ಮೂರೇ ತಿಂಗಳಲ್ಲಿ 49 ಲ್ಯಾಪ್‌ಟಾಪ್‌ ಕದ್ದವನ ಬಂಧನ

Team Udayavani, Aug 2, 2018, 12:28 PM IST

ಬೆಂಗಳೂರು: ನಸುಕಿನಲ್ಲಿ ಹೂವಿನ ವ್ಯಾಪಾರ ಮಾಡಿಕೊಂಡು ಟೆಕ್ಕಿಗಳ ಮನೆಗಳನ್ನು ಗುರುತಿಸಿ ಲ್ಯಾಪ್‌ಟಾಪ್‌ ಕಳವು ಮಾಡುತ್ತಿದ್ದ ಕಳ್ಳನೊಬ್ಬನನ್ನು ಕೊನೆಗೂ ಎಲೆಕ್ಟ್ರಾನಿಕ್‌ ಸಿಟಿ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ತಮಿಳುನಾಡಿನ ಕೃಷ್ಣಗಿರಿ ಜಿಲ್ಲೆಯ ಸುಧಾಕರ್‌(32) ಬಂಧಿತ. ಈತನಿಂದ 35 ಲಕ್ಷ ರೂ. ಮೌಲ್ಯದ 49 ಲ್ಯಾಪ್‌ಟಾಪ್‌ಗ್ಳು ಮತ್ತು 510 ಗ್ರಾಂ ಚಿನ್ನಾಭರಣ, 9 ಮೊಬೈಲ್‌ಗ‌ಳನ್ನು ವಶಕ್ಕೆ ಪಡೆಯಲಾಗಿದೆ. ಕರ್ನಾಟಕ-ತಮಿಳುನಾಡು ಗಡಿಭಾಗದ ಹೊಸೂರಿನಲ್ಲಿ ಪತ್ನಿ, ಮಕ್ಕಳೊಂದಿಗೆ ಆರೋಪಿ ವಾಸವಾಗಿದ್ದಾನೆ.

ಹೂವಿನ ವ್ಯಾಪಾರ ಮಾಡುವ ಆರೋಪಿ ವಿರುದ್ಧ ಎಲೆಕ್ಟ್ರಾನಿಕ್‌ ಸಿಟಿ ಠಾಣೆಯಲ್ಲಿ-30, ಆಗ್ರಹಾರ-3,ಬೆಳ್ಳಂದೂರು-3, ಮತ್ತು ಮಾರತಹಳ್ಳಿ ಠಾಣೆಯಲ್ಲಿ-3 ಸೇರಿ ಒಟ್ಟು 39 ಪ್ರಕರಣಗಳು ದಾಖಲಾಗಿವೆ ಎಂದು ಆಗ್ನೇಯ ವಿಭಾಗದ ಡಿಸಿಪಿ ಡಾ.ಬೋರಲಿಂಗಯ್ಯ ಹೇಳಿದರು.

ಹೂವಿನ ವ್ಯಾಪಾರಿ ಲಕ್ಷಾಧೀಶ್ವರ: ಹೂವಿನ ವ್ಯಾಪಾರ ಮಾಡುತ್ತಿದ್ದ ಆರೋಪಿ ಮೂರೇ ತಿಂಗಳಲ್ಲಿ ಲಕ್ಷಾಂಧೀಶ್ವರನಾಗಿದ್ದ. ನಿತ್ಯ ಹೂಸೂರು, ಮಡಿವಾಳ ಹಾಗೂ ಎಲೆಕ್ಟ್ರಾನಿಕ್‌ ಸಿಟಿ ಭಾಗದಲ್ಲಿ ಹೂವಿನ ವ್ಯಾಪಾರ ಮಾಡುತ್ತಿದ್ದ ಸುಧಾಕರ್‌, ರಾತ್ರಿ ಹೊತ್ತು ಮಡಿವಾಳ ಹೂವಿನ ಸಂತೆಗೆ ಹೂವನ್ನು ಕೊಟ್ಟು ನಸುಕಿನಲ್ಲಿ ವಾಪಸ್‌ ಹೋಗುವ ದಾರಿಯಲ್ಲಿ ಎಲೆಕ್ಟ್ರಾನಿಕ್‌ ಸಿಟಿ,

ಪರಪ್ಪನ ಅಗ್ರಹಾರ, ಬೆಳ್ಳಂದೂರು, ಮಾರತಹಳ್ಳಿ ಇತರೆಡೆ ಟೆಕ್ಕಿಗಳ ಮನೆಗಳನ್ನು ಗುರುತಿಸುತ್ತಿದ್ದ. ಮರು ದಿನ ಅದೇ ಸಮಯಕ್ಕೆ ಬೈಕ್‌ನಲ್ಲಿ ಬಂದು ಕಿಟಕಿ ಮೂಲಕ ಮನೆ ಬಾಗಿಲು ತೆರೆದು ಲ್ಯಾಪ್‌ಟಾಪ್‌ ಹಾಗೂ ಚಿನ್ನಾಭರಣ ಕಳವು ಮಾಡುತ್ತಿದ್ದ. ಕಳವು ಮಾಲನ್ನು ತಮಿಳುನಾಡಿನಲ್ಲಿ ಮಾರಿ ಲಕ್ಷಾಂತರ ರೂ. ಸಂಪಾದಿಸುತ್ತಿದ್ದ ಎಂದು ವಿವರಿಸಿದರು.

ಹೆಚ್ಚು ಟೆಕ್ಕಿಗಳಿರುವ ಎಲೆಕ್ಟ್ರಾನಿಕ್‌ ಸಿಟಿ ಠಾಣಾ ವ್ಯಾಪ್ತಿಯಲ್ಲೇ ಆರೋಪಿ 30ಕ್ಕೂ ಹೆಚ್ಚು ಲ್ಯಾಪ್‌ಟಾಪ್‌ಗ್ಳನ್ನು ಕಳವು ಮಾಡಿದ್ದ. ಹೀಗಾಗಿ ಆರೋಪಿ ಪತ್ತೆಗಾಗಿ ವಿಶೇಷ ತಂಡ ರಚಿಸಲಾಗಿತ್ತು. ತನಿಖೆ ವೇಳೆ ಕೃತ್ಯ4-5 ಗಂಟೆ ವೇಳೆಯಲ್ಲಿಯೇ ನಡೆಸಿರುವುದು ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿತ್ತು.  ಇದೇ ವೇಳೆ ಆರೋಪಿಗಾಗಿ ಮಫ್ತಿಯಲ್ಲಿ ನಿತ್ಯ ಕಾಯುತ್ತಿದ್ದ ಪೊಲೀಸರಿಗೆ ಆರೋಪಿ ಸಿಕ್ಕಿಬಿದಿದ್ದಾನೆ ಎಂದು ಡಿಸಿಪಿ ಹೇಳಿದರು.