಟು ನೀರೆರೆಯುತ್ತಿದ್ದ ಅವರು, ಒಂದು ಕೋಟಿ ಸಸಿಗಳನ್ನು ನೆಡುವ ಪಣ ತೊಟ್ಟಿದ್ದರು. ವರು ಆರಂಭಿಸಿರುವ “ಸಸ್ಯಾಗ್ರಹ’ ಯಶಸ್ಸಿನ ಪಥದಲ್ಲಿ ಸಾಗಿದ್ದು, 150ನೇ ಹಸಿರು ಭಾನುವಾರವನ್ನು ಪೂರೈಸಿದೆ.

ಅದಮ್ಯ ಚೇತನ ಸಂಸ್ಥೆಯ ಮೂಲಕ ಅನಂತಕುಮಾರ್‌ ಉತ್ತಮ ಕಾರ್ಯಗಳನ್ನು ಮಾಡಿ ಜನರ ಹೃದಯದಲ್ಲಿ ನೆಲೆಸಿದ್ದಾರೆ. ಅವರ ಮಾರ್ಗದರ್ಶನದಲ್ಲಿ ಕಾರ್ಯಗತಗೊಂಡಿರುವ “ಹಸಿರು ಭಾನುವಾರ’ ಇಡೀ ಬೆಂಗಳೂರಿಗರು ಹೆಮ್ಮಪಡುವಂತಹ ಕಾರ್ಯಕ್ರಮ.
-ದೊಡ್ಡರಂಗೇಗೌಡ, ಕವಿ

* ದೇವೇಶ ಸೂರಗುಪ್ಪ